کھیل

پاکستان میں انٹرنیشنل کرکٹ کے دروازے کھلنے کے امکانات روشن ہوگئے اور شائقین کرکٹ کے لئے اچھی خبر یہ ہے کہ رواں سال کے اختتام پر سری لنکن ٹیم کے دورہ پاکستان کا واضح امکان ہے۔اے پی پی کے مطابق پی سی بی حکام نے تصدیق کی ہے کہ سری لنکن کرکٹ ٹیم کے رواں سال نومبر یا دسمبر میں دورہ پاکستان کا امکان ہے۔پاکستان میں سیکیورٹی صورتحال بہتر ہونے کے بعد سری لنکن کرکٹ بورڈ نے ٹیم پاکستان بھیجنے پر رضامندی کا اظہار کیا جب کہ دونوں کرکٹ بورڈ کے حکام نے سیکیورٹی صورتحال میں بہتری پر اطمینان کا اظہار کیا ہے۔پی سی بی حکام کے مطابق سری لنکن ٹیم اپنے دورہ پاکستان کے دوران ٹی ٹوئنٹی اور ایک روزہ میچز کھیلے گی جب کہ تمام میچز لاہور میں کھیلے جائیں گے۔حکام کا کہنا ہے کہ دنیا نے دیکھا کہ پاکستان سپر لیگ کے فائنل میچ کے لئے بھرپور سیکیورٹی فراہم کی گئی اور لاہور میں پی ایس ایل کے فائنل میچ کے انعقاد کی وجہ سے ملک میں انٹرنیشنل کرکٹ کی بحالی کے لئے پیش رفت ہورہی ہے۔حکام کا کہنا ہے کہ ورلڈ الیون ٹیم رواں سال ستمبر میں پاکستان کا دورہ کر رہی ہے جس میں آسٹریلیا، ویسٹ انڈیز، سری لنکا اور جنوبی افریقا سمیت دیگر غیرملکی کھلاڑی شامل ہوں گے۔خیال رہے کہ 2009 میں سری لنکن ٹیم پر لاہور میں اس وقت حملہ ہوا تھا جب ٹیم ہوٹل سے اسٹیڈیم کی جانب رواں دواں تھی اور اس واقعے کے بعد پاکستان 2011 کرکٹ ورلڈ کپ کی میزبانی سے محروم ہو گیا تھا۔

جرمنی نے میکسیکو کو ایک کے مقابلے میں چار گول سے ہرا کر کنفیڈریشن کپ کے فائنل تک رسائی حاصل کرلی۔ ٹائٹل کے لیے جرمنی کا مقابلہ چلی سے ہوگا۔کنفیڈریشن کپ کے سیمی فائنل میں جرمنی کے گوری ٹزکا نے ابتدا ہی میں بھرپور حملے کیے اور صرف 3 منٹ میں دو گول بنا کر جرمنی کو دو صفر کی برتری دلا دی۔دوسرے ہاف میں بھی میکسیکو کی ٹیم دباؤ میں رہی، 59ویں منٹ میں وارنر نے گول بنا کر اسکور تین صفر کردیا۔ کھیل کے آخری لمحات میں میکسیکو کی جانب سے ایک گول بنا لیکن دو منٹ بعد ہی جرمن کھلاڑی نے اسکور چار ایک کر کے اپنی ٹیم کو فائنل میں پہنچا دیا ۔دوسرے سیمی فائنل میں چلی اور پرتگال کے درمیان مقابلہ مقررہ اور اضافی وقت میں بغیر کسی گول کے برابر رہا، میچ کا فیصلہ پنالٹیز پر ہوا، جس میں چلی تین ۔صفر کی فتح کے ساتھ فائنل میں پہنچ گیا ۔

سابق کپتان وقار یونس نے ویمن ورلڈ کپ میں 50 کی بجائے 30 اوورز کے کھیل کی تجویز دے دی۔ویمن ورلڈ کپ ان دنوں انگلینڈ میں جاری ہے جس کو پاکستان کرکٹ ٹیم کے سابق کپتان وقار یونس خوب مانیٹر کر رہے ہیں۔وقار یونس نے آئی سی سی کو تجویز دی ہے کہ ویمن ورلڈ کپ کے میچز کو 30 اوورز پر مشتمل ہونا چاہیے ، اگر اس حوالے سے سوچا جائے تو کیسا رہے گا ؟وقار یونس کا کہنا تھا کہ 50 اوورز کچھ ٹیموں کے لیے زیادہ محسوس ہوتے ہیں۔انہوں نے اپنی تجویز کے بارے میں ٹینس کا بھی حوالہ دیا جس میں ٹینس میں مردوں کے مقابلے پانچ سیٹ پر مشتمل ہوتے ہیں جبکہ خواتین کا کھیل تین سیٹ پر مشتمل ہوتا ہے ۔

