نذر حافی

مسئلہ کشمیر سے خطے کے ڈیڑھ ارب انسانوں کی سلامتی، ترقی اور خوش بختی وابستہ ہے۔ یہ خطّہ افرادی قوّت، معدنی ذخائر، اور قدرتی وسائل سے مالا مال ہے۔ مسئلہ کشمیر کو حل کئے بغیر اس خطّے میں خوشحالی اور ترقی ممکن نہیں۔ ان خیالات کا اظہار سپورٹ کشمیر انٹرنیشنل فورم کے تیسویں آنلائن سیشن سے گفتگو کرتے ہوئے فاضل تجزیہ کار ڈاکٹر حفیظ الرحمن صاحب نے کیا۔ انہوں نے کہا کہ اللہ نے مسئلہ کشمیر کے حل کیلئے ہمیں کئی مواقع فراہم کئے لیکن ہم ان سے درست استفادہ نہیں کر سکے۔ انہوں نے کہا کہ ہم نے بحیثیتِ مسلمان اور بحیثیت ِ پاکستانی اپنی ذمہ داریوں کو ادا نہیں کیا۔ ہم دوسروں کیلئے کام کرتے رہے اور دوسروں سے ہی یہ امید لگائے بیٹھے ہیں کہ وہ ہمیں کشمیر آزاد کروا کر دیں۔ انہوں نے کہا اگر ہم اپنی قوّتِ بازو پر اعتماد کریں اور اس مسئلے کے حل کیلئے سنجیدہ غوروفکر کریں تو جنگ کے بغیر بھی اسے حل کیا جا سکتا ہے۔ان کا کہنا تھا کہ پاکستان اور ہندوستان دونوں جنگ کے متحمل نہیں ہیں لہذا دونوں کو جنگ کے علاوہ دیگر آپشنز سوچنے چاہیے۔ انہوں اپنی بات کو جاری رکھتے ہوئے واجپائی فارمولے کا بھی ذکر کیا۔ اس موقع پر انہوں نے کہا کہ ہمیں کشمیر کے حوالے سے جنگ کے علاوہ دیگر تمام راستوں پر وسیع القلبی اور حکمت عملی کے ساتھ آگے بڑھنے کی ضرورت ہے۔ ان کا کہنا تھا کہ ہمارے حکمران کشمیر کی آزادی کے بجائے دوسروں کی جنگیں لڑتے رہےجس کی وجہ سے ہمارے اسّی ہزار باشندے مارے گئے، اس کے علاوہ ہمارے ملک میں دہشت گردی، غربت، بے روزگاری اور پسماندگی کو فروغ ملا۔
ان کے مطابق یہ سب پر واضح ہے کہ ہم کمزور جمہوریت، تباہ حال اقتصاد، سیاسی ناچاقیوں اور اپنی نالائقیوں کے ہوتے ہوئے بھارت سے لڑ کر کشمیر حاصل نہیں کر سکتے۔ انہوں نے کہا کہ مسئلہ کشمیر کیلئے ہمیں اپنے آپ کو اور اپنی سوچ کو بدلنا ہوگا۔
ان کی گفتگو کے بعد پرویز علی شاہ، محمد حسین چمن آبادی،حیدر ڈومکی، محمد افسر امان اور ثقلین کشمیری نے سوالات اور تبصرے بھی کئے۔ سیشن کے بعد ایک جامع اور مفصل تبصرہ رائے یوسف رضا دھنیالہ نے ایک آڈیو میسج کی صورت میں بھیجا ۔ قارئین اس لنک پر https://b2n.ir/b96475 کلک کر کے رائے یوسف رضا دھنیالہ کا مذکورہ تبصرہ سماعت کر سکتے ہیں۔یاد رہے کہ رائے یوسف رضا دھنیالہ واجپائی دور کی بیک ڈور ڈپلومیسی اور واجپائی فارمولے کی جزئیات کے عینی شاہدین میں سے ایک ہیں۔

کانسپریسی تھیوری سے آشنائی ضروری ہے۔ اسے سازشی مفروضہ بھی کہتے ہیں۔ یہ ایسے مفروضے ہوتے ہیں جنہیں تحقیق اور مستندات کے بغیر ہی لوگ تسلیم کر لیتے ہیں۔ ان کا مقصد لوگوں کی لاعلمی اور جہالت کو ایک خاص سمت میں اپنے فائدے کیلئے جہت دینا ہوتا ہے۔ گویا یہ لوگوں کی لاعلمی سے فائدہ اٹھانے کا ہتھکنڈہ ہے۔ ہماری اکثریت انہی سازشی مفروضوں پر بہت جلدی ایمان لے آتی ہے۔ سازشی مفروضوں کا خطرہ اس وقت اور بھی بڑھ جاتا ہے جب اربابِ دانش اور صاحبانِ قلم ایسے مفروضات کے شکار ہو جائیں۔چونکہ صاحبانِ قلم اگر کسی سازشی مفروضے کی بھینٹ چڑھ جائیں تو وہ دوسروں کو بھی گمراہ کرنے کا سبب بنتے ہیں۔ دوسری طرف لوگ تو بینڈ ویگن تھیوری سے متاثر ہوتے ہیں اور سنی سنائی باتوں پر ہی زندگی گزارتےہیں لہذا کانسپریسی تھیوری کے ساتھ جب بینڈ ویگن تھیوری کو جمع کیا جاتا ہے تو پھر نقارخانے میں طوطی کی آواز کون سنتا ہے۔

ان سازشی مفروضوں میں سے ایک مفروضہ ایران میں اہل سنت کی مذہبی آزادی کے حوالے سے بھی خا صا مقبول ہے۔ اس کے مبلغین میں سے ایک سمیع اللہ ملک بھی ہیں۔وہ ایک معروف کالم نگار ہیں۔ بڑے عرصے سے راقم الحروف کا ان سے قلبی لگاو ہے۔ ملک کے متعدد اخبارات میں ان کے کالمز باقاعدگی سے چھپتے رہتے ہیں۔ سوچا کہ انہی کے ایک کالم کی مدد سے کانسپریسی تھیوری کی وضاحت کی جائے ۔ یہ کالم روزنامہ اوصاف نے چھاپا اور اس کا عنوان تھا “جوش کی نہیں ہوش کی ضرورت ہے۔” اِن کے 25 اکتوبر2021ء کو شائع ہونے والے اس کالم پر قلم فرسائی سے پہلے ہم یہ بیان کرنا چاہتے ہیں کہ تحقیق کی دنیا میں معلومات کا تبادلہ، قلمی مکالمہ اور علمی نقد بہت ضرروی ہے۔ تجزیہ کاری کے دوران انسان کو اپنے ذاتی عقائد اور جذبات کو ایک طرف رکھ کر ٹھوس اعداد و شمار اور حقائق سے کام لینا چاہیے۔ چنانچہ مذکورہ کالم کے مطالعے سے یہ بات واضح ہو جاتی ہے کہ معزز کالم نگار ایران کے حوالے سے یا تو خود کانسپریسی تھیوری کے شکار ہیں اور یا پھر اپنے خاص اعتقادات اور میلانا ت و رجحانات کے باعث ایران کے خلاف کانسپریسی تھیوری کا سہارا لے رہے ہیں ۔ عرض کرنے کا مقصد یہ ہے کہ ہمیں کانسپریسی تھیوری کو سمجھنے کا شعور ہونا چاہیے اور کانسپریسی پر مبنی تحریروں و تقریروں کو کسی بھی صورت فاصلوں اور بدگمانیوں میں نہیں بدلنا چاہیئے۔

تو آیئے اب مذکورہ کالم کے قابلِ گرفت گوشوں میں کانسپریسی تھیوری کی موجودگی کو لمس کرتے ہیں۔ مثال کے طور پر کالم میں ایک جملہ ہر صاحبِ مطالعہ اور منصف مزاج انسان کو چونکانے کیلئے کافی ہے۔ وہ جملہ یہ ہے کہ “امریکہ، بھارت، اسرائیل اور ایران چاروں یار” ہیں۔ یہ جملہ سو فیصد حقائق کے بر عکس ہے چونکہ آج پوری دنیا میں عالمِ کفر کے سامنے اکیلا ایران ڈٹ کر کھڑا ہے۔ اس ڈٹنے کی وجہ سے سارے عالمِ کفر نے مِل کر ایران کو اقتصادی شکنجے میں کسا ہوا ہے۔ چنانچہ آج تیل اور دیگر معدنی ذخائر سے مالا مال ہونے کے باوجود ایران میں افراطِ زر، مہنگائی، بے روزگاری اور اقتصادی بحران گھمبیر شکل اختیار کرچکا ہے۔

