قومی

وزیراعظم عمران خان نے تھر پارکر کے 1 لاکھ 12ہزار گھرانوں کو ہیلتھ کارڈ دینے کا اعلان کردیا،ایک کارڈ پر 7 لاکھ 20ہزار روپے تک کا علاج ممکن ہوسکے گا۔چھاچھرو میں جلسے عام سے خطاب میں وزیراعظم عمران خان نے بھارتی وزیراعظم نریندر مودی،بلاول بھٹو زرداری اور سندھ حکومت کو ہدف تنقید بنایا۔

کوئٹہ کے نواحی علاقےپشتون آباد کی مسجد میں دھماکا ہوا ہے جس کے نتیجے میں دو افراد شہید جبکہ  متعددزخمی ہو گئے.ذرائع کے مطابق پشتون آباد میں واقع رحمانیہ مسجد میں دھماکا نماز جمعہ کی ادائیگی سے کچھ دیر قبل ہوا جس وقت نمازی  وضو کر رہے تھے،مسجد نمازیوں سےبھری ہوئی تھی۔پولیس کا کہنا ہے کہ دھماکے میں15افراد زخمی ہوئے جن میں سے دو کی حالت نازک ہے۔ذرائع کا کہنا ہے کہ دھماکے سے قریبی عمارتوں کے شیشے ٹوٹ گئے  جس سے علاقہ مکینوں میں خوف و ہراس پھیل گیا ۔ذرائع کے مطابق سیکورٹی فورسز اور ریسکیو ٹیمیں بھاری تعداد میں جائے وقوعہ پرپہنچے۔ دھماکے سے متاثر ہونے والے نمازیوں کو اسپتال منتقل کیا ۔کوئٹہ کے سول اسپتال میں اب تک پانچ زخمی منتقل کیے جاچکے ہیں جبکہ کئی زخمیوں کو قریبی نجی اسپتال بھی منتقل کیا گیا جہاں انہیں طبی امداد فراہم کی جارہی ہے۔دھماکے میں ہلاکتوں کا بھی اندیشہ ظاہر کیا جارہا ہے۔سیکیورٹی فورسز نے جائے وقوعہ کو حصار میں لے کر واقعے کی تفتیش شروع کردی ہے۔وزیرداخلہ بلوچستان ضیاء اللہ لانگو نے واقعے پر نوٹس لیتے ہوئے متعلقہ اداروں کو ہدایت جاری کی ہے کہ زخمیوں کے طبی امداد اور علاج میں کسی قسم کی کمی نہیں آنی چاہیے۔وزیرداخلہ بلوچستان کا کہنا ہے کہع عبادت گاہوں کو نشانہ بنانے والےدہشت گرد انسان کہلانے کے لائق نہیں،انہوں نے عبادت گاہوں اور دیگر عوامی مقامات کی سیکیورٹی مزید سخت کرنے کی ہدایت کر دی۔وفاقی وزیر داخلہ اعجاز احمد شاہ نے کہا ہے کہ دہشت گرد اوران کے سہولت کاروں کو نشان عبرت بنائیں گے،گھناؤنی سازش کےتحت بلوچستان،ملک میں امن کی صورتحال خراب کرنیکی کوشش کی جارہی ہے۔ادھرمسلم لیگ ن کےصدر،قائدحزب اختلاف شہبازشریف نے دھماکےکی شدیدمذمت کرتے ہوئے کہا ہے کہ رمضان المبارک میں جمعہ کےدوران اللہ کےگھر میں خون ریزی کرنیوالےمسلمان نہیں ہوسکتے۔انہوں نے متاثرہ خاندانوں سے دلی ہمدردی کا اظہار کرتے ہوئے کہا ہے کہ دہشت گردی کے واقعات میں مسلسل اضافہ انتہائی تشویشناک ہے،دہشت گردی کا عفریت ایک مرتبہ پھر سر اٹھا رہا ہے ،نیشنل ایکشن پلان پر حکومتی سستی،لاپرواہی مجرمانہ غفلت کی انتہا ہے۔انہوں نے کہا کہ حکومت معاملے کو سنجیدہ لیتے ہوئے فی الفور پارلیمان کو اعتماد میں لے۔

وزیراعظم عمران خان سے ایران کے وزیر خارجہ جواد ظریف نے ملاقات کی جس میں پاک ایران تعلقات پر تبادلہ خیال کیا گیا اور دونوں ملکوں کے درمیان وزارتِ خارجہ میں وفود کی سطح پرمذاکرات اور دو طرفہ معاملات پر تعاون بدستور جاری رکھنے پر اتفاق کیا گیا۔ملاقات میں ایرانی وزیر خارجہ نے کہا کہ خطے میں قیام امن کیلئے پاکستان کی کاوشوں کو قدرکی نگاہ سے دیکھتے ہیں، جبکہ وزیر خارجہ شاہ محمود قریشی نے کہا کہ خطے میں کشیدگی کسی کے مفاد میں نہیں ہے.اس سے قبل جواد ظریف نے وزارت خارجہ کا دورہ کیا جہاں فریقین نے وزیراعظم عمران خان کے حالیہ دورہ ایران میں فیصلوں اور عملدرآمد پر اطمینان کا اظہار کیا جب کہ دوطرفہ معاملات پر تعاون بدستور جاری رکھنے پر اتفاق کیا گیا۔

