قومی

آج کل کے دور میں ہر دوسرے شخص کو سردرد کا مسئلہ لاحق رہتا ہے جس کی بہت سی وجوہات ہوسکتی ہیں۔سب سے عام وجہ گرمی کی شدت اور اسکرین (ٹی وی، موبائل اور کمپیوٹر) کا استعمال ہے جس کے باعث