ٹیکنا لوجی

لاہور(نمائندہ خصوصی) ’ٹرو کالر‘ مقبول ترین موبائل فون ایپلی کیشن ہے جو صارفین کوآڈیو، ویڈیو کال، ٹیکسٹ، فلیش پیغامات بھیجنے اور موصول کرنے کی سہولت فراہم کرتی ہے۔ اب ایپلی کیشن نے اپنے فیچرز کو وسعت دیتے ہوئے ’گوگل ڈو‘ کے ساتھ انضمام کا اعلان کر دیا ہے جس سے اینڈرائیڈ اور آئی او ایس صارفین ٹروکالر کی ایپلی کیشن میں رہتے ہوئے ویڈیوکالزبھی کر سکیں گے۔اس نئے فیچر کے اضافے سے ٹروکالر کے دنیا بھر میں موجود 25کروڑ سے زائد صارفین ویڈیو کالنگ کی معیاری سہولت سے مستفید ہو سکیں گے۔ اس اپ ڈیٹ کے بعد صارفین ایک بٹن دباکرٹروکالر کی ایپلی کیشن کے اندر رہتے ہوئے’گوگل ڈو‘ بھی استعمال کر سکیں گے۔ گویا اب انہیں گوگل ڈو استعمال کرنے کے لیے ٹروکالر ایپلی کیشن بند کرنے کی ضرورت پیش نہیں آئے گی۔اس کے علاوہ اس فیچر کے اضافے کے بعد صارفین ویڈیو کال کے دوران وائی فائی سے سیلولرڈیٹا یا سیلولر ڈیٹا سے وائی فائی پر بھی جا سکیں گے اور ان کی کال بھی اس سے متاثر نہیں ہو گی۔یہ نیا فیچر موبائل فون صارفین کے لیے دستیاب ہے اور یہ اختیاری فیچر ہے۔ صارفین ایپلی کیشن میں اسے آن کا آف بھی کر سکتے ہیں۔ گوگل ڈو بھی اعلیٰ معیار کی ویڈیو کالنگ سہولت فراہم کرنے والی ایپلی کیشن ہے۔یہ نیا فیچر متعارف کروانے پروائس پریزیڈنٹ آف پراڈکٹ، ٹروکالر رشت جھنجھن والا کا کہنا تھا کہ ”بسااوقات آواز اور تحریری پیغامات کافی نہیں ہوتے اور کوئی چیز آمنے سامنے بیٹھ کر گفتگو کرنے کا مقابلہ نہیں کر سکتی۔ چنانچہ ہم ایک ہی جگہ پر ہر طرح کی گفتگو کی سہولت فراہم کرنے کے عزم میں ایک اور قدم اٹھاتے ہوئے ہم فخریہ طور پریہ نیا فیچر متعارف کروا رہے ہیں۔ گوگل ڈو جیسے عمدہ پارٹنر کے ساتھ مل کر ہم اپنے صارفین کو اعلیٰ معیار کی ویڈیو کالنگ کی سہولت فراہم کر سکتے ہیں اور اس سے گوگل ڈو کے صارفین بھی مستفید ہو سکیں گے۔“اس موقع پر گوگل ڈو کے سربراہ امیت فولے کا کہنا تھا کہ ”صارفین کوئی بھی پلیٹ فارم استعمال کر رہے ہوں، ویڈیو کالنگ کی سہولت ہر ایک کے لیے ہونی چاہیے۔ ہمارا مقصد ویڈیو کالنگ کو سادہ، تیز اور ہر شخص کی دسترس تک پہنچانا ہے۔ٹروکالر کے ساتھ انضمام کے بعد ہم اپنے کروڑوں صارفین کو بہتر ویڈیوکالنگ کی سہولت دینے کے قابل ہو گئے ہیں۔“واضح رہے کہ ٹروکالر ایک ایسی ایپلی کیشن ہے جو اپنے صارفین کو رابطہ کرنے والے شخص کی شناخت سے آگاہ رکھتی ہے اور ان چاہے لوگوں کو الگ کرکے صرف ان لوگوں سے رابطہ کرنے میں مدد دیتی ہے جو ان کے لیے اہمیت کے حامل ہوں۔ کمپنی اپنے صارفین کو کئی طرح کی منفرد خدمات فراہم کرتی ہے جن میں ایک ’ڈائیلر‘ کی سروس بھی شامل ہے۔ اس کے ذریعے صارفین کال کرنے یا پیغام بھیجنے والے شخص کی شناخت کر سکتے ہیں ۔ ٹروکالر کا مقصد ہر جگہ اعتماد کی فضاءقائم کرنا ہے اور گفتگو کو محفوظ اور مو ثر بناکر کمپنی یہ فریضہ سرانجام دے رہی ہے۔