کانسپریسی تھیوری کو سمجھنے کیلئے ضروری ہے کہ ہماری توجہ اس پہلو پر رہے کہ یہی ایران جب اسلامی انقلاب سے پہلے عالمِ کُفر کا نوکر تھا تو عالمی استعمار ایران کو آج کے سعودی عرب اور عرب امارات سے بھی زیادہ اہمیت دیتا تھا، لیکن اب اسلامی انقلاب کے بعد چونکہ ایران عالمِ اسلام کی حرّیت اور آزادی کی بات کرتا ہے، فلسطین و کشمیر اور یمن کے لوگوں کے اسلامی و انسانی حقوق کیلئے آواز بلند کرتا ہے اور سب سے بڑھ کر یہ کہ اسلامی سرزمینوں سے استعمار کے انخلا کی بات کرتا ہے، لہذا وہ تنِ تنہا اغیار کے ہاتھوں استعمار کے ظلم کی چکی میں پِس رہا ہے۔

یہ بات آن دی ریکارڈ ہے کہ اسرائیل کو تسلیم کرنا تو دور کی بات ہے اگر ایران صرف اسرائیل کے ساتھ تجارت کی بات ہی شروع کر دے، یعنی صرف تجارت کا عندیہ ہی دیدے تو استعماری طاقتیں آج بھی ایرانیوں کے منہ موتیوں سے بھر دیں گی۔ کانسپریسی تھیوری کے مقابلے میں ٹھوس شواہد سے یہ حقیقت ہر غیر متعصب انسان کیلئے روشن ہے کہ اس وقت دنیا میں اسلام کی آبرو اور عزت فقط اور فقط ایران کے دم قدم سے قائم ہے۔ ذرا سوچئے کہ اگر ایران بھی عرب ممالک کی طرح طاغوت کے قدموں میں ڈھیر ہو جائے تو پھر اس کے بعد دنیا میں اسلام اور مسلمانوں کا کیسا چہرہ دکھائی دے گا۔

اس کالم میں یہ بھی کہا گیاہے کہ “ایران حماس کا دشمن ہے۔” کالم نگار نے یہ دعویٰ اس لئے کیا ہے چونکہ ہماری اکثریت کو حماس اور ایران کے تعلقات کا علم نہیں ہے۔ لہذابین السطور کچھ بھی کہا جا سکتا ہے۔ عوام کو تحقیق سے کوئی غرض نہیں۔ چنانچہ اس سازشی مفروضے کو سمجھنے کیلئے اگر کوئی فقط جنرل قاسم سلیمانی شہید کے جنازے میں حماس کے سربراہ اسماعیل ہنیہ کی تقریر کو ہی سُن لے تو اسے ایران اور حماس کے روابط کا صحیح اندازہ ہو جائے گا۔ یاد رہے کہ کالم نگار کے بقول انہیں عربی پر بھی کافی عبور حاصل ہے۔ لہذا ہمیں امید ہے کہ وہ خود بھی بغیر مترجم کے اسماعیل ہنیہ کی تقریر سُن اور سمجھ سکتے ہیں۔ اگر وہ خود ہی کانسپریسی تھیوری کے شکار ہیں تو یقیناً مذکورہ تقریر سننے کے بعد ان کی سوچ میں نمایاں تبدیلی آئے گی۔ تقریر میں اسماعیل ہنیہ نے جہاں اور بہت کچھ کہا، وہاں یہ بھی کہا کہ قاسم سلیمانی شہیدِ قدس ہے۔ یہ جملہ تین مرتبہ اسماعیل ہنیہ نے دہرایا اور یہ بھی کہا کہ حماس کو ادویات، اسلحے و غذا سمیت جو مدد بھی ملتی ہے، وہ صرف ایران سے ملتی ہے۔

کالم میں یہ دعویٰ بھی موجود ہے کہ ایران اپنے تجارتی مفادات کی وجہ سے ہندوستان کے ساتھ مل کر پاکستان کے خلاف سرگرم ہے۔ ہم چونکہ کانسپریسی تھیوری کو سمجھنا چاہتے ہیں، لہذا ہم اگر فقط سعودی عرب اور ہندوستان کی تجارت کے اعداد و شمار ہی چیک کر لیں اور سعودی عرب و ایران دونوں کی کشمیر کے مسئلے پر فعالیت بھی دیکھ لیں، اسی طرح پاکستان میں جتنے بھی خودکش بمبار، ٹارگٹ کلر، لشکر اور نیٹ ورکس ہیں، سانحہ اے پی ایس پشاور کے نونہالوں کے قاتلوں سے لے کر پاکستانی فوجیوں کے گلے کاٹ کر فٹبال کھیلنے والوں اور پولیس و آرمی کے آفیسرز، بیوروکریٹس، قوالوں اور نعت خوانوں کے قاتلوں، نیز مساجد اور اولیائے کرام کے آستانوں پر دھماکے کرنے والوں کا ریکارڈ بھی چیک کر لیں، تو ہم پر یہ اچھی طرح واضح ہو جائے کہ کون پاکستان کے بجائے ہندوستان کے ساتھ مل کر پاکستان کے خلاف سرگرم ہے۔ اس سے ہمیں بخوبی یہ اندازہ ہوجائے گا کہ کس طرح کانسپریسی تھیوری کے ذریعے حقائق کو مسخ کیا جاتا ہے۔

محقق کو ایران کے انڈیا سے تجارتی تعلقات کا بھی جائزہ لینا چاہیے۔ یہ حقیقت اظہر من الشّمس ہے کہ ایران نے اپنی ساری اقتصادی مجبوریوں کے باوجود کبھی بھی کشمیریوں اور فلسطینیوں کی لاشوں پر ٹرمپ کے کندھے سے کندھا ملا کر تلواروں کا رقص نہیں کیا اور جام نہیں چھلکائے۔ کشمیر و فلسطین پر ایران کے اصولی موقف کی ساری دنیا خصوصاً خود کشمیری و فلسطینی عوام و خواص اور حکومت پاکستان بھی معترف ہے۔ یہ سب حقائق زاویے تاریک رکھنے کیلئے کالم میں یہ سوال اٹھایا گیاہے کہ “سوچنے کی بات تو یہ ہے کہ سعودی عرب اور اس کے قریبی حلیف ہم سے کیوں دور ہوئے۔؟”

یہ سوال ایک لاعلم اور حالات حاضرہ سے انجان قاری کے جذبات ابھارنے کیلئے اٹھایا گیا ہے۔ صرف ایک لاعلم انسان کو ہی آج تک یہ بات سمجھ نہیں آئی کہ سعودی عرب سے پاکستان کن وجوہات کی بنیاد پر دور ہوا ہے ورنہ حالاتِ حاضرہ پر نگاہ رکھنے والا ہر عقلمند انسان اس بات کو اچھی طرح سمجھتا ہے۔

کانسپریسی تھیوری کو اچھی طرح سمجھنے کیلئے یہ بھی جان لیجئے کہ انہوں نے محترم ظفر ہلالی صاحب اور شہید محترمہ بے نظیر بھٹو صاحبہ کا حوالہ دے کر بھی سعودی عرب کی وکالت کرنے کی کوشش کی۔ محترمہ تو شہید ہوگئی ہیں، البتہ اللہ کا شکر ہے کہ ظفر ہلالی صاحب ابھی ہمارے درمیان موجود ہیں۔ چنانچہ صحافت و تحقیق کا ذوق رکھنے والے کچھ اہلِ نظر نے جب ظفر ہلالی صاحب سے رابطہ کیا تو ظفر ہلالی صاحب نے ایسے کسی واقعے سے بھی اور سمیع اللہ ملک صاحب کو جاننے سے بھی صریحاً انکار کر دیا۔ اب یہ تو آپ سمجھ ہی گئے ہونگے کہ اُن کے دوست ظفر ہلالی صاحب اُن کو کیوں نہیں پہچان رہے اور اُن کی ایسی معلوماتی ملاقاتیں کہاں پر ہوا کرتی ہیں۔ خیر ہم اب آگے بڑھنا چاہتے ہیں۔

کالم میں یہ بھی لکھا گیا ہے کہ “اور آج یہ عالم ہے کہ ایران میں کوئی سنی پارلیمنٹ ممبر نہیں بن سکتا، جبکہ تین یہودی پارلیمنٹ ممبر ہیں۔” یہ بھی موجود ہے کہ “ایرانی دارالحکومت تہران میں سنیوں کو مسجد بنانے کی اجازت نہیں جبکہ اسی شہر میں 25 گرجا گھر، 16 مندر، 6 گردوارے اور 20 آتش کدے موجود ہیں۔