ارجنٹائن کے معروف فٹ بالر لیونل میسی اور ان کی بچپن کی دوست انٹونیلا روکوزو آج رشتہ ازدواج میں منسلک ہوجائیں گے۔ معروف فٹ بال کلب بارسلونا کے فارورڈ لیونل میسی آج اپنی بچپن کی دوست انٹونیلا روکوزو سے طویل تعلق کے بعد شادی کے بندھن میں بندھ جائیں گے جب کہ شادی کی تقریب ارجنٹائن کے شہر روزاریو میں ہوگی۔میسی کی شادی کی تقریب میں دنیائے فٹ بال کے بڑے بڑے نام شرکت کریں گے جس میں نیمار، لوئی سواریز، گلوکارہ شکیرا سمیت کئی شامل ہیں جب کہ شادی میں شریک ہونے کے لیے کئی نامور کھلاڑی ارجنٹائن بھی پہنچ چکے ہیں۔تقریب میں دنیا بھر سے 600 سے زائد مہمان شریک ہوں گے جس کی تیاریاں آخری مراحل میں داخل ہوچکی ہیں جب کہ اس موقع پر سیکورٹی کے سخت ترین انتظامات کیے گئے ہیں اور 200 سے زائد سیکورٹی اہلکاروں کو سٹی ہال کے اطراف تعینات کیا گیا ہے۔دوسری جانب دنیائے فٹبال کی بڑی شادی کی کوریج کے لیے 150 صحافیوں کو خصوصی پاسسز جاری کیے گئے ہیں۔

آسٹریلوی کرکٹ بورڈ اور کھلاڑیوں کے درمیان معاوضے کا تنازع شدت اختیار کرگیا اور بورڈ کی جانب سے کسی حتمی نتیجے تک پہنچنے کے لئے دی گئی ڈیڈ لائن بھی کل ختم ہورہی ہے۔آسٹریلوی کرکٹ بورڈ نے معاوضے کے معاملے کے حل کے لئے کھلاڑیوں کو یکم جولائی تک کی ڈیڈ لائن دی تھی اور نئے معاہدے پر کھلاڑیوں کی جانب سے دستخط نہ کئے جانے کے باعث 230 کھلاڑی بے روزگار ہوجائیں گے تاہم تمام کھلاڑی اپنے مطالبے پر ڈٹے ہوئے ہیں جس کی وجہ سے معاملہ سنگین صورت اختیار کرگیا ہے۔کھلاڑیوں کا موقف ہے کہ انہیں بورڈ کے حاصل ریونیو میں سے رقم ادا کی جائے تاہم کرکٹ بورڈ کا کہنا ہے کہ اگر کھلاڑیوں کو تنخواہوں سے ہٹ کر ادائیگی کا کوئی دوسرا طریقہ اختیار کیا گیا تو اس سے نچلی سطح پر کرکٹ متاثر ہوگی۔کرکٹ بورڈ نے کھلاڑیوں کو حتمی نوٹس میں خبردار کیا تھا کہ اگر انہوں نے بورڈ کے ساتھ نئے معاہدے پر دستخط نہ کئے تو وہ یکم جولائی سے بیروزگار ہوجائیں گے۔کرکٹ بورڈ کے چیف ایگزیکٹو الیسٹر نکلسن کا کہنا ہے کہ بعض کھلاڑیوں نے اچھی آفر سے بورڈ کو آگاہ کیا ہے اس لئے اتوار کو ہنگامی اجلاس طلب کرلیا گیا ہے جس میں کھلاڑیوں کی جانب سے کئے گئے حتمی فیصلے پر مشاورت ہوگی۔آسٹریلوی ٹیم کے بیشتر کھلاڑی بیرون ملک موجود ہیں جب کہ کپتان اسٹیون اسمتھ بھی نیویارک میں چھٹیاں منارہے ہیں جو کرکٹ بورڈ کے ہنگامی اجلاس میں بذریعہ ویڈیو لنک شامل ہوں گے۔کرکٹ آسٹریلیا کے صدر کریگ ڈیر کا کہنا ہے کہ آسٹریلیا کے کھیلے کی تاریخ میں کبھی کھلاڑیوں نے اس قسم کا رویہ نہیں اپنایا، پہلے مرحلے میں کھلاڑیوں نے   بورڈ کو تقسیم کرنے کی کوشش کی جس میں ناکامی کے بعد انہوں نے دھمکیاں دینا شروع کردیں۔