دو ہزار اٹھارہ میں پاکستان میں بچوں سے جنسی زیادتی کے ریکارڈ ہونے والے کیسز میں گیارہ فیصد اضافہ ہوا، تین ہزار آٹھ سو بتیس کیس رپورٹ ہوئے،ہر روز دس سے زیادہ بچوں کو زیادتی کا نشانہ بنایا گیا.بچوں کے تحفظ کی غیر سرکاری تنظیم ساحل نے سالانہ رپورٹ “سفاک اعداد و شمار دو ہزار اٹھارہ” جاری کردی،رپورٹ پچاسی قومی اور علاقائی اخبارات کے ڈیٹا کی مدد سے مرتب کی گئی ہے،ساحل کے مطابق بچوں سے زیادتی کے کیسز ملک بھر سے رپورٹ ہوئے اور 2018 میں ہر روز دس سے زیادہ بچوں کو زیادتی کا نشانہ بنایا گیا، ان بچوں میں 55 فیصد لڑکیاں اور 45 فیصد لڑکے تھے۔بچوں کو جن سنگین جرائم کا نشانہ بنایا گیا ان میںاغوا، بد فعلی، جنسی زیادتی،اجتماعی زیادتی ،کم عمری کی شادی اور انہیں لاپتہ کرنے جیسے جرم شامل ہیں۔ساحل کی رپورٹ کے مطابق 6 سے 10 سال اور 11 سے 15 برس کی عمر میں بیشتر لڑکے جنسی زیادتی کا شکار ہوئے،پانچ برس تک کی عمر اور 16 سے 18 برس کی عمروں میں لڑکیوں کو جنسی زیادتی کا زیادہ نشانہ بنایا گیا۔رپورٹ میں کہا گیا کہ 2017 کے مقابلے میں 2018 میں بد فعلی کے کیسز میں 61 فیصد اور جنسی زیادتی میں 15 فیصد اضافہ ریکارڈ کیا گیا۔غیر سرکاری تنظیم کے مرتب کردہ اعداد و شمار کے مطابق 2018 میں اخبارات میں رپورٹ کردہ کیسز میں سے 86 فیصد پولیس میں رجسٹر ہوئے، 56 کیسز میں پولیس نے مقدمہ درج کرنے سے انکار کر دیا جبکہ 11 فیصد معاملات میں اخبارات نے کیس کا اسٹیٹس بیان نہیں کیا۔2018 میں اغوا کے 1064 کیس اخبارات میں رپورٹ ہوئے جن میں 79 فیصد لڑکیاں اور 21 فیصد لڑکے تھے۔ اسی طرح بچوں کی شادی کے 130 رپورٹ کردہ کیسز میں سے 85 فیصد کم عمر لڑکیاں اور 15 فیصد لڑکے تھے۔

قومی احتساب بیورو (نیب) نے اسپیکر سندھ اسمبلی آغا سراج درانی کے گھر پر چھاپے کے دوران کیا کچھ تحویل میں لیا؟ تفصیلات سامنے آگئیں۔نیب ذرائع کے مطابق آغا سراج درانی کے گھر پر مارے گئے چھاپے میں جائیداد،گاڑیوں اور گھر وں سے متعلق اہم دستاویزات حاصل کیں۔ذرائع کے مطابق نیب نے اسپیکر سندھ اسمبلی کے اہل خانہ کے سامنے سیزر میمو بنایا،جس پر ان کی صاحبزادی سے تصدیقی دستخط کرائے گئے۔

نیب ذرائع نے  آغا سراج درانی کی صاحبزادی سے زبردستی دستخط کرانے کی بھی تردید کردی۔نیب ذرائع نے یہ بھی بتایا کہ اسپیکر سندھ اسمبلی سے مثبت سمت میں تحقیقات جاری ہیں۔

سابق صدر جنرل (ر) پرویز مشرف نے کہا ہے کہ پاکستان میں تو میں ضرور جاوں گا،اب تو واپسی کےلئے ماحول بھی سازگار ہے۔ دبئی میں پریس کانفرنس سے خطاب میں پرویز مشرف نے کہا کہ پاکستان جاوں گا مگر بیوقوفوں کی طرح چھلانگ نہیں ماروں گا۔ انہوں نے کہا کہ پاکستان میں میرے لئے اب ماحول ساز گار ہے کیونکہ موجودہ حکومت کی آدھی کابینہ تو وہی ہے جو میرے دور حکومت میں تھی۔ سابق صدر نے میڈیا سے گفتگو کے دوران پاکستان اور اسرائیل کے درمیان تعلقات بہتر بنانے پر بات کی۔ ان کا کہنا تھا کہ اسرائیل پاکستان کو طاقتور مسلم ملک سمجھتا ہے،ہم تھوڑی سی کوشش کریں تو اسرائیل سے تعلقات بہتر ہو سکتے ہیں۔