” ہم ابلاغِ عامہ کے طالب علموں کیلئے کوئی نامانوس دلیل لانے کے بجائے چند روشن دلائل پیش کرتے ہیں۔ مثلا کالم نگار کے منصفانہ طرزِ عمل کیلئے ضروری تھا کہ وہ ایران کے دورے کرنے والے اہل سنت کے اکابرین مولانا سمیع الحق مرحوم یا قاضی حسین احمد مرحوم سے ہی کبھی اس بارے میں پوچھ لیتے اور یا پھر ابھی مولانا فضل الرحمان، محترم لیاقت بلوچ یا مولانا شیرانی صاحب سے ہی استفسار کر لیتے۔ اسی طرح پاکستان میں تبلیغی جماعت کے اجتماع میں ہر سال ایران سے دیوبندی حضرات جاتے ہیں، انہی میں سے کسی کا انٹرویو لے لیتے۔

کوئی بات نہیں ہمارا مقصد فقط کانسپریسی تھیوری کی وضاحت کرنا ہے۔ ہم بیان کئے دیتے ہیں کہ آج کے دور میں یہ ساری معلومات انٹرنیٹ پر موجود ہیں۔ آپ ماوس کو کلک کرکے چند سیکنڈز میں وکی پیڈیا سے یا کسی بھی ایرانی اہلسنت سیاستدان، عالم دین یا اہم شخصیت سے رابطہ کرکے حقیقت جان سکتے ہیں۔ اس وقت ایران کی پارلیمنٹ میں اٹھارہ نشستیں اہل سنت حضرات کی ہیں، اسی طرح 25 اکتوبر کو کالم لکھتے ہوئے انہوں نے یہ بھی نہیں لکھا کہ 17 اگست 2021ء کو ایران کی بحریہ کے سربراہ یعنی چیف آف نیول اسٹاف مقرر ہونے والے مسٹر شہرام ایرانی کا تعلق اہل سنت سے ہے۔ کالم نگار نے جہانِ اسلام کے متعلق اکیسویں صدی کے سب سے بڑے اور حیران کر دینے والے دینی فتوے کا ذکر بھی نہیں کیا۔ وہ فتوی ٰ یہ ہے کہ ایران کے رہبرِ اعلیٰ نے اہلِ سنت کے مقدسات کی اہانت کو حرام قرار دیا ہے۔ اس فتوے سے پہلے اہل تشیع کا ایک بڑا گروہ ایسا کرنے کو عظیم عبادت اور ثواب شمار کرتا تھا۔ اس فتوے نے پوری دنیا کے اہلِ تشیع کو ایک نئی سوچ، جدید ڈگر اور وسیع بنیادوں پر جہان اسلام کے ساتھ مکالمے کا میدان فراہم کیا ہے۔

سازشی تھیوری کی گہرائی کو سمجھنے کیلئے ہمیں یہاں یہ بھی معلوم ہونا چاہیے کہ ایران کے صرف رہبرِ اعلیٰ نے اہلِ سنت کے مقدسات کی توہین کو حرام قرار نہیں دیا بلکہ سارے ہی مسلمہ شیعہ مجتہدین اور مراجع کرام کا یہی فتویٰ ہے۔ ایرانی شیعہ اتھارٹیز کے ہاں اہل سنت کا جو مقام ہے، اس کا اندازہ آپ اس سے لگا لیں کہ محترم سمیع اللہ ملک صاحب نے جیسا کالم اہلِ تشیع اور ایران کے خلاف لکھا ہے، ایسا کالم ایران میں کوئی بھی اہل سنت کے خلاف لکھنے یا چھاپنے کی جرات نہیں کرسکتا۔

اس کے علاوہ حقیقت ِحال یہ ہے کہ ایران کے دارالحکومت تہران میں 9 عدد یعنی اہلِ سنت کی تعداد کے تناسب سے بھی زیادہ اہلِ سنت کی مساجد موجود ہیں۔ صرف سیستان و بلوچستان میں اہلِ سنت کی چھ ہزار سے زیادہ مساجد موجود ہیں۔

ایران میں اہل سنت کے دینی مدارس کے حوالے سے یہ آن دی ریکارڈ حقیقت ہے کہ ایرانی اہلِسنت کے دینی طلباء و طلبات کو ایران کے ولی فقیہ سید علی خامنہ ای کی طرف سے خصوصی طور پر ماہانہ وظیفہ دیا جاتا ہے۔ ایرانی حکومت کی طرف سے اہل سنت کے دینی طلباء کو دی جانے والی مراعات و خدمات اہل تشیع کے مقابلے میں بہت زیادہ ہیں۔ یہی وجہ ہے کہ بعض سخت مزاج والے شیعہ اس بات پر اپنی حکومت کو تنقید کا نشانہ بھی بناتے ہیں۔ آخر میں ہم کچھ حوالہ جات بطورِ دلائل پیش کر رہے ہیں، تمام قارئین انٹرنیٹ پر وقت ضائع کئے بغیر خود ان حوالہ جات کو جانچ پرکھ سکتے ہیں۔ قرآن مجید کا بھی یہی فیصلہ ہے کہ قُلۡ ہَاتُوۡا بُرۡہَانَکُمۡ اِنۡ کُنۡتُمۡ صٰدِقِیۡنَ﴿۶۴﴾ “کہدیجئے! اپنی دلیل پیش کرو، اگر تم لوگ سچے ہو۔”

قرآنی تعلیمات کی بنیاد پر ہمیں ساشی مفروضوں کو سمجھنے کے ساتھ ساتھ صاحبانِ فہم و فراست کو یہ دعوت دینی چاہیے کہ اگر اُن کے پاس ایسے کوئی ٹھوس شواہد موجود ہیں کہ ایران کی پارلیمنٹ میں اور ایران کے اعلیٰ عہدوں پر کوئی سُنی نہیں ہے، اسی طرح تہران میں اہلِ سنّت کی کوئی مسجد نہیں، وغیرہ وغیرہ۔۔۔ تو وہ بھی ضرور حوالہ جات اور شواہد کے ساتھ ہمارے علم میں لائیں۔ ہمیں فراخدلی کے ساتھ اُن کے ثبوتوں اور شواہد کے بارے میں بھی تحقیق کرنی چاہیے۔ تحقیق کے بعد جو بھی حقیقت ہو، اُس کا سب کے سامنے اعتراف کرنا چاہیے۔ اگر اس کے باوجود اگر کانسپریسی تھیوری پر عمل کرنے والے یا اس کے شکار ہونے والے محترم سمیع اللہ ملک صاحب یا پھر کوئی اور بھی شخص قانع نہ ہو تو انفارمیشن ٹیکنالوجی سے استفادہ کرتے ہوئے محققین کو حقائق جاننے کیلئے ایران کے اہلِ سنت سیاستدانوں اور مختلف طبقات سے تعلق رکھنے والے افراد، آئمہ جمعہ و جماعت نیز تہران کی مساجد میں نمازیں پڑھانے والے اہل سنت علمائے کرام کے ساتھ آن لائن سیشنز کرنے چاہیے۔

مذکورہ کالم میں موجود سازشی تھیوری کو سمجھنے کیلئے مزید دلائل:

آپ صرف کلک کر کے چیک کرتے جائیں:

1۔ صرف گذشتہ حکومت کے دوران اہل سنت کی خواتین اور مرد سفارتکاری سمیت جن پوسٹوں پر موجود تھے، اس کی ایک مختصر فہرست

https://b2n.ir/f57952

2۔ اہل سنت کے مقدسات کی توہین کرنا حرام ہے۔ رہبرِ اعلی ٰ کا فتویٰ

https://b2n.ir/j05479

3۔ اہلِ سنت کے مقدسات کی توہین کو حرام قرار دینے کے بارے میں دیگر شیعہ مجتہدین کا فتویٰ

https://b2n.ir/p84030

4۔ ایران کے رہبرِ اعلیٰ کی طرف سے اہل سنت میں سے بحریہ کا چیف مقرر کرنا اور علمائے اہلِ سنت کا بھرپور خوشی کا اظہار کرنا

https://urdu.sahartv.ir/news/iran-i391727

5۔ تہران میں اہل سنت کی مساجد کی تعداد وکی پیڈیا پر ملاحظہ کیجئے۔

https://b2n.ir/x38144

6۔ تہران میں اہل سنت کی مساجد کا پتہ پیشِ خدمت ہے، گوگل پر سرچ کیجئے یا کسی ایرانی اہلِ سنت سے معلوم کر لیجئے:

1- مسجد صادقیه، واقع در فلکه‌ی دوم صادقیه

2- مسجد تهران ‌پارس، واقع در خیابان دلاوران

3- مسجد شهر قدس، واقع در کیلومتر 20 جاده‌ی قدیم

4- مسجد خلیج فارس، واقع در بزرگراه فتح

5- مسجد النبی، واقع در شهرک دانش

6- مسجد هفت‌جوب، واقع در جاده‌ی ملارد

7- مسجد وحیدیه، واقع در شهریار

8- مسجد نسیم‌ شهر، واقع در اکبرآباد

9- مسجد رضی‌آباد، واقع در سه ‌راه شهریار

7۔ تہران میں اہلِ سنت کی مساجد اور نماز عید کا احوال ایرانی سائٹس پر دیکھ لیجئے

https://b2n.ir/j55681

8۔ ایرانی پارلیمنٹ کی 286 کرسیوں میں سے 18 نشستیں اہلسنت نمائندوں کیلئے مختص ہیں]

https://b2n.ir/y18022

9۔ اہلِ سنت کے دینی مدارس و مساجد کی شان و شوکت

https://b2n.ir/p86420

10۔ ایران میں خلفائے راشدین کے نام سے مساجد و پل اور سڑکوں وغیرہ کے نام اور ایران کی سنی کمیونٹی کے متعلق اہم رپورٹ

https://lubpak.net/archives/305119

11۔ ایران میں اہل سنت کے دینی مدارس پر مستند تحقیق

https://b2n.ir/a91015

اب آپ کے لئے ہم ایرانی اہلِ سنت کی کچھ ویب سائٹس کے لنک یہاں درج کر رہے ہیں، تاکہ آپ ان سے براہِ راست بھی رابطہ کرکے جانکاری حاصل کرسکیں:

12: ایرانی اہل سنت کی ستائیس دینی ویب سائٹس کا وزٹ کیجئے

https://b2n.ir/q50631

13: ایرانی اہل سنت کے دینی مدارس کی خبریں

https://b2n.ir/y92415

14۔ اہل سنت دینی مدارس کی خبریں

https://b2n.ir/h23772

15: حوزه علمیه فاروقیه اهل سنت گالیکش

ایڈرس: استان گلستان، محمودآباد، کلاله – گالیکش – مینودشت

ٹیلی فون نمبر: 01735834944

ویب سائٹ: http://gorgij.net/

16: بندر عباس کے دینی مدارس کی سائٹ

http://ziyaei.com/

17: ایرانی اہل سنت کا آن لائن دینی مدرسہ

صفحه اصلی

18: اہل سنت کے دینی مدارس کا نصاب

https://b2n.ir/g49659

19: ایرانی اہل سنت کی مشہور و معتبر ویب سائٹ

http://www.islahweb.org/

20: سایت شورایٰ عالی مدارس اهل سنت:

http://www.bastakmd.com/

21۔ ایرانی اہل سنت کے دینی مدارس میں داخلے کا طریقہ کار اور سائٹ

https://b2n.ir/x00606

مجلسِ مذاکرہ جاری تھی۔موضوع تھا ” خون صد ہزار انجم سے ہوتی ہے سَحَر پیدا” ۔ اس مصرعے کی روشنی میں محقق محمد بشیر دولتی نے مسئلہ کشمیر پر روشنی ڈالی۔ اُن کی گفتگو کا مرکزی خیال یہ تھا کہ آج کی دنیا میں مسئلہ کشمیر ایک مسلمہ مسئلہ ہے۔ دنیا کی دو ایٹمی طاقتوں کے بیچ میں یہ ایک خاموش آتش فشاں کی مانند زندہ ہے۔ اسے اقوامِ متحدہ کی سلامتی کونسل بھی بطورِ مسئلہ تسلیم کرتی ہے۔ تاہم گزشتہ چوہتر سالوں سے عالمی برادری نہ ہی تو اس مسئلے کو حل کرتی ہے اور نہ ہی اس خطّے میں ہونے والی انسانی حقوق کی خلاف ورزیوں اور اموات کو روکنے کیلئے عالمی سطح پر کوئی دن منایا جاتا ہے۔ انہوں نے عالمی سطح پر دن منانے کی اہمیت اورخصوصا مسئلہ کشمیر کو بین الاقوامی سطح پر منانے کیلئے فعالیت کرنے پر زور دیا۔
انہوں نے یہ مقالہ قیامِ پاکستان کے تقریبا پچہتر سال کے بعد پڑھا ہے۔ کشمیر پاکستان کی شہ رگ ہے اور مسئلہ کشمیر قیامِ پاکستان سے بھی پُرانا ہے۔ اُن کے مقالے کی اہمیت اس لئے بھی بڑھ جاتی ہے چونکہ یہ مجلسِ مذاکرہ اسلامی جمہوریہ ایران کے شہرِ انقلاب، قم المقدس میں منعقد ہوئی ۔ اُن کا یہ زاویہ فِکر قابل توجہ ہے کہ ہم چوہتر سالوں میں اس مسئلے کو نہ ہی تو حل کروا سکے ہیں اور نہ ہی اسے بین الاقوامی سطح پر منانے کیلئے کوئی جدوجہد کر رہے ہیں۔
راقم الحروف ایک طالب علم ہے۔ ایک طالب علم ہونے کے ناتے مجھے اس مسئلے کے بارے میں مختلف شخصیات کو سننے کا موقع ملا ہے۔ گزشتہ اڑھائی سال سے تو میری کافی زیادہ توجہ اسی مسئلے پر مرکوز ہے۔ان اڑھائی سالوں میں مجھے مسئلہ کشمیر کو لاحق خدشات اور امکانات کے عنوان سے انتیس آن لائن سیشن منعقد کرانے کی توفیق نصیب ہوئی ہے۔ اس کے علاوہ اس مسئلے پر کئی تجزیات پڑھنے اور لکھنے کا موقع ملا۔ اسی طرح اس مسئلے کے حوالے سےکئی دانشوروں ، صحافیوں، سیاستدانوں اور مصنفین سے سیکھنے اور اُن سے رابطہ کرنے کی سعادت بھی نصیب ہوئی ہے۔
ان اڑھائی سالوں نے مجھے مسئلہ کشمیر پر بہت کچھ سکھایا ہے۔ ظاہر ہے خیالی پلاو، کمرے میں بیٹھ کر لکھی ہوئی تحریریں، جوشیلی تقریریں اور جذباتی لیکچرز تو عملی تجربے سے بہت زیادہ مختلف ہوتے ہیں۔ جب میں نے مسئلہ کشمیر کے حوالے سے عام عوام، مختلف دانشوروں، سیاستدانوں، تنظیموں، شخصیات، اخبارات اور چینلزکو عملی طور پر جانچنے اور پرکھنے کی کوشش کی تو دھک سے رہ گیا۔
بلاشبہ ہمارے ہاں ایک ایسی اقلیّت ہر شعبے میں موجود ہے جو مسئلہ کشمیر سے آج بھی نظریاتی وابستگی رکھتی ہے۔ بہت کم ایسے سیاستدان، صحافی، دانشور اور تنظیمیں بھی موجود ہیں جو مسئلہ کشمیر کی غیرمشروط حمایت پر ایمان رکھتے ہیں۔ اسی طرح ہماری صفوں میں ایسے سرپھرے ابھی زندہ ہیں جو رائے عامہ کی طاقت، عوامی امنگوں کے طوفان، قلم کی کاٹ، جذبہ جہاد اور میڈیا کے زور پر مسئلہ کشمیر کو حل کرنے پر ایمان رکھتے ہیں۔ ایسے لوگوں کے ہونے سے انکار نہیں۔ ایسے لوگ ہمارے درمیان موجود ہیں لیکن ان میں بھی اکثریت اُن لوگوں کی ہے جن کے پاس اپنا کوئی نقشہ نہیں اور وہ لاشعوری طور پر اُنہی لوگوں کے نقشے پر کام کر رہے ہیں جو یہ نہیں چاہتے کہ اس مسئلے کا کوئی حل نکلے۔
جی ہاں !ہمارے سروے کے مطابق ہمارے درمیان ایسے لوگوں کی اکثریت ہے کہ جن کیلئے مسئلہ کشمیر ایک تیل کے کنویں کی حیثیت رکھتا ہے۔ آئیے اُس اکثریت کو اپنے ارد گرددیکھئے اور پہچانئے کہ جس کیلئے یہ مسئلہ تیل کے کنویں کی مانند ذریعہ آمدن بنا ہوا ہے۔ آپ کو اپنے ارد گرد کشمیر سے منسوب ایسی تنظیمیں ، ادارے اور فورمز بھی مل جائیں گے کہ جنہیں مسئلہ کشمیر کی ابجد کا بھی علم نہیں ہے۔ وہ مسئلہ کشمیر کے حل کیلئے نہ ہی تو کسی قسم کی تحقیقات انجام دیتے ہیں، نہ ہی کتابیں تالیف کرتے ہیں نہ ہی رائے عامہ کو ہموار کرنے کیلئے کوئی میگزین یا مجلہ شائع کرتے ہیں اور نہ ہی قلم اور سوفٹ پاور کا استعمال کرتے ہیں ۔ تاہم وہ موجود ہیں چونکہ انہیں کشمیر کے نام پر فنڈنگ مل رہی ہے۔اسی طرح ایسے سیاستدان ، پالیسی میکرز اور سیاسی پارٹیاں بھی موجود ہیں جن کیلئے یہ مسئلہ ایک منافع بخش سیاسی کارڈ کی اہمیت رکھتا ہے۔انہوں نے کشمیر کے نام پر عوام کو مصروف رکھنا ہوتا ہے، لوگوں کی توجہ حاصل کرنی ہوتی ہے، ان سے ووٹ مانگنے ہوتے ہیں ، اُن کے دلوں کو جہادی نعروں سے گرما کر، جہادی کیمپوں میں سادہ لوح لوگوں کے بچوں کو دہشت گردی کی تربیت دے کر تجوریاں بھرنی ہوتی ہیں اور کشمیر کشمیر کر کے کشمیر کے نام پر کمیٹیاں بنانی، فورمز بنانے اور چندے اکٹھے کرنے ہوتے ہیں۔
اسی طرح ہمارے عوام میں ایک بڑی تعداد اب اُن لوگوں کی ہے جو کشمیر ڈے کے دن گھر میں سو کر یا ٹی وی دیکھ کر چھٹی مناتے ہیں اور یا پھر دوستوں سے ملنے ملانے کیلئے ریلیوں میں چلے جاتے ہیں۔جہاں تک درسی کتب کی بات ہے تو وہاں پر تحریکِ آزادی کشمیر تقریباً دم توڑ چکی ہے۔ شاید آپ کو پاکستانی میڈیا سے یہ امید ہو کہ ہمارا میڈیا کشمیر کی جنگ لڑے گا تو آپ خود بھی تجربہ کر کے دیکھ لیجئے ۔ ہمارے میڈیا کیلئے بھی کشمیر ایک تیل کے کنویں کی مانند ہے۔ اُن کیلئے کشمیر کی خبریں بہترین سورس آف انکم ہیں۔ اُنہیں کشمیر سے کوئی غرض نہیں بلکہ یہ فکر ہوتی ہے کہ کشمیر کی خبریں چلانے یا چھاپنے پر آپ ہمیں یومیہ، ہفتہ وار، ماہانہ یا سالانہ کتنی رقم دیں گے اور کتنے اخبارات خریدیں گے۔حتی کہ سرکاری اداروں میں یومِ کشمیر کی منعقدہ تقریبات کی حیثیت چند فوٹوسیشنز اور ایک دفتری رپورٹ سے زیادہ کی نہیں رہ گئی۔
محترم اور فاضل محقق بشیر دولتی صاحب کا دردِ دل سر آنکھوں پر لیکن یہاں اب اکثریت کا فیصلہ یہی ہے کہ مسئلہ کشمیر سے کماو جتنا کما سکتے ہو۔ بے شک میں بھی بشیر دولتی صاحب کی طرح اُس اقلیت کے ساتھ ہوں جس کے نزدیک دنیا کے سارے ظالم ایک ہی قبیلے کے لوگ ہیں اور سارے مظلوم بھی ایک ہی قبیلے کے ہیں۔ ظالم چاہے کشمیر، فلسطین، یمن یا پھرجہاں بھی ظلم کریں وہ ظالم ہیں اور مظلوم جہاں بھی ہوں وہ ایک ہی قبیلہ ہیں۔ اس بیچ میں وہ لوگ بھی ظالموں کے قبیلے سے تعلق رکھتے ہیں جو مظلوموں کے خون سے نوالے تر کر رہے ہیں۔ اُن کی مثال اُس گدھ جیسی ہے جو اس انتظار میں رہتا ہے کہ کب شیر کسی کا شکار کرے اور پھر وہ لاش کو بھنبھوڑ کر اپنا پیٹ بھرے۔ قارئین ایسے میں کسی سے مظوم کشمیریوں کے ساتھ ہمدردی کی امید رکھنا بالکل ایسے ہی ہے جیسے کہ مرزا غالب نے کہا تھا : ہم کو ان سے وفا کی ہے امید۔۔۔جو نہیں جانتے وفا کیا ہے