کیا آپ کو معلوم ہے کہ زیادہ تر ہوائی جہازوں پر سفید رنگ کیوں کیا جاتا ہے؟
ہوائی جہازوں کا اصل رنگ سفید نہیں ہوتا بلکہ جہاز کو سفید رنگ میں رنگنے کے لیے اس پر تقریبا ً 65 گیلن سفید رنگ استعمال کیا جاتا ہے۔
جہازوں کے سفید رنگ کی سب سے بڑی وجہ یہ ہے کہ سفید رنگ کے باعث سورج کی شعاعیں منعکس ہو جاتی ہیں۔ اس سے جہاز گرم بھی نہیں ہوتا اور سورج کی تابکار شعاعیں اسے نقصان نہیں پہنچاسکتی۔

سفید  یا ہلکے رنگ جہازوں کے لیے سن بلاک کی طرح ہیں۔اس کی مثال ایسے ہی ہے جیسے آپ دھوپ میں سیاہ رنگ کی شرٹ پہنیں تو آپ کو زیادہ گرمی لگے گی جبکہ سفید رنگ کی شرٹ میں اتنی زیادہ گرمی محسوس نہیں ہوگی۔
جہاز کا رنگ سفید ہو تو یہ سورج کی روشنی میں بھی ٹھنڈا رہتا ہے اور ائیرلائنز کو اسے ٹھنڈا رکھنے کے لیے زیادہ خرچ نہیں کرنا پڑتا۔

جہاز پر سفید رنگ کا صرف مالی فائدہ  ہی نہیں ہوتا۔

جہاز میں بہت سے پارٹس پلاسٹک، فائبر گلاس، کاربن فائبر اور اسی طرح کے میٹریل سے بنے ہوتے ہیں۔ سورج کی روشنی براہ راست ان پارٹس پر پڑتی ہے۔سفید یا ہلکے رنگ کی وجہ سے سورج کی روشنی انہیں نقصان نہیں پہنچاتی۔بہت سی ائیرلائن ایسی ہوتی ہیں جو اپنے جہازوں پر سرخ یا دوسرے رنگ کرنا چاہتی ہے۔ ماحولیاتی ادارے اور ایجنسیاں ایسے جہازوں کو پابند بناتی ہیں کہ جہازوں کے کچھ حصے پر لازمی سفید رنگ  کریں۔
کچھ ائیرلائن نے کوشش کی تھی کہ وہ جہازوں پر کوئی رنگ نہ کریں۔ امریکن ائیرلائنز کافی عرصے تک اپنےجہازوں کو بغیر کسی رنگ کے اڑاتی رہی لیکن  اس صورت میں کمپنی کو جہازوں کو پالش کرنے پر اچھا خاصا خرچ کرنا پڑتا تھا۔اسی وجہ سے اب اکثر ائیرلائنز نے اپنے جہازوں پر سفید رنگ کرنا شروع کردیا ہے۔

کراچی: اگر کسی شخص کے جسم کو مرنے کے بعد زمین میں دفنانے کے بجائے خلا میں چھوڑ دیا جائے تو کیا ہوگا؟ بظاہر یہ سوال احمقانہ لگتا ہے لیکن ایسا ہونا کچھ ناممکن بھی نہیں اور ایسی صورت میں بہت ہی دلچسپ جوابات ہمارے سامنے آتے ہیں۔ویسے تو آج کل خلا میں جانا بہت مہنگا سودا ہے لیکن شاید آنے والے عشروں میں خلا کا سفر بہت کم خرچ ہو جائے گا اور کوئی بعید نہیں کہ اکیسویں صدی کے اختتام تک خلا میں پہنچنا اتنا ہی آسان اور کم خرچ ہوجائے جتنا آج ایک سے دوسرے ملک کا سفر ہے۔یہ بھی ہوسکتا ہے کہ زمین پر تنگ پڑتی ہوئی جگہ کے پیشِ نظر مستقبل میں ’’خلائی قبرستان‘‘ کا رواج پڑ جائے۔ یہ اس لیے بھی ممکن محسوس ہوتا ہے کیونکہ خلا بہت ہی بڑی جگہ ہے، اتنی بڑی کہ ہمارا سیارہ زمین اس پورے نظامِ شمسی میں ایک نقطے جیسی حیثیت رکھتا ہے۔اب فرض کیجیے کہ اگر کسی شخص کے مرنے کے بعد اس کے جسدِ خاکی کو خلا میں چھوڑ دیا جائے جبکہ وہ کسی حفاظتی خول وغیرہ میں بند بھی نہ ہو تو چند گھنٹوں، چند دنوں، چند مہینوں اور یہاں تک کہ کئی برسوں کے بعد اس کے جسم پر کیا بیتے گی؟اب تک اس بارے میں کوئی تجربہ تو نہیں کیا گیا لیکن کچھ سائنسی اندازے ضرور لگائے  گئے ہیں جو بڑی حد تک مناسب بھی معلوم ہوتے ہیں۔ وہ اندازے کیا ہیں؟ ملاحظہ کیجیے:خلا میں نہ تو ہوا ہوتی ہے اور نہ ہی نمی، یعنی اگر کسی مردہ جسم کو خلا میں چھوڑ دیا جائے تو اس میں موجود نمی بڑی تیزی سے ختم ہو گی۔ چونکہ انسانی جسم کا 80 فیصد حصہ پانی پر مشتمل ہوتا ہے، اس لیے ماہرین کا اندازہ ہے کہ مُردہ جسم کے خلا میں چھوڑے جانے کے ایک گھنٹے کے اندر اندر ہی اس کی کمیت صرف 20 فیصد رہ جائے گی۔زمین پر زندہ حالت میں تن و مند دکھائی دینے والا 100 کلوگرام وزنی انسان جب مرنے کے بعد خلا میں پہنچے گا تو کچھ ہی دیر میں وہ صرف 20 کلوگرام وزنی رہ جائے گا۔ وہ ہڈیوں کا ایک ایسا ڈھانچہ بن چکا ہوگا جس پر کھال منڈھی ہوگی۔ یعنی ہم یہ کہہ سکتے ہیں کہ صرف ایک گھنٹے میں وہ شخص ایک ’’خشک ممی‘‘ میں تبدیل ہوچکا ہوگا۔

یہ بھی یاد رہے کہ پانی وہ مادّہ ہے جو زندگی کی اہم ترین ضرورت بھی ہے اس لیے پانی کی عدم دستیابی پر انسانی جسم میں موجود تمام جراثیم بھی بڑی تیزی سے ختم ہوجائیں گے یعنی خلا میں مُردہ انسانی جسم گلنے سڑنے سے بھی محفوظ رہے گا۔یہاں یہ سوال پیدا ہوتا ہے کہ اگر خلا میں مُردہ جسم کو جراثیم مرجانے کے بعد گلنے سڑنے کا سامنا نہیں ہوگا تو کیا وہ ہمیشہ اسی حالت میں رہے گا؟ اس سوال کے مختلف جوابات ہیں۔اگر مُردہ جسم زمین کے گرد نچلے مدار میں گردش کر رہا ہو گا تو اس کا مدار بتدریج مختصر ہوتا چلا جائے گا اور چند گھنٹوں سے لے کر چند دنوں کے اندر اندر ہی وہ زبردست رفتار کے ساتھ زمینی کرہ ہوائی میں داخل ہوجائے گا۔ یہاں ہوا کے ذرّات سے شدید رگڑ اور زبردست درجہ حرارت کی وجہ سے وہ صرف چند لمحوں میں جل کر راکھ ہوجائے گا اور بالائی کرہ ہوائی میں بکھر جائے گا۔ زمین سے دیکھنے پر یہ منظر شہابِ ثاقب کی طرح دکھائی دے گا۔اس سے کچھ زیادہ بلندی پر وہ مدار ہے جہاں ’’خلائی ملبے‘‘ (space debris) کی بڑی مقدار زمین کے گرد چکر لگا رہی ہے۔ صرف چند ملی میٹر باریک ذرّات سے لے کر چند سینٹی میٹر جتنے بڑے ٹکڑوں پر مشتمل اس خلائی ملبے کا بڑا حصہ پرانے مصنوعی سیارچوں اور خلائی راکٹوں کی باقیات پر مشتمل ہے اور اس کی رفتار کئی کلومیٹر فی سیکنڈ ہوتی ہے۔اگر کوئی میت اس مدار میں ہوگی تو قوی امکان ہے کہ خلائی ملبے کے ٹکڑے اس سے بھی ٹکرائیں گے اور اپنی غیرمعمولی تیز رفتار کی وجہ سے لاش پر گڑھے ڈال سکتے ہیں اور اگر ٹکرانے والے ملبے کی جسامت زیادہ ہوئی تو ایسا ایک ہی ٹکڑا میت کے پرخچے اُڑا دینے کے لیے کافی ہو گا۔اس سے بھی اوپر تقریباً 36 ہزار کلومیٹر کی بلندی پر وہ مدار ہے جس میں مواصلاتی سیارچے زمین کے گرد چکر لگاتے ہیں اور جسے ’’ارض ساکن مدار‘‘ (جیو اسٹیشنری آربٹ) بھی کہا جاتا ہے۔ یہ مدار قدرے پر سکون ہے اور یہاں پہنچنے والی میت کے لیے خلائی ملبے سے ٹکرانے کے امکانات خاصے کم ہیں۔البتہ، مدار چاہے کوئی بھی ہو لیکن اتنا ضرور طے ہے کہ خلا میں بھیجی جانے والی کسی بھی میت کو (خصوصی حفاظتی انتظامات کے بغیر) سورج سے آنے والی خطرناک شمسی ہواؤں اور کائناتی شعاعوں کی بڑی مقدار کا سامنا کرنا پڑے گا جو اسے کچھ ہی عرصے میں جھلسا کر کوئلے جیسا سیاہ کردیں گی۔ تب یہ خلائی لاش کسی بے ہنگم پتھر کی طرح دکھائی دے گی۔یہ تو ہوئی زمینی مدار میں میت پہنچانے کی بات لیکن یہ بھی ہوسکتا ہے کہ کوئی لاش زمین کے بجائے سورج کے گرد مدار میں پہنچا دی جائے۔ تب کیا ہو گا؟اگر سورج کے گرد ایسی کسی لاش کا مدار چھوٹا ہوا یعنی اس کا فاصلہ سورج سے کم ہوا تو اس کا حشر بھی کم و بیش وہی ہوگا جو زمینی مدار میں چکر لگانے والی کسی لاش کا ہو سکتا ہے، اور جس کا تذکرہ اوپر کی سطور میں کیا جاچکا ہے۔تاہم اگر وہ میت کسی بہت بڑے مدار میں پہنچا دی جائے جہاں وہ سورج سے بہت فاصلے پر رہتے ہوئے اس کے گرد چکر لگا رہی ہو تو اس تک پہنچنے والی شمسی ہواؤں کی شدت بھی بہت کم رہ جائے گی یعنی ہم یہ کہہ سکتے ہیں کہ اسے انتہائی سرد اور قدرے محفوظ ماحول کا سامنا ہو گا جہاں وہ ہزاروں لاکھوں سال تک اسی حالت میں رہتے ہوئے چکر لگاتی رہے گی۔دور دراز خلا کا ماحول انتہائی سرد بھی ہوتا ہے جس کا اوسط درجہ حرارت صرف 2.73 ڈگری کیلون یعنی منفی 270 ڈگری سینٹی گریڈ سے بھی کم ہوتا ہے۔ خلا کے اس تاریک اور شدید سرد ماحول میں کوئی بھی لاش برف سے بھی زیادہ ٹھنڈی رہے گی اور اگر اسے کسی ناگہانی آفت کا سامنا کرنا نہیں پڑا تو وہ کروڑوں اربوں سال تک تقریباً اسی حالت میں رہے گی۔

کراچی: 29 جون کے روز ایپل کارپوریشن کے مشہورِ زمانہ ’’آئی فون‘‘ نے اپنے 10 سال پورے کر لیے اور ساری دنیا میں آئی فون کے لیے مبارکباد کا سلسلہ جاری ہے۔ٹیکنالوجی کے شاہکار یعنی آئی فون کا تاریخی سفر جہاں صارفین اور ایپل کارپوریشن کے لیے انتہائی مفید رہا وہیں اس سے کچھ دلچسپ واقعات اور معلومات بھی وابستہ ہیں جن میں سے چند ایک کا انتخاب پیشِ خدمت ہے۔ یہ باتیں وہ ہیں جن سے بہت کم لوگ واقف ہیں

1۔ ایپل کارپوریشن نے تو دراصل ایک ٹیبلٹ کمپیوٹر کا منصوبہ شروع کیا تھا لیکن اسی دوران ایک ایسے آئی پیڈ کا تصور سامنے آیا جس میں ورچوئل کی بورڈ بھی ہو۔ اسی خیال سے آئی فون کے منصوبے نے جنم لیا تھا۔

2۔ آئی فون کا نام سامنے آنے کے کچھ عرصے بعد ہی مشہور ٹیکنالوجی فرم ’’سسکو سسٹمز‘‘ نے ایپل کارپوریشن پر مقدمہ کر دیا کیونکہ وہ اس سے پہلے ہی بذریعہ انٹرنیٹ کال کرنے والا فون (وی او آئی پی فون) تیار کر چکی تھی جسے اس نے ’’آئی فون‘‘ کا نام دیا تھا۔ ایپل کارپوریشن نے آخرکار سسکو سسٹمز کو خطیر رقم دے کر اس نام (آئی فون) سے دست بردار ہونے پر راضی کیا تھا۔

3۔ اشتہار میں دکھائے جانے والے ہر آئی فون کی اسکرین پر 9 بجکر 41 منٹ کا وقت بجا ہوتا ہے کیونکہ یہ عین وہی وقت تھا جب ایپل کارپوریشن کے بانی اور سی ای او اسٹیو جابز نے 2007 میں پہلا آئی فون دنیا کے سامنے پیش کیا تھا۔

4۔ سام سنگ اگرچہ ایپل کارپوریشن کا حریف ادارہ ہے لیکن آئی فون کے لیے پروسیسر سام سنگ ہی تیار کرتا ہے۔

5۔ ٹائم میگزین نے 2007 میں آئی فون کو اُس سال کی سب سے بڑی ایجاد قرار دیا تھا۔

6۔ 2012 کے اختتام پر جاری کردہ اعداد و شمار کے مطابق اس سال ہر روز 3 لاکھ 40 ہزار کے لگ بھگ آئی فونز فروخت ہوئے تھے۔

7۔ ایپل کا آن لائن میوزک اسٹور ’’آئی ٹیون‘‘ استعمال کرنے کی شرائط میں ایک شرط یہ بھی ہے کہ آپ ایپل کارپوریشن کی کسی بھی پروڈکٹ کا استعمال کرتے ہوئے ایٹمی ہتھیار نہیں بنائیں گے۔

8۔ اب تک آئی فون کے 15 ڈیزائن سامنے آچکے ہیں یعنی تقریباً ہر 8 ماہ میں ایک نیا ڈیزائن۔

9۔ ایپل کی ’’ایپ اسٹور‘‘ وہ پہلی ویب سائٹ ہے جس نے پہلی بار قانونی طور پر ایپس ڈاؤن لوڈ کرنے کا سلسلہ شروع کیا تھا۔

10۔ اگر آئی فون کو روزانہ ایک مرتبہ مکمل طور پر چارج کیا جائے تو یہ پورے سال میں صرف 25 سینٹ (تقریباً 27 پاکستانی روپے) جتنی لاگت والی بجلی استعمال کرے گا۔

ملبورن: آسٹریلیا کے رائل ملبورن انسٹی ٹیوٹ آف ٹیکنالوجی (آر ایم آئی ٹی) کے ماہرین نے دیواروں کے لیے ایک ایسا رنگ تیار کر لیا ہے جو انہیں بجلی پیدا کرنے کے قابل بھی بنا سکتا ہے۔’’شمسی رنگ‘‘ (سولر پینٹ) کہلانے والے رنگ میں مروجہ روغن کے اہم جزو ٹیٹانیم آکسائیڈ کے ساتھ مصنوعی مولبڈینم سلفائیڈ بھی شامل کیا گیا ہے۔ ان دونوں اجزاء کے ملاپ سے تیار ہونے والا رنگ ایک طرف ہوا میں موجود پانی کے بخارات جذب کرنے کی صلاحیت رکھتا ہے تو دوسری جانب یہ سورج کی روشنی بھی جذب کرتے ہوئے پانی کے سالمات کو ہائیڈروجن اور آکسیجن میں توڑتا ہے جنہیں بعد ازاں آپس میں ملا کر بجلی پیدا کی جا سکتی ہے۔اس رنگ کی افادیت اجاگر کرنے کے لیے آر ایم آئی ٹی نے اپنی ویب سائٹ پر ایک تفصیلی فیچر شائع کیا ہے جبکہ یوٹیوب پر ایک ویڈیو بھی جاری کی ہے:

البتہ یہ رنگ اور اس سے وابستہ نظام ابھی اپنی ابتدائی شکل میں ہیں جنہیں مزید پختہ کرکے قابلِ استعمال بنانے میں پانچ سے چھ سال لگ جائیں گے۔ تاہم اس ٹیکنالوجی کے مرکزی تحقیق کار ٹاربن ڈائنیکے کہتے ہیں کہ اپنی تکمیل کے بعد یہ ایک کم خرچ اور مفید نظام ثابت ہوگا جس کا براہِ راست فائدہ غریب ممالک میں دور افتادہ بستیوں کو پہنچے گا۔یہ خاص طور پر ایسے علاقوں کے لیے مفید ہے جہاں کا موسم زیادہ تر گرم اور مرطوب رہتا ہے یعنی وہاں گرمی کے ساتھ ساتھ ہوا میں نمی بھی مناسب رہتی ہے۔ تاہم یہ کم نمی والی ہوا میں بھی بخوبی کام کرسکتا ہے۔

 لندن: برطانیہ کی مشہور برڈ اسٹریٹ میں خریدار اب چلتے پھرتے بھی بجلی بنا سکتے ہیں اور اس لحاظ سے یہ دنیا کی پہلی اسمارٹ اسٹریٹ ہے۔ بجلی پیدا کرنے والی سڑک نصب کرنے والی کمپنی پیو جین کے مطابق اس کا مقصد مستقبل کی سڑکوں کی ایک جھلک دکھانا ہے تاکہ لوگ ٹریفک اور آلودگی سے پاک ماحول میں سکون سے خریداری کرسکیں اور اپنے قدموں سے بجلی تیار کر کے ماحول دوست پائیدار ترقی کے عمل میں اپنا کردار ادا کر سکیں۔

فی الحال اسمارٹ سڑک صرف 10 مربع میٹر وسیع ہے جس میں انسانی پیروں کی قوت اور دباؤ سے بجلی بنانے والے خاص پینلز بنائے گئے ہیں۔ سڑک کے دونوں اطراف کھانے اور کپڑوں کی دکانیں موجود ہیں، اس کے قریب خریداری کا ایک بڑا مرکز آکسفورڈ اسٹریٹ بہت مشہور ہے لیکن وہاں شور اور ہنگامہ رہتا ہے اور اس کے برابر میں اس برڈ اسٹریٹ پر سکون کا راج ہے کیونکہ یہاں صارفین کو پیدل چلنا پڑتا ہے۔بجلی بنانے والے پینل کو وی تھری کا نام دیا گیا ہے جو تکونی شکل کا ہے اور ایک پینل پانچ واٹ تک مسلسل بجلی پیدا کرتا ہے۔ پینل انسانی حرکی توانائی کو بجلی میں تبدیل کرتا ہے جس سے اطراف کے اسٹریٹ لیمپس جلتے ہیں، اسپیکروں سے پرندوں کے چہچہانے کی آوازیں خارج ہوتی ہیں اور بلیو ٹوتھ ٹرانسمیٹر کام کرتے ہیں۔

خریدار سڑک پر لگے ڈسپلے سے اپنی پیدا کردہ بجلی کی مقدار معلوم کر سکتے ہیں یا تفصیل اپنے اسمارٹ فون پر وصول کر سکتے ہیں۔ اس کے علاوہ ایئرلیبس کے تعاون سے خاص بینچیں لگائی گئی ہیں جن کا سسٹم مضر نائٹروجن ڈائی آکسائیڈ اور فضائی ذرات کو ختم کرتا ہے اور بینچ کے اطرافی  دستوں سے تازہ ہوا خارج ہوتی ہے۔بجلی پیدا کرنے کے علاوہ اوریگامی (کاغذوں کو مختلف اشکال میں جوڑنے کا جاپانی فن) انداز میں بنائے گئے یونٹ اکیسویں صدی میں شاپنگ سینٹروں اور عوامی مقامات کا ایک جدید تصور پیش کرتے ہیں۔

جنوبی کوریا: سام سنگ نے گیلکسی نوٹ سیون کا ریفربشڈ ماڈل لانچ کرنے کا اعلان کیا ہے جس کی فروخت 7 جولائی سے شروع ہو جائے گی۔ریفربشڈ نوٹ سیون کو گیلکسی نوٹ فین ایڈیشن (ایف ای)  کا نام دیا گیا ہے جو گیلکسی نوٹ سیون کے استعمال شدہ حصوں اور غیر استعمال شدہ ماڈل سے تیار کیا گیا ہے۔ یاد رہے کہ گیلکسی نوٹ سیون کی بیٹریوں میں ازخود آگ لگنے کے کئی واقعات کے بعد سام سنگ نے اس کی فروخت روک دی تھی۔گیلکسی نوٹ سیون ایف ای کی قیمت 60 ہزار روپے رکھی گئی ہے جو پہلے ماڈل کے مقابلے میں 30 فیصد کم ہے۔ فی الحال اس کی فروخت جنوبی کوریا میں شروع کی جا رہی ہے اور ابتدائی طور پر صرف 4 لاکھ سیٹ ہی بنائے گئے ہیں تاہم دیگر ممالک کی فروخت کا فیصلہ بعد میں کیا جائے گا۔سام سنگ نے اس موقع پر اپنے اینڈرائیڈ سافٹ ویئرکو بھی اپ گریڈ کیا ہے اور وہ ہوبہو گیلکسی ایس 8 اور ایس 8 پلس جیسا ہے۔ گیلکسی نوٹ ایف ای میں بکس بی نامی ڈیجیٹل اسسٹنٹ کے ساتھ فنگر پرنٹ ریڈر اور آئی اسکینر بھی نصب ہے۔سام سنگ نے اس موقع پر اپنی پریس ریلیز میں کہا ہے کہ اس مرتبہ بیٹری میں ایک سے زائد اضافی فیچرز رکھے گئے ہیں تاکہ صارفین کسی بھی ناخوشگوار حادثے سے محفوظ رہیں۔سام سنگ نے امید ظاہر کی ہے کہ فین ایڈیشن بڑی اسکرین کے ساتھ انہیں دوبارہ نوٹ سیریز سے جوڑے گا تاہم بعض اندرونی خبروں سے معلوم ہوا ہے کہ نوٹ سیون کی ناکامی کے باوجود سام سنگ گیلکسی نوٹ 8 ریلیز کرنے پر کام کر رہا ہے۔

آسٹریلوی ماہرین نے دریافت کیا ہے کہ شہد کی مکھی کی نظر ہمارے سابقہ تصورات سے کہیں زیادہ تیز ہوتی ہے جس کی مدد سے وہ حملہ آور کو شناخت کر کے تیزی سے فرار ہوجاتی ہیں۔ایڈیلیڈ یونیورسٹی میں ماہرینِ حیاتیات نے مقامی طور پر پائی جانے والی شہد کی مکھیوں کا باریک بینی سے مطالعہ کیا اور مختلف نوعیت کے مصنوعی حالات کے تحت یہ جاننے کی کوشش کی کہ شہد کی مکھیاں اپنے ارد گرد کی اشیاء کو کس حد تک واضح دیکھ سکتی ہیں۔کئی مہینوں تک جاری رہنے والے اس مطالعے کے بعد انہیں معلوم ہوا کہ شہد کی مکھیوں کی نظر ہماری سابقہ معلومات کے مقابلے میں کم از کم 30 فیصد زیادہ تیز ہوتی ہے اور وہ اپنے سامنے تقریباً 2 فٹ کی دوری پر موجود کسی چیز کو بالکل صاف صاف دیکھ سکتی ہیں۔اگرچہ دائیں بائیں اور اوپر نیچے موجود چیزیں انہیں قدرے دھندلی نظر آتی ہیں لیکن پھر بھی وہ اتنی واضح ضرور ہوتی ہیں کہ ان میں حرکت پر شہد کی مکھیاں اپنے بچاؤ کے لیے فوری طور پر اُڑ جاتی ہیں۔شہد کی مکھیوں میں یہ تیز نظر اس قدرتی صلاحیت کے علاوہ ہے جس کے تحت وہ ہوا میں انتہائی معمولی ارتعاش (تھرتھراہٹ) تک کو محسوس کرسکتی ہیں اور اپنی طرف بڑھنے والی کسی چیز کو دیکھے بغیر ہی اس سے ہوشیار ہوجاتی ہیں۔سائنسدانوں کا کہنا ہے کہ اپنی اسی تیز نظر کی بدولت شہد کی مکھیوں کو حملہ آور پرندوں اور جانوروں سے بچنے کا بہتر موقع ملتا ہے اور وہ جان بچا کر فرار ہونے میں آسانی سے کامیاب ہوجاتی ہیں۔ اس تحقیق کی رپورٹ ’نیچر‘ پبلشنگ گروپ کے ریسرچ جرنل ’’سائنٹفک رپورٹس‘‘ کے تازہ شمارے میں شائع ہوئی ہے۔واضح رہے کہ تمام اقسام کی مکھیوں اور بیشتر کیڑے مکوڑوں کی آنکھ ہزاروں باریک باریک عدسوں پر مشتمل ہوتی ہے جسے ’’مرکب آنکھ‘‘ (کمپاؤنڈ آئی) بھی کہا جاتا ہے۔ اپنی مرکب آنکھ کی مدد سے کیڑے ایک وسیع منظر پر آسانی سے نظر رکھ سکتے ہیں جب کہ کسی حملہ آور یا شکاری سے بچ کر تیزی سے فرار بھی ہو سکتے ہیں۔

دنیا بھر میں ڈپریس افراد کی تعداد کل آبادی کا 7 سے 20 فیصد تک ہے۔ اس کا یہ مطلب نہیں، باقی لوگ جنت میں رہتے ہیں۔ نیشنل انسٹی ٹیوٹ آف ہیلتھ مینجمنٹ کی نئی تحقیق کے مطابق ڈپریسڈ افراد بے وقوف نہیں ہوتے۔یہ عام لوگوں سے زیادہ حقیقت پسند ہوتے ہیں دنیا کی حقیقت کو پہچان کر وہ ڈپریسڈ ہو جاتے ہیں۔ ان میں شعور کی کمی نہیں ہوتی ،تاہم قوت ارادی عام لوگوں سے کم ہوتی ہے۔یہ لوگ خوابوں کی دنیا میں نہیں رہتے بلکہ دنیا جیسی ہے اسے ویسی ہی سمجھتے ہیں اور یہ رویہ انہیں ڈپریس کر دیتا ہے۔ نفسیاتی ماہرین نے اس روئیے کو “ڈپریسل دس آرڈر” قرار دیا ہے۔ یہ وہ کیفیت ہے جس میں خواب ٹوٹ جاتے ہیں۔ماہرین نفسیات نے ایسے افراد کو بہت منطقی سوچ رکھنے والا قرار دیا ہے۔ اس کاایک تجربہ 1979ء میں “ایل پی ایلائے” اور”ایل وائے ابرام سن” نے کیا۔انہوں نے ڈپریسڈ اور غیر ڈپریسڈ افراد پر مشتمل دو گروپ بنائے اورانہیں سبزلائٹ اور ایک بٹن دبانے کا مشورہ دیا گیا۔ڈپریسڈ گروپ نے لائٹ اور بٹن کو حقیقت پسندانہ انداز میں دبایا جبکہ دوسرے گروپ کے انداز سے پتہ چلا کہ انہیں اپنے اوپر کنٹرول نہیں انہوں نے بٹن غلط انداز میں دبائے۔