کھیل

لاہور (نمائندہ خصوصی) عماد وسیم پر الزام لگانے والی افغان نژاد ڈچ خاتون کا دنیا نیوز سے گفتگو میں کہنا تھا کہ پاکستانی کرکٹر نے انھیں لندن بلایا، گھومنے پھرنے کے بعد شادی کا جھانسہ دیا اور پھر چُپ سادھ لی۔ خاتون نے دعویٰ کیاکہ ان کی جولائی کے مہینے میں عماد وسیم سے لندن میں ملاقات ہوئی تھی، لیکن ایک ماہ سے عماد نے پلٹ کر کوئی جواب نہیں دیا۔ عماد کے لندن میں دوست سے بھی رابطہ کیا لیکن وہ بھی کچھ نہ کر سکا۔دوسری جانب دنیا نیوز کے رابطے پر عماد وسیم نے الزامات کی تردید کر دی اور ساتھ ہی تصاویر کو جعلی قرار دیا۔ جب ان سے دونوں کی ویڈیو اور ہوٹل بُکنگ کا پوچھا گیا تو جواب دیئے بغیر کال کاٹ دی۔ذرائع سے معلوم ہوا ہے کہ ملاقات کی ویڈیو منظر عام پر آنے کے بعد عماد وسیم بیک فٹ پر چلے گئے ہیں۔ مبینہ طور پر ان کے بھائی نے افغان نژاد ڈچ دوشیزہ سے فون پر رابطہ کیا اور معاملے کو دبانے بلکہ سلجھانے کی یقین دہانی کرائی ہے، جس پر فریقین کے درمیان سمجھوتہ ہو گیا ہے۔ حقائق کو سامنے لانے پر افغان نژاد ڈچ دوشیزہ نے دنیا نیوز کا شکریہ ادا کیا ہے۔

لاہور(نمائندہ خصوصی) سری لنکا سے ون ڈے سیریز کے لیے قومی ٹیم کا اعلان کردیا گیا اور ٹیم میں اظہر علی کو ڈراپ کرکے امام الحق کو شامل کیا گیا ہے۔روزنامہ اوصافکے مطابق پاکستان اور سری لنکا کے درمیان پانچ ون ڈے میچز کی سیریز13 اکتوبر سے شروع ہوگی جس کے لیے قومی ٹیم کا اعلان کردیا گیا ہے، قومی ٹیم میں بلے باز اظہر علی کی جگہ امام الحق کو شامل کیا گیا ہے۔قومی ٹیم میں شامل دیگر کھلاڑیوں میں محمد حفیظ، فخر زماں، احمد شہزاد، بابر اعظم، شعیب ملک، سرفراز احمد، حارث سہیل، محمد عامر، فہیم اشرف، رومان رئیس، حسن علی، شاداب خان، جنید خان اور عماد وسیم شامل ہیں

لاہور: (نمائندہ خصوصی) کرکٹ کا شمار برصغیر پاک وہند کے سب سے مقبول کھیلوں میں ہوتا ہے۔ دونوں ملکوں کی عوام کرکٹ سے جنون کی حد تک لگاؤ رکھتے ہیں۔ جب بھی پاکستان اور بھارتی ٹیموں کے درمیان کوئی میچ ہوتا ہے تو اس وقت شائقین کرکٹ کا جذبہ دیکھنے سے تعلق رکھتا ہے۔ تقسیم ہند سے پہلے انڈیا کی ایک ہی ٹیم تھی جس نے 1932ء میں ہی ٹیسٹ کرکٹ کا درجہ حاصل کر لیا تھا۔ تاہم جب برطانوی تسلط سے آزادی حاصل کرنے کے بعد انڈین ٹیم کی جانب سے کھیلنے والے بہت سے کھلاڑی پاکستان چلے آئے۔برطانوی نشریاتی ادارے میں کرکٹ کے بارے میں چھپنے والی ایک دلچسپ رپورٹ کے مطابق تقسیم ہند سے قبل بروڈہ ٹیم کی جانب سے کھیلنے والے کھلاڑی امیر الہیٰ کا شمار بھی ان کھلاڑیوں میں ہوتا ہے جنہوں نے پاکستان جانے کا فیصلہ کیا۔ امیر الہیٰ 1952ء میں بھارت کا پہلا دورہ کرنے والی پاکستانی ٹیم کا حصہ تھے۔ انہوں نے اپنے کیریئر میں پاکستان کی جانب سے پانچ میچ کھیلے۔ اس کے علاو گل محمد اور عبدالحفیظ کاردار نے بھی دونوں ملکوں کی ٹیموں کی جانب سے کھیلنے کا اعزاز حاصل کیا۔