سانحہ تلمبہ ابھی بالکل تازہ تھا۔ مقتول کا کفن بھی میلا نہ ہوا تھا۔ اس کی کٹی ہوئی انگلیوں سے خون رِس رہا تھا۔میرے کالم کی سیاہی بھی ابھی خشک نہیں ہوئی تھی۔ گزشتہ کالم کو ابھی چند گھنٹے ہی گزرے تھے کہ ایک مرتبہ پھر ہماری قومی و سرکاری تربیت جیت گئی اور انسانیت شرما گئی۔ کالم میں خبر شامل کرتے ہیں شہر قائد کراچی سے۔ جہاں ہماری پروفیشنل تربیت ایک مرتبہ پھر جیت گئی اور انسانیت ایک مرتبہ پھر ہار گئی۔ گزشتہ روز کراچی میں اینکر پرسن اقرار الحسن کو حُبّ الوطنی کے انجیکشن لگائے گئے۔ اقرار الحسن نے اب تک ملک و قوم کے ساتھ کئی غداریاں کی تھیں۔انہوں نے کئی بڑے بڑے رشوت خوروں اور کرپٹ حضرات کو سرِعام بے نقاب کیا تھا۔ ظاہر ہے ملک میں بے نقابی اور بے حجابی پھیلنے اور پھیلانے کی سزا تو اُنہیں ملنی چاہیے ہی تھی۔ پھر انٹیلی جنس بیورو کا تو کام ہی یہی ہے۔ چنانچہ آئی بی کے اعلیٰ تربیت یافتہ کارندوں نے اپنی پروفیشنل ذمہ داری کو نبھاتے ہوئے اقرارالحسن اور ان کی ٹیم کے چودہ طبق روشن کر دئیے۔ کام تو سات طبق روشن کرنے سے بھی چل سکتا تھا لیکن بجلی کے جھٹکے لگا لگا کر اکٹھے چودہ طبق روشن کر کے بھرپور طریقے سے فرائضِ منصبی کو ادا کیا گیا۔

یہ چودہ طبق ایسے ہی روشن نہیں ہوئے۔ اس کے لئے پیٹی بھائیوں کا اکٹھ ضروری تھا۔ وہی اکٹھ جو ایسے ہر واقعے سے پہلے اور بعد کیا جاتا ہے۔ اب کسی نے تو اس بندہ گستاخ کا منہ بند کرنا تھا۔ اس کیلئے کسی کو تو چند دن کیلئے معطل ہونے ، تبادلہ ہونے وغیرہ کے نام پر اپنے پیٹی بھائیوں کیلئے قربانی دینی ہی تھی۔ اس مرتبہ قربانی دینے کا سہرا ڈائریکٹر آئی بی کے سر گیا۔

ہماری تو تاریخ ہی ایسی قربانیاں دینے والوں سے بھری ہوئی ہے۔ چند واقعات میں آپ کو یاد کروا دیتا ہوں۔ ہمارے دارالحکومت میں ایئرپورٹ سیکورٹی فورس کی اہلکاروں کا خواتین کو بالوں سے پکڑ کر تشدد کا نشانہ بنانا تو آپ کو یاد ہوگا۔[1]اسی طرح اسلام آباد میں ہی ایئرپورٹ سکیورٹی فورس ( اے ایس ایف) کے اہلکاروں کی مسافروں پر تھپڑ وں اور گھونسوں کی بارش بھی آپ کو یاد ہو گی۔[2] راولپنڈی میں اسامہ ستی کی گاڑی کی ونڈ اسکرین پر لگی گولیاں بھی آپ نہیں بھولے ہونگے۔[3] آپ کو اگر بھولنے کی بیماری ہو تو تب بھی آپ سانحہ ساہیوال کو تو نہیں بھول سکتے۔[4] اب سانحہ سیالکوٹ جیسے سانحات ، ڈیرہ اسماعیل خان جیسے اغوا برائے تاوان کے واقعات اور ملک بھر سے لاپتہ افرادکی بات تو ہم کرتے ہی نہیں ۔ ہم صرف یہ بتانا چاہتے ہیں کہ فریڈم نیٹ ورک نامی ادارہ صحافی حضرات کے حقوق کے حوالے سے کام کرتا ہے۔ اس ادارے کی رپورٹ یہ ہے کہ پاکستان میں مئی ۲۰۲۰ سے اپریل ۲۰۲۱ کے درمیانی ایک سال کے عرصے میں پاکستان کے اندر اس دوران پانچ صحافی لاپتہ ہوئے،سات قتل ہوئے، پچیس کی گرفتاریاں ہوئیں، ۱۵ کو اقرارالحسن کی طرح پھینٹی لگائی گئی، ستائیس پر مقدمے قائم کئے گئے۔مجموعی طور پر اس ایک سال میں صحافی برادری پر ۱۴۸ حملے ہوئے اور صحافیوں پر ہونے والے حملوں میں گزشتہ کی نسبت چالیس فیصد اضافہ ہوا ۔ یہ رپورٹ یہ ہوشربا انکشاف بھی کرتی ہے کہ صحافیوں کے خلاف ہونے والے ان ۱۴۸ حملوں میں سے ۵۱ حملے صرف سلام آباد میں ہوئے ہیں۔یعنی پاکستان کے اندر صحافیوں کیلئے سب سے غیرمحفوظ علاقے کا نام اسلام آباد ہے۔ سوچنے بولنے اور لکھنے والوں کو رام کرنے کیلئے اُن کے عزیزواقارب کے ساتھ جو کیاجاتا ہے اس کی تفصیل اس سے ہٹ کر ہے جیسے کہ ندیم گرگناری کے دونوں جواں بیٹوں کی ہلاکت وغیرہ وغیرہ ۔اسی طرح عزیز میمن کی مانند جن کی موت کو خودکُشی کہہ دیا جاتا ہےاب اُن کی فہرست کون بنائے۔

ان سارے واقعات و سانحات پر یہی ردّعمل سامنے آتا ہے کہ فلاں کو فوری برطرف، تحقیقاتی کمیٹی بنا دی گئی،معطل کر دیا گیا، نوٹس لے لیا گیا اور ایکشن ہو گیا وغیرہ وغیرہ۔۔۔

یہ برطرفیاں، نوٹس، ایکشن، تحقیقاتی کمیٹیاں اور بیانات سب کچھ پہلے سے لکھے گئے اسکرپٹ کے مطابق ہی ہوتا ہے۔ گزشتہ دنوں کرناٹک کی مسکان نامی لڑکی کی ویڈیو وائرل ہوئی۔ کسی نے کہا کہ مجھے تو یہ اپنے ملک کی طرح ایک لکھا لکھایا اسکرپٹ ہی لگ رہا ہے۔ اسکرپٹ والے بھائی کی بات سے ہمیں بھی کوئی انکار نہیں، ممکن ہے اسکرپٹ ہی ہو لیکن جو چیز ہمیں چونکا دینے کا باعث بنی وہ یہ ہے کہ گویا وہاں سکرپٹ میں یہ ہدایات موجود ہوتی ہیں کہ خبردار لڑکی کو چھونا تک نہیں اور یہاں یہ حکم ہوتا ہے کہ نشانِ عبرت بنا دو۔ ہر دور میں جہاں بونوں کو اختیارات مل جاتے ہیں وہاں بڑوں کو نشانِ عبرت بنا ہی دیا جاتا ہے۔ کوئی سانحہ سیالکوٹ و سانحہ تلمبہ اور کوئی لیاقت علی خان، مشال خان، قاری سعید چشتی، ابصار عالم، اسد طور، عزیز میمن، ڈاکٹر چشتی مجاہد، حسنین شاہ، ذیشان بٹ، حامد میر، مطیع اللہ جان اور اقرارالحسن و ذہنی معذور صلاح الدین کی طرح کی طرح نشانِ عبرت بن جاتا ہے ۔

آپ انسان کُشی کے مرض میں مبتلا اداروں اور لوگوں کو طالبانائزیشن، مافیاز، شدت پسند، اورقانون کے مجرم وغیرہ وغیرہ جو بھی الزام دیں لیکن ہر نشانِ عبرت بننے والا اپنے پیچھے ہماری اجتماعی اور پیشہ وارانہ تربیت پر کئی سوالات چھوڑ جاتا ہے۔ سانحہ سیالکوٹ ہو یا سانحہ تلمبہ ، ذہنی مریض صلاح الدّین ہو یا اینکر پرسن اقرارالحسن ، مضروبین کی حالت دیکھ کر یہ سوال خود بخود اٹھنے لگتا ہے کہ آپ نے مارنا کہاں سے سیکھا ہے؟ زخموں کے نشاں بتاتے ہیں، درندگی کے اسالیب بیان کرتے ہی، سفاکیّت خود چیختی ہے، لاقانونیت اعلان کرتی ہے اور تشدد کے مناظر چیخ چیخ کر بتاتے ہیں کہ بونے مختلف ہوتے ہیں لیکن بڑوں کے مدِّ مقابل ایک ہوتے ہیں۔ جہاں بونوں کا سماج ہو وہاں بڑوں سے جینے کا اختیار چھین لیا جاتا ہے۔

https://urdu.geo.tv/latest/164259

https://www.dawnnews.tv/news/1113104/

https://www.bbc.com/urdu/pakistan-55560517

https://www.dawnnews.tv/news/1113167

کشمیر کے مستقبل کا فیصلہ صرف کشمیری ہی کریں گے۔ یہ فیصلہ کرنا کشمیریوں کا انسانی اور فطری حق ہے۔ جب تک کشمیریوں کو یہ حق نہیں ملتا، اس وقت تک اس منطقے میں تعمیری، اقتصادی اور ترقیاتی منصوبوں کی کوئی پائیدار ضمانت نہیں۔ اگر کشمیریوں کو اُن کا حق خود ارادیت نہیں دیا گیا تو اس سے کشمیریوں کی تحریکِ آزادی دبے گی نہیں بلکہ اپنا رُخ تبدیل کر لے گی۔ اگر یہ تحریکِ آزادی منطقی راہِ حل کے بجائے غیر منطقی طور پر اپنا رُخ بدل لیتی ہے تو پھر اس منطقے کی تمام ریاستوں کو اس کا خمیازہ بھگتنا پڑے گا۔ اس منطقے کو آزادی دلانے کیلئے آزاد کشمیر کو کلیدی حیثیت حاصل ہے۔ اسی لئے آزاد کشمیر اور مقبوضہ کشمیر کے لوگوں کو رام کرنے کیلئے ہندوستان پھرپور انداز میں فعالیت کر رہا ہے۔ آیئے دیکھتے ہیں کہ گذشتہ چند دہائیوں میں کشمیریوں خصوصاً آزاد کشمیر پر ہندوستان کے ذرائع ابلاغ، پروپیگنڈوں اور ہندوستانی سیاست کے کتنے اثرات مرتب ہوئے ہیں اور یہاں کی مقامی آبادی اس وقت جدوجہد آزادی کیلئے کتنی تڑپ رکھتی ہے۔

آزاد کشمیر کی اہمیت:

جیسا کہ ہم جانتے ہیں کہ آزاد کشمیر دراصل جدوجہد آزادی کا بیس کیمپ ہے۔ اگر یہ کیمپ کمزور ہوگا تو جدوجہد آزادی پر براہِ راست منفی اثرات مرتب ہونگے، ہمیں اگر کشمیریوں کیلئے کچھ کرنا ہے تو آزاد کشمیر کے ذریعے سے ہی کچھ ہوسکتا ہے۔ 24 اکتوبر 1947ء کو آزاد کشمیر حکومت قائم ہوئی۔ بھارت باقی ماندہ کشمیر کو بچانے کے لئے یہ مسئلہ اقوام متحدہ میں لے گیا، اقوام متحدہ نے کشمیر میں استصواب رائے کا فیصلہ کیا، جسے پاکستان و ہندوستان دونوں نے تسلیم کیا۔ آزاد کشمیر حکومت کا اعلان دراصل مقبوضہ کشمیر کے بیس کیمپ کے طور پر کیا گیا تھا۔ اس ریاست نے ابھی تک چھبیس صدور کا دورانیہ گزارا ہے اور مجموعی طور پر آل جموں و کشمیر مسلم کانفرنس نے زیادہ عرصہ حکومت کی ہے۔ ایک زمانہ تھا کہ جب آزاد کشمیر میں ہر وقت مقبوضہ کشمیر کی وجہ سے درد و غم کا سماں طاری رہتا تھا، درسی کتابوں میں تاریخ کشمیر، مشاہیر کشمیر اور کشمیری تمدن اور تہذیب و ثقافت کو بڑے جوش و جذبے اور اپنائیت کے ساتھ پڑھایا جاتا تھا، نیز کشمیر بنے گا پاکستان کا نعرہ بچے بچے کی زبان پر ہوتا تھا، موجودہ صورتحال شاید کچھ مختلف ہے۔ عوام میں اب بھی مقامی طور پر کشمیر سے جذباتی لگاو تو موجود ہے، لیکن اس لگاو میں وہ پہلی سی آب و تاب نہیں رہی۔ آیئے بیس کیمپ میں سرد مہری کی وجوہات کا منصفانہ جائزہ لیتے ہیں۔

بیس کیمپ میں اس سردمہری کی چھ بنیادی وجوہات ہیں:

۱۔ ہندوستانی فلموں، ڈراموں اور گانوں کی یلغار

بلاشبہ ہندوستان کی فلم انڈسٹری دنیا کی موثر ترین فلم انڈسٹری ہے، پاکستان کی طرح ہندی فلمیں اور گانے آزاد کشمیر میں بھی مقبولیت عام کا درجہ رکھتے ہیں۔ کشمیر کے موضوع پر ہندوستان نے متعدد فلمیں بنائی ہیں، ان فلموں کے ذریعے ہندوستان رائے عامہ پر اثر انداز ہونے میں کافی حد تک کامیاب ہوا ہے۔ اس کے علاوہ فحش گانے اور لچر موسیقی ویسے بھی انسان سے دینی و قومی غیرت ختم کر دیتی ہے۔ چنانچہ ہندوستانی ڈراموں، فلموں، گانوں اور ثقافت کا اثر پبلک ٹرانسپورٹ، ہوٹلوں، گھروں اور شادی بیاہ میں عام دیکھنے کو ملتا ہے۔ لہذا اب بیس کیمپ میں حقِ خودارادیت کے نعروں اور آزادی کے ترانوں کی جگہ آشتی، پریم اور پیار کے سندیسوں نے لے لی ہے۔

۲۔ جہادی کیمپوں سے عوام کا متنفر ہونا

اس مسئلے نے شدت کے ساتھ تحریک آزادی کی ساکھ کو متاثر کیا۔ مقبوضہ کشمیر میں بعض شدت پسند ٹولوں نے اپنی آزاد عدالتیں لگا کر مقامی لوگوں کو ہندوستان کے لئے مخبری کے جرم کے شبے میں موت کے گھاٹ اتارا، جس سے لوگوں میں جہادی کیمپوں کے خلاف شدید نفرت کی لہر پیدا ہوئی اور ہندوستانی حکومت نے اس کو بھرپور انداز میں کیش کیا، اسی طرح آزاد کشمیر میں متعدد جگہوں پر جہادی کہلانے والوں نے پولیس کی پٹائی کی، بعض مقامات پر لوگوں کو اغوا کیا اور کچھ مقامی بااثر شخصیات حتی کہ ایم این اے وغیرہ کو بھی مارا پیٹا گیا۔ یہ وہ حقائق ہیں جو ارباب دانش سے پوشیدہ نہیں ہیں، لہذا ابھی بھی ضرورت ہے کہ کشمیر میں جہادی سرگرمیوں کو دہشت گردوں کی سرپرستی، اسلحے کی نمائش، فرقہ واریت، اغوا برائے تاوان اور شدت پسندی کی ڈگر سے ہٹایا جائے۔

۳۔ پاکستان میں فرقہ وارانہ قتل و غارت

یہ ایک حقیقت ہے کہ ہر انسان اس لئے قربانی دیتا ہے، تاکہ اس کے ہم فکر، ہم عقیدہ اور ہم وطن محفوظ رہیں، کوئی بھی شخص اس لئے اپنی جان نہیں قربان کرتا کہ اس کے بعد اس کے بچوں کو سکولوں میں گولیاں مار دی جائیں اور اس کے عزیزوں کے گلے کاٹے جائیں۔ پاکستان میں ہونے والے فرقہ وارانہ قتل و غارت نے بھی اہلِ کشمیر پر اثرات مرتب کئے ہیں۔ جیسا کہ ہم جانتے ہیں کہ کشمیر میں لوگوں کی ایک بڑی تعداد مقبوضہ کشمیر اور آزاد کشمیر کے درمیان منقسم ہے۔ جب لوگ پاکستان میں ٹارگٹ کلنگ، خودکش دھماکوں اور قتل و غارت کے واقعات سنتے اور دیکھتے ہیں تو وہ قطعاً یہ نہیں چاہتے کہ ہم اتنی قربانیاں دینے کے بعد ہندوستان کے کھشتریوں کی غلامی سے نکل کر پاکستان کے تکفیریوں کے غلام بن جائیں۔ کچھ سال پہلے تو آزاد کشمیر میں بھی صورتحال اتنی سنگین ہوگئی تھی کہ بعض شدت پسند حضرات پبلک ٹرانسپورٹ میں سوار ہو جاتے تھے اور ڈرائیور سے کہتے تھے کہ یہ کیسٹ لگاو، ان کیسٹوں میں مکمل فرقہ وارانہ تقریریں اور کافر کافر کے نعرے ہوتے تھے۔

بعد ازاں مظفر آباد کی امام بارگاہ میں خودکش دھماکے میں کئی لوگ شہید ہوئے۔ دھماکے کی تفصیلات کے مطابق ماتمی جلوس جب امام بارگاہ میں پہنچا تو خودکش حملہ آور جلوس میں شامل ہوگیا، تاہم جلوس میں جو رضا کار شامل تھے، انہوں نے اسے پہچان لیا اور اسے روکنے کی کوشش کی تو اس نے اپنے آپ کو دھماکے سے اڑا لیا۔ جس سے انسانی اعضاء اور گوشت کے چیتھڑے دور دور تک بکھر گئے۔ اسی طرح ٹارگٹ کلنگ نے بھی لوگوں کو چونکا دیا ہے۔ وقت کے ساتھ ساتھ شدت پسندوں نے پاکستان کے ساتھ ساتھ آزاد کشمیر میں بھی اپنا نیٹ ورک مضبوط کیا ہے۔ ہندوستانی ذرائع ابلاغ نے اس قتل و غارت کو خوب اچھالا، جس کے نتیجے میں مقبوضہ کشمیر اور آزاد کشمیر کے لوگ اب یہ سوچنے پر مجبور ہیں کہ پاکستان تو اس لئے بنایا گیا تھا کہ اس میں سارے مسلمان آزادی کے ساتھ زندگی گزاریں گے، لیکن اب تو یہاں کوئی عبادت گاہ، بچوں کے سکول، مساجد، چرچ، مندر اور عام شہریوں کی زندگی تک محفوظ نہیں۔

۴۔ نصابِ تعلیم

اقوام کی زندگی میں نصابِ تعلیم کو لوحِ محفوظ کی سی حیثیت حاصل ہے۔ اقوام کی تقدیر نصابِ تعلیم کے مرہونِ منت ہے۔ وقت کے ساتھ ساتھ آزاد کشمیر کے تعلیمی اداروں کا نصابِ تعلیم جدوجہدِ آزادی کی پٹڑی سے اتر چکا ہے۔ معیاری تعلیم کی آڑ میں آکسفورڈ اور کیمرج کے نام پر تاریخ کشمیر، کشمیریوں کے حقِ خود ارادیت، کشمیری مشاہیر اور شہداء نیز کشمیری ثقافت نیز تہذیب و تمدن کو تقریباً فراموش کر دیا گیا ہے۔ اب پاکستان کی طرح آزاد کشمیر کا نصابِ تعلیم بھی بہترین اقتصاد اور خوب کماو تک محدود ہے۔ چنانچہ اب جو نسل پروان چڑھ رہی ہے، اس نے بھی آئندہ اقتصادی منافع اور خوب کماو کی عینک سے ہی مسئلہ کشمیر کو دیکھنا ہے۔

۵۔ فکرِ معاش اور مہاجرت

پاکستان کی طرح آزاد کشمیر میں بھی فکرِ معاش سب کو دامن گیر ہے۔ یہاں کے لوگوں کی اکثریت روزگار کی تلاش میں عربی یا مغربی ممالک کا رخ کرتی ہے۔ اکثر اوقات فطری اور طبیعی طور پر یہ لوگ جہاں جاتے ہیں، وہیں کی بودوباش اختیار کر لیتے ہیں۔ جہاں محنت اور خدمت کرتے ہیں، وہاں کے روزمرہ مسائل میں ہی الجھ جاتے ہیں، اگرچہ دوسرے ممالک میں مقیم کشمیری اپنے کشمیری بھائیوں کے حقِ خودارادیت کیلئے جلسے، جلوس اور ریلیاں نکالتے رہتے ہیں، لیکن اُن کی اس فعالیت پر کشمیری ثقافت، سیاست اور تمدن کی چھاپ نہیں ہوتی۔ بعض جگہوں پر تو فنڈز ریزنگ کی خاطر ریلیاں وغیرہ فقط فوٹو سیشنز اور خانہ پُری کیلئے ہی نکالی جاتی ہیں۔