جنرل (ر) پرویز مشرف نے مزید کہا کہ اسرائیل سے پاکستان کے اچھے تعلقات سے پوری امت مسلمہ پر اثر پڑے گا۔انہوں نے کہا کہ پاک اسرائیل وزرائے خارجہ کی ملاقات سے متعلق ترک صدر کے ذریعے اسرائیل کو پیغام دیا تو ایک دن میں ہی اسرائیلی وزیراعظم کا مثبت جواب آگیا۔سابق صدر نے یہ بھی کہا کہ اسرائیلی وزیراعظم نے اپنے پیغام میں کہا کہ پوری دنیا میں کہیں بھی دونوں ممالک کے وزرائے خارجہ مل سکتے ہیں۔ ان کا کہنا تھا کہ میں نے اپنے وزیر خارجہ خورشید محمود قصوری کو اسرائیلی ہم منصب سے ملاقات کےلئے ترکی بھیجا۔

فلم، ریڈیو، ٹی وی کے اداکار علی اعجاز77برس کی عمرمیں لاہور میں انتقال کرگئے، وہ عارضہ قلب میں مبتلا تھے۔اداکارعلی اعجاز کو دل کا دورہ پڑا جو جان لیوا ثابت ہوا، وہ مزاحیہ ہیرو کے طور پر بہت مقبول ہوئے،انہوں نے 1961ء میں فلم انسانیت سے فنی کیریئر کا آغاز کیا۔علی اعجاز کی مشہور فلموں میں سالا صاحب اور دبئی چلو کا شمار ہوتا ہے جبکہ مشہور ٹی وی ڈراموں میں خواجہ اینڈ سنز، کھوجی اور شیدا ٹلی شامل ہیں۔اداکار علی اعجاز مرحوم کی 1979 ءمیں نمائش کے لیے پیش کی گئی سماجی فلم دبئی چلو سپرہٹ رہی۔علی اعجاز کی پنجابی فلموں مفت بر اور دادا استاد نے بھی کامیابی کے جھنڈے گاڑے، پیار دا بدلہ، بھائیاں دی جوڑی، یملا جٹ، بد نالوں بدنام برا ،عشق میرا ناں، سادھو اور شیطان، لیلیٰ مجنوں، ظلم کدی نئیں پھلدا ، سدھا رستہ، بادل، سوہرا تے جوائی، مسٹر افلاطون، نوکر تے مالک، ووہٹی دا سوال اے، باؤ جی، دشمن پیارا، اندھیر نگری، دھی رانی، چور مچائےشور، عشق میرا ناں، بھروسہ، اتھرا پتر، آپ سے کیا پردا، عشق سمندر مشہور پنجابی فلموں میں شامل ہیں۔اداکار ننھا اور علی اعجاز کی جوڑی 80ء کی دہائی میں مقبولیت کی بلندیوں پر رہی، حکومت نےانہیں 14اگست 1993ءکو صدارتی تمغہ برائے حسن کارکردگی سے نوازا۔اداکار علی اعجاز کی خدمات کے اعتراف میں انہیں نگارا ایوارڈ بھی عطا کیا گیا،انہوں نے پاکستان ٹیلی وژن کے ڈرامہ سیریل لاکھوں میں تین میں کام کر کے بھی شہرت سمیٹی۔اداکار علی اعجاز نے89 فلموں میں اداکاری کے جوہر دکھائے،اپنی مزاحیہ اداکاری کے علاوہ سنجیدہ کرداروں میں بھی اپنے فن کا لوہا منوایا۔علی اعجاز نے معمر شہریوں کے حقوق کیلئے علی اعجاز فاؤنڈیشن کےنام سےاین جی او بھی بنائی، وہ عمر کے آخری حصے میں حکومت اور معاشرے کی بے اعتناعی کا شکوہ کرتے رہے، اداکاری سے کنارہ کشی کے بعد ان کا زیادہ وقت ادبی کتب کے مطالعے میں گزرا۔علی اعجاز مرحوم نے سوگواروں میں بیوہ کشور اور 2 بیٹے بابر اور یاسر چھوڑے ہیں، ان کا جنازہ ان کی رہائش گاہ 41 ڈی نیو مسلم ٹاؤن لاہور سے اٹھایا جائے گا۔علی اعجاز کی نمازجنازہ بعد نماز ظہر ادا کی جائے گی جبکہ انہیں مقامی قبرستان میں سپردخاک کیا جائے گا۔اداکار علی اعجاز کو 12 برس قبل فالج ہوا تھا، وہ قلب کے عارضے میں مبتلا تھے اور کچھ عرصے سے مقامی نجی اسپتال میں زیر علاج تھے۔