لندن (نمائندہ خصوصی) فٹبال کا سپر مقابلہ آج ہوگا ، دو روایتی حریفوں رال میڈرڈ اور بارسلونا کلب سپینش سپر کپ میں آج رات مدمقابل ہوں گے ۔سپر سٹار لائنل میسی اور کرسٹیانو رونالڈو شائقین کی توجہ کا مرکز ہوں گے ۔میڈرڈ کے محاذ پر آج فٹبال کی جنگ ہوگی ۔ بارسلونا کلب کا سخت حریف رال میڈرڈ سے سامنا ہوگا ۔ سپینش سپر کلب کا یہ سپر مقابلہ رات ایک بجے شروع ہوگا ۔ میزبان ٹیم رالج میڈرڈ نے خوب پریکٹس کی ، کرسٹیانو رونالڈو میسی الیون کو چت کرنے کیلئے تیار ہیں ۔ لائنل میسی بارسلونا کلب کی امیدوں کا محور ہوں گے ، شائقین نے بھی اپنی اپنی ٹیم کو سپورٹ کرنے کیلئے کمر کس لی ۔

لندن (نمائندہ خصوصی) یورپا فٹبال لیگ کے میچ میں ایورٹن کی ٹیم نے ریوزمبروک کو ایک صفر سے ہرا دیا ہے ۔ یورپا فٹبال لیگ کے میچ میں ایورٹن اور ریوزمبروک کی ٹیموں میں مقابلہ ہوا ۔ دونوں ٹیموں کے درمیان دلچسپ کھیل دیکھنے کو ملا ۔ ایورٹن اور ریوزمبروک نے ایک دوسرے کی گول پوسٹ پر تابڑ توڑ حملے کیے لیکن کامیابی نہ ملی ۔ دونوں کے درمیان پہلے ہاف تک کھیل بغیر کسی گول کے برابر رہا ۔ میچ کے 80 ویں منٹ میں ایورٹن نے مخالف ٹیم کیخلاف زبردست گول کر کے برتری ایک صفر کر دی جو کھیل کے اختتام تک برقرار رہی ۔

لاہور: (نمائندہ خصوصی) جشن آزادی کے سلسلے میں لاہور میں مرد اور خواتین کھلاڑیوں کے درمیان سائیکلنگ کے مقابلے ہوئے۔ ان مقابلوں کا انعقاد سپورٹس بورڈ پنجاب اور پنجاب سائیکلنگ ایسوسی ایشن کے تعاون سے کیا گیا تھا، جس میں مختلف کالجز اور یونیورسٹیز سمیت لاہور کے ساٹھ کھلاڑیوں نے شرکت کی۔ لڑکوں نے پنجاب سٹیڈیم سے کاہنہ اور کاہنہ سے واپس سٹیڈیم تک ہونے والی ریس میں حصہ لیا جبکہ لڑکیوں نے ٹیم سپرنٹ میں شاندار کارکردگی کا مظاہرہ کیا۔سائیکلنگ کے ساتھ ساتھ جھنڈیاں لہرا کر قومی ترانے گائے گئے اور وطن عزیز سے محبت کا خوب اظہار بھی ہوا۔ کھلاڑیوں نے کھیلوں کے ذریعے پاکستان کا نام روشن کرنے کا عزم ظاہر کیا۔ مقابلوں میں نمایاں پوزیشن حاصل کرنے والے کھلاڑیوں میں مہمان خصوصی سابق اولمپیئن حاجی محمد عاشق اور ڈائریکٹر سپورٹس بورڈ پنجاب انیس شیخ نے انعامات تقسیم کئے۔