۶۔ سیاست میں اقربا پروری

آزاد کشمیر کی سیاست میں برادری ازم کو مرکزی حیثیت حاصل ہے، برادری کی چھتری کے نیچے ہی آپ کی شناخت قائم رہتی ہے۔ اگر آپ کے نام کے ساتھ کسی برادری کا سابقہ یا لاحقہ نہیں ہے تو آپ کچھ بھی نہیں ہیں۔ پاکستان کی طرح یہاں بھی آپ کی شخصیت کی میزان آپ کی برادری کو سمجھا جاتا ہے۔ چنانچہ یہاں بھی عام طور پر لوگ اپنی پہچان اپنے کردار و اخلاق کے ساتھ کروانے کی کوشش نہیں کرتے بلکہ اپنے ناموں کے ساتھ چودھری، راجہ، سید، شاہ، سردار، بٹ، آرائیں، ملک راجپوت، سدھن، وغیرہ وغیرہ لگا کر اپنی پہچان کرواتے ہیں۔ یہی یہاں کی سیاست کا بھی چلن ہے۔ یوں یہاں کی سیاست کا بھی کردار و اخلاق اور جدوجہد آزادی کے ساتھ کوئی سروکار نہیں، آزاد کشمیر کی سیاست میں داخل ہونے کے لئے کشمیر کی آزادی کا نام صرف ایک نعرے کے طور پر باقی ہے، جبکہ سیاست میں قدم رکھنا ہو تو یہاں برادری ازم کے علاوہ کوئی دوسرا دروازہ کھلا ہوا نہیں۔ چنانچہ جو لوگ سیاست میں چھا جاتے ہیں، وہ جدوجہد آزادی کے بجائے اقربا پروری میں ہی مصروف رہتے ہیں۔

نتیجہ:

ہندوستان اور پاکستان کی بقاء اور سلامتی کشمیر سے وابستہ ہے۔ حقِ خود ارادیت کشمیریوں کا فطری، پیدائشی اور جمہوری حق ہے۔ کشمیر کے مستقبل کا فیصلہ کرنے کا حق صرف کشمیری ہی رکھتے ہیں، اُنہیں یہ حق دلوانا ہر باشعور انسان کی انسانی، نظریاتی، اخلاقی اور سیاسی ذمہ داری ہے۔ ایسے میں پاکستان کیلئے بیس کیمپ یعنی آزاد کشمیر کی صورتحال پر نگاہ رکھنا بہت ضروری ہے۔ مذکورہ بالا عوامل کسی سے ڈھکے چھپے نہیں ہیں۔ ضروری ہے کہ پاکستان اور آزاد کشمیر کے عوام اور مقتدر ادارے ان عوامل کا جائزہ لیں اور تحریک آزادی کشمیر پر منفی اثرات مرتب کرنے والے عوامل کا قلع قمع کریں۔ کشمیر میں شہید ہونے والے لاکھوں شہداء کا خون ہم سے یہ تقاضا کرتا ہے کہ ہم بیداری اور بصیرت کے ساتھ ان کے خون کا تحفظ کریں اور ان کی جدوجہدِ آزادی کو منزلِ مقصود تک پہنچائیں۔
(سپورٹ کشمیر انٹرنیشنل فورم)

محمد گلزار حسین کا تعلق بہاولپور سے ہے۔ کبھی وہ گلزار حسین فکشن رائٹر کے نام سے لکھا کرتے تھے۔ وہی ہماری آشنائی کا دور تھا۔ یہ تو ہم جانتے ہی ہیں کہ علم و فکر کے جہان میں ستاروں سے آگے جہاں اور بھی ہیں۔ چنانچہ میرے سامنے ہی گلزار حُسین فکشن رائٹر سے ابو ولی اللہ خان بنے۔ لگتا ہے کہ ابھی عشق کے امتحاں اور بھی ہیں۔ یقینا ایسا ہی ہے ان دنوں وہ گورنمنٹ پرائمری سکول بدھاں نمبر۲ تحصیل خیرپورٹامےوالی میں بطورِ معلم ، خدمتِ خلق میں مصروف ہیں۔ انہیں مصروف ہی رہنا چاہیے چونکہ ایسا انسان کبھی ہاتھ پر ہاتھ دھرے نہیں بیٹھ سکتا جسے یہ یقین ہو جائے کہ تہی زندگی سے نہیں یہ فضائیں، یہاں سینکڑوں کارواں اور بھی ہیں۔
خصوصاً جو لوگ انسانیت، شرافت، عدالت، اخلاق اور صاف گوئی جیسی اعلیٰ انسانی اقدار سے مزیّن ہوتے ہیں وہ اس انسانی علمی و فکری رشتے کے متبادل کے طور پر دنیا کے کسی بھی دوسرے رشتے کو نہیں سمجھتے۔ یہی وہ رشتہ ہے جس کے ناطے مخلوقِ خدا کا تعلق خدا سے جُڑتا ہے،اسی رشتے کی پاسداری کیلئے انبیائے کرام مبعوث ہوئے اور اسی رشتے کی بقا کیلئے نواسہ رسولﷺ نے اپنا سب کچھ قربان کیا۔
اربابِ علم و دانش ہی اس امر کی تصدیق کر سکتے ہیں کہ ہدایت کے دو اہم وسیلے قلم اور کتاب ہیں۔ محمد گلزار حسین کو خدا نے قلم سے لکھنے کے ساتھ ساتھ کتاب پڑھانے کی توفیق بھی عطا کی ہے۔اسی توفیق کی بنا پر وہ پنجاب ٹیچرز یونین کے پلیٹ فارم سے بھی فعال ہیں۔ اُن کے بقول پنجاب ٹیچرز یونین کی بنیاد محسن اساتذہ استاد مرحوم عبدالغفور غفاری اور استاد مرحوم اللہ بخش قیصر صاحب نے رکھی۔ اس یونین کا مقصد اساتذہ ِ کرام کے حقوق کا دفاع، سماج میں ان کے مقام و مرتبے کا تحفظ اور پیشہ وارانہ ذمہ داریوں کی ادائیگی کے دوران انہیں درپیش مختلف مشکلات اور مسائل کے حل کیلئے سرگرمِ عمل ہے۔ محترم وحید مراد یوسفی بطور مرکزی صدر پنجاب ٹیچرز یونین اسی ایجنڈے پر کام کر رہے ہیں۔ گویا تنظیم کے مرکز اور صدر کا تعلق لاہور سے ہے۔ بہاولپور میں محمد گلزار حسین اس ذمہ داری کو نبھانے کیلئے سرگرم ہیں۔
یہ ایک مسلمہ حقیقت ہے کہ اگر آپ نے کسی بھی علاقے کی ترقی یا پسماندگی کا تخمینہ لگانا ہو تو وہاں کے اساتذہ کرام کی صورتحال کو دیکھ لیجئے، وہ جتنے مہذب، متمدّن،باشعور اور خوشحال ہونگے وہ علاقہ بھی اُسی تناسب سے مہذّب، متمدّن اور خوشحال ہوگا۔ جب ہم خوشحالی کی بات کرتے ہیں تو یاد رکھئے کہ ہم ایک ایسے سماج میں جی رہے ہیں جہاں باشعور اور مہذب آدمی کیلئے خوشحالی تو دور کی بات دو وقت کی روٹی کیلئے باعزّت روزگار بھی محال ہو گیا ہے۔
ہر طرف میرٹ کی پامالی، اقربا پروری، برادری ازم،رشوت ستانی اور دھونس کا دور دورہ ہے۔ ایسے میں اساتذہ ِ کرام جیسا محترم اور سفید پوش طبقہ بھی انتہائی مشکلات سے گزر رہا ہے۔ بہر حال مشکلات کی تاریکیوں میں شمعِ امید ہیں وہ لوگ جو تاریکی اور بادِ مخالف کے مقابل جلنے اور نور افشانی کی ہمت کرتے ہیں۔میں اپنے محترم محمد گلزار حسین اور اُن کی یونین سے منسلک دوستوں کیلئے اِن چند جملوں میں اپنے پیغام کو سمونا چاہتا ہوں کہ انسانی حقوق کا دفاع کرنا، سچائی کی آواز بننا، مظلوموں کی دادرسی کرنا، کمزوروں کو اُن کا حق دلانا، جہالت کے بتکدوں میں علم کی اذان دینا، یزیدوں کے معاشرے میں آزادی و حرّیتِ فکر کو پروان چڑھانا، اور بے شعور لوگوں کو اُن کے حقوق کا شعور دلانا۔۔۔یہ سب مشکل ہے بہت مشکل ہے، لیکن ان مشکلات سے آپ نے گھبرانا نہیں ہے۔۔۔وہ اس لئے کہ بادِ مخالف سے چھوٹے موٹے پرندے اور پتنگے گھبرایا کرتے ہیں شاہین نہیں۔ خدا نے آپ کو علم اور قلم کی صلاحیت سے نوازا ہے، آپ جیسے دوست ہی فرعونوں کے مقابلے میں اقبالؒ اور قائداعظم ؒ کے شاہینوں جیسا کردار اداکر سکتے ہیں۔بس حکیم الامّت کی اس نصیحت کو گرہ لگا کر باندھ لیجئے:
ہزار خوف ہو لیکن زباں ہو دل کی رفیق۔۔۔یہی رہا ہے ازل سے قلندروں کا طریق
ہجوم کیوں ہے زیادہ شراب خانے میں۔۔۔فقط یہ بات کہ پیرِ مغاں ہے مرد خلیق

nazarhaffi@gmail.com