National News from The Pk Media
بیرسٹر محمد علی سیف پی ٹی آئی کے عدالتی کیسز میں قانونی معاونت کریں گے۔
اس حوالے سے تحریکِ انصاف کے سیکریٹری جنرل عمر ایوب خان نے نوٹیفکیشن جاری کر دیا ہے۔
واضح رہے کہ چیئرمین پی ٹی آئی سمیت تحریک انصاف کے کئی رہنماؤں کو ان دنوں عدالتی کیسز کا سامنا ہے۔
گوجرانوالا میں چوتھی شادی کرنے والے شخص کی شادی میں اس کی تیسری بیوی پہنچ گئی، بیوی کے پہنچنے پر شوہر تقریب چھوڑ کر فرار ہو گیا۔
تیسری بیوی نے شوہر رمضان کے خلاف مقدمے کے اندراج کے لیے تھانہ پیپلز کالونی گوجرانوالا میں درخواست دے دی ہے جس کے بعد پولیس نے تحقیقات کا آغاز بھی کر دیا ہے۔
اس حوالے پولیس نے بتایا ہے کہ چوتھی شادی کرنے والے رمضان کی پہلی بیوی فوت ہو چکی ہے اور دوسری بیوی کو اس نے طلاق دے دی تھی۔
پولیس کا کہنا ہے کہ رمضان نے تیسری شادی کی تھی اور اس کے 4 بچے ہیں، اب وہ چوتھی شادی کرنے جا رہا تھا کہ بیوی کے پہنچنے پر اپنی شادی کی تقریب چھوڑ کر فرار ہو گیا۔
آرٹس کونسل آف پاکستان کراچی میں جاری پاکستان تھیٹر فیسٹیول کے آٹھویں روز “Both Sit in Silence for a While” پیش کیا گیا۔
آرٹس کونسل آف پاکستان کراچی میں پاکستان تھیٹر فیسٹیول کے آٹھویں روز پیش کیے گئے اس کھیل میں معروف فنکاروں نے اپنی اداکاری کے جوہر دکھائے۔
کنول کھوسٹ کی ہدایت کاری میں بنائے گئے کھیل میں علی جونیجو اور راستی فاروق نے بہترین اداکاری کا مظاہرہ کیا۔ شو میں میاں بیوی کے دو کرداروں کو دکھایا گیا ہے جو جلد اپنی راہیں جدا کرنے والے ہیں۔
اس انگلش شو میں جوائے لینڈ فلم میں کام کرنے والے اداکار علی جونیجو نے شوہر جبکہ راستی فاروق نے بیوی کا کردار نبھایا۔
پاکستان تھیٹر فیسٹیول میں پاکستانی ڈراموں کی نامور اداکارہ ثانیہ سعید نے بھی شرکت کی۔ اس موقع پر انہوں نے کہا کہ بہت سالوں بعد ایسا ممکن ہوا ہے کہ ہمیں بین الاقوامی ڈرامے دیکھنے کا موقع مل رہا ہے جو خوش آئند بات ہے۔
انکا کہنا تھا کہ جرمن اور امریکی تھیٹر گروپ کے علاوہ دیگر ممالک کی ورکشاپ کا سلسلہ جاری بھی رہنا چاہیے، ایک آرٹسٹ کے لیے یہ بہت ضروری ہوتا ہے کہ ہم ان کے تجربے سے استفادہ کرتے رہیں۔
پاکستانی معروف تھیٹر اداکار و کامیڈین افتخار ٹھاکر نے انکشاف کیا ہے کہ اُن کا پہلا حج ضائع ہو گیا تھا۔
افتخار ٹھاکر نے حال ہی میں ایک پوڈ کاسٹ کے لیے دیئے گئے انٹرویو کے دوران انکشاف کیا ہے کہ اُن کی اپنے پہلے حج کے دوران کسی سے لڑائی ہو گئی تھی جس کے بعد اُنہیں یقین ہو گیا تھا کہ اُن کا پہلا حج ضائع ہو گیا ہے۔
اداکار نے بتایا کہ اس واقع کے بعد انہوں نے ایک پورا سال اللّٰہ سے رو رو کر دعائیں کی تھیں کہ اُنہیں ایک سال کی اور زندگی مل جائے تاکہ وہ ایک بار حج ادا کر لیں۔
اداکار افتخار ٹھاکر کا کہنا تھا کہ پھر انہوں نے دوسرے سال بھی حج کرنے کی سعادت حاصل کی اور بہت خاموش اور ڈر ڈر کے حج کیا کہ اُن کی زبان یا ہاتھ سے کسی کو کوئی تکلیف نہ پہنچے۔
پوڈ کاسٹ کے دوران افتخار ٹھاکر کا بتانا تھا کہ اُن کی اہلیہ روزانہ قرآن شریف کے 9 سپارے پڑھتی ہیں۔
اداکار نے بتایا کہ اُنہیں ڈاکٹر اسرار احمد اور مولانا طارق جمیل سے بے حد محبت ہے۔
افتخار ٹھاکر نے اپنے انٹرویو کے دوران ایک بار پاکستان سے بغیر ٹکٹ کے مدینے شریف جانے کا بھی دلچسپ قصہ سنایا۔
جہلم (محمد زا ہد خورشید ) 27مئی کو لاہور میں پاکستان زندہ باد ریلی میں شرکت کے لیے جامعہ علوم اثریہ جہلم سے ایک قافلہ لاہور روانہ ہو گا، اس بات کا اظہار رئیس الجامعہ حافظ عبدالحمید عامر نے مرکزی جمعیت اہل حدیث، اہل حدیث یوتھ فورس و اہل حدیث سٹوڈنٹس جہلم کے مشترکہ اجلاس سے خطاب کرتے ہوئے کیا، انہوں نے کہا کہ ملک کی موجودہ صورت حال نہایت کشیدہ ہے جس پر خاموشی سے بیٹھا رہنا کسی صورت درست نہیں، پاکستان میں کچھ عرصہ سے ایک منصوبے کے تحت لوگوں میں منفی سوچ کو پروان چڑھایا جا رہا تھا، ملک دشمنی پر مبنی یہ لاوا کئی ماہ سے پک رہا تھا جو کہ 9مئی کو لاہور، راولپنڈی، پشاور، میانوالی، فیصل آباد، کراچی اور ملک کے دیگر شہروں میں پھٹ گیا اور اس نے ملک کو ایک بڑے نقصان سے دوچار کیا، انہوں نے مزید کہا کہ ایسے حالات میں پاک فوج سے اظہار یکجہتی کرنا نہایت ضروری ہے، ملک کے دفاعی اداروں کو کمزور کرنا اور نقصان پہنچانا یقینی طور پر ملک دشمنی ہے، ایسے عناصر کے ساتھ سختی سے نمٹا جانا چاہئے اور قانونی شکنجہ میں کس کر نشان عبرت بنانا چاہئے، تاکہ آئندہ کوئی ایسی جسارت نہ کرسکے، ایسے وقت میں مرکزی جمعیت اہل حدیث پاکستان اور اہل یوتھ فورس پاکستان کی مرکزی قیادت نے 27مئی کو لاہور میں پاک فوج سے اظہار یکجہتی اوردفاعی اداروں و تنصیبات پر حملے کی مذمت کے لیے ”پاکستان زندہ باد ریلی“ نکالنے کا فیصلہ کیا ہے، ہم اس بروقت فیصلہ کو وطن عزیز کے ساتھ محبت کا والہانہ جذبہ سمجھتے ہیں، لہٰذا اس ریلی میں شرکت کے لیے جہلم سے ایک قافلہ لاہور روانہ ہوگا۔
پاک فوج کے شہداء قوم کا مان اور ہماری بقا کی ضمانت ہیں۔ پرنسپل محمد زاہد خورشید
جہلم (محمد زاہد خورشید) پاک فوج سے اظہار محبت کرنے کیلئے اثریہ بوائز سکول اینڈ کالج جہلم کے سٹاف و سٹوڈنٹس نے خصوصی پروگرام کا انعقاد کیا ، سٹوڈنٹس نے پاک فوج کے حق میں تقاریر کیں نظمیں پڑھیں اور نعرے بھی لگائے ، تفصیلات کے مطابق اثریہ بوائز سکول اینڈ کالج جہلم کے پرنسپل محمد زاہد خورشید و ایڈمن بدر خورشید کی قیادت میں سٹاف ممبران سر غلام مصطفی سر عثمان سر فائز سر انوار سر ناصر سر ذین سر قاسم سر نعمان سر حسنین قاری عبدالرزاق قاری عرفان قاری یوسف نے پاک فوج سے محبت کا اظہار کرنے کیلئے سٹاف و سٹوڈنٹس نے خصوصی پروگرام کا انعقاد کیا ، جس میں طلباء نے پاک فوج سے عقیدت و محبت کے اظہار میں بھرپور انداز میں ٹیبلوز پیش کیئے تقاریر کیں نظمیں پڑھیں اور شرکاء نے پاک فوج کے حق میں نعرے بھی لگائے اس موقع پر پروگرام کے شرکاء کا خطاب کرتے کہنا تھا کہ پاک افواج سرحدوں کی محافظ ہے اسکے خلاف ہرزہ سرائی قابل مذمت ہے ، ہم ہر قدم پر پاک افواج کے شانہ بشانہ کھڑے ہیں، دشمن قوتیں پاک فوج اور عوام کے درمیان خلیج ڈالنے اور غلط فہمیاں پیدا کرنے کی کوشش کر رہی ہیں لیکن وہ کامیاب نہیں ہوں گی۔
اگر آئی ایم ایف فنڈ پروگرام کی گرتی ہوئی بحالی کو جاری رکھتا ہے تو پاکستان کے پاس ادائیگی توازن (بیلنس آف پیمنٹ) کے بحران کو مکمل طور پر پھیلنے سے روکنے کے لیے اسلام آباد کی بیمار معیشت کو بیل آؤٹ کرنے کے لیے ایک طریقہ کار وضع کرنے کے لیے چین سے کہنے کے علاوہ کوئی دوسرا راستہ نہ ہوگا۔ اب پالیسی سازوں کے پاس ادائیگی توازن کے بحران اور ڈیفالٹ کے ساتھ ساتھ بے مثال سطح تک دم گھٹتی معیشت سے بچنے کے لیے دیگر تمام راستے تلاش کرنے کے علاوہ کوئی راستہ نہیں بچا ہے۔ اعلیٰ سرکاری ذرائع نے دی نیوز سے بات کرتے ہوئے تصدیق کی کہ ملک میں گہرے سیاسی اور معاشی بحران کے درمیان آئی ایم ایف نے انتظار کرو اور دیکھو کی پالیسی اپنائی ہے لیکن اس پالیسی پر زیادہ دیر تک نہیں چلا جاسکتا۔ یا تو آئی ایم ایف کو نویں جائزے کی تکمیل کے ذریعے بحال کرنا پڑے گا یا پھر پروگرام ختم کر دیا جائے گا۔ ہم نویں جائزے کی تکمیل کے بغیر آئی ایم ایف کے ساتھ مزید کوئی ڈیٹا شیئر نہیں کریں گے۔ آزاد معاشی ماہرین اب تجویز کر رہے ہیں کہ حکومت آئی ایم ایف پروگرام کو بحال کرنے کی آخری کوشش کرے یا پھر واضح طور پر چین کی جانب دیکھے تاکہ مشکلات کا شکار معیشت کو بیل آؤٹ کیا جا سکے۔ سابق وزیر خزانہ اور معروف ماہر اقتصادیات ڈاکٹر حفیظ اے پاشا نے بتایا کہ اگر آئی ایم ایف آگے نہیں بڑھتا تو پاکستان کے پاس اس کے علاوہ کوئی چارہ نہیں ہوگا کہ وہ چین سے درخواست کرے کہ وہ اسلام آباد کو مکمل بحران سے نکالنے کے لیے مدد کے لیے کوئی طریقہ کار وضع کرے۔
چیئرمین پاکستان تحریک انصاف عمران خان نے گرفتاری کے خدشے کے پیش نظر لاہور ہائی کورٹ میں نئی درخواست دائر کردی۔درخواست میں موقف اپنایا کہ انہیں 9 مئی کے بعد درج مقدمات میں گرفتار کیا جاسکتا ہے۔سابق وزیراعظم عمران خان کی درخواست آج سماعت کے لیے مقرر کردی گئی ہے۔قبل ازیں برطانوی اخبار کو انٹرویو دیتے ہوئے عمران خان نے کہا کہ مجھے دوبارہ گرفتاری کا خدشہ ہے۔چیئرمین پاکستان تحریک انصاف عمران خان کا کہنا تھا کہ ہم کسی کی پشت پناہی نہیں چاہتے، ہم چاہتے ہیں کہ وہ غیر جانبدار رہیں۔
حکومت اس بات کی تفتیش کررہی ہے کہ کیا پی ٹی آئی کے چیئرمین عمران خان پاکستان اور اس کے مفادات کے خلاف کام کرنے والی بیرونی ایجنسیوں سے قریبی روابط رکھے ہوئے ہیں یا نہیں ۔پاکستان کے دشمن ممالک سے تعلق رکھنے والی ایجنسیاں عمران کے قریبی دوستوں سے بھی رابطے میں ہیں جیسا کہ وہ ایک نیٹ ورک کی طرح کام کر رہی ہیں۔اعلیٰ ذرائع نے دی نیوز کو بتایا کہ تفتیش کے دوران عمران سے ایجنسیوں سے روابط کے بارے میں بھی پوچھ گچھ کی جائے گی۔قانونی ماہرین اس معاملے کا مطالعہ کر رہے ہیں اور امکان ہے کہ عمران اور اس کے ساتھیوں کے خلاف سنگین نوعیت کا ایک اور مقدمہ درج کیا جائے گا۔اس بات کا انکشاف ہوا ہے کہ ایجنسیاں پی ٹی آئی اور اس کے چیئرمین کو متعدد طریقوں سے مدد فراہم کرتی رہی ہیں۔ متعلقہ حکام نے اس معاملے میں شواہد اکٹھے کر لیے ہیں اور اشارہ ملنے پر عمران کے خلاف فوجداری مقدمہ درج کیا جائے گا۔
وفاقی دارالحکومت اسلام آباد میں گزشتہ روز گرفتار کیے گئے چیئرمین پی ٹی آئی عمران خان کو پولیس لائنز میں لگنے والی عدالت میں کچھ دیر بعد پیش کیا جائے گا جہاں ان کے وکلاء پہنچ گئے ہیں۔نیب ذرائع کے مطابق نیب کی جانب سے عمران خان کے 14 روزہ جسمانی ریمانڈ کی استدعا کی جائے گی۔پولیس لائنز پہنچنے والے عمران خان کے وکلاء بابر اعوان اور فیصل چوہدری کو اندر داخلے سے روک دیا گیا۔وزیرِ اعلیٰ گلگت بلتستان خالد خورشید اپنی سیکیورٹی کے ساتھ پولیس لائنز کے اندر چلے گئے۔پی ٹی آئی رہنما شاہ محمود قریشی اور ملیکہ بخاری بھی پولیس لائنز پہنچ گئے۔
جج ظفر اقبال پر ہمیں اعتماد نہیں: فیصل چوہدری
عمران خان کے وکیل فیصل چوہدری نے میڈیا سے گفتگو کرتے ہوئے کہا کہ عمران خان کا کیس توشہ خانہ کیس کے جج کے سامنے لگایا جا سکتا ہے۔انہوں نے کہا کہ توشہ خانہ کیس کے جج ظفر اقبال کو کیس کی سماعت نہیں کرنی چاہیے، ان پر ہمیں اعتماد نہیں، ان کے خلاف درخواست دائر کریں گے۔فیصل چوہدری نے کہا کہ عمران خان سے ہمارا کوئی رابطہ نہیں، ہمیں کیس کا ریکارڈ نہیں دیا گیا، حکومت نے منصوبہ بندی کے تحت کارروائی کی۔
غیر اعلانیہ مارشل لاء ہے: بابر اعوان
پی ٹی آئی رہنما وعمران خان کے وکیل بابر اعوان نے پولیس لائنز میں میڈیا سے گفتگو کرتے ہوئے کہا کہ اس وقت ملک میں کوئی آئین نہیں، غیر اعلانیہ مارشل لاء ہے، نظر نہ آنے والی ایمرجنسی لگی ہوئی ہے۔
پولیس لائنز عدالت میں تبدیل
سابق وزیرِ اعظم عمران خان کے خلاف توشہ خانہ کیس اور القادر یونیورسٹی ٹرسٹ کیس کی سماعت آج ہو گی۔عمران خان کو جوڈیشل کمپلیکس یا ایف ایٹ کچہری کی بجائے پولیس لائنز ایچ الیون میں پیش کیا جائے گا۔توشہ خانہ کیس میں عمران خان پر فردِ جرم عائد ہو گی یا نہیں؟ اس بات کا فیصلہ آج ہو گا۔ایڈیشنل سیشن جج ہمایوں دلاور نے آج عمران خان کو فردِ جرم عائد کرنے کے لیے طلب کر رکھا ہے۔احتساب عدالت کے جج سے نیب عمران خان کے جسمانی ریمانڈ کی استدعا کرے گی۔کمشنر آفس نے حفاظتی وجوہات کے باعث پولیس لائنز کو عدالت کا درجہ دیا ہے۔
سخت سیکیورٹی انتظامات
اسلام آباد کی اس پولیس لائنز کے باہر سیکیورٹی کے سخت انتظامات کیے گئے ہیں، جہاں ایف سی اور اسلام آباد پولیس تعینات کی گئی ہے۔اسلام آباد پولیس کی جانب سے پولیس لائنز کے باہر کنٹینرز بھی لگا دیے گئے ہیں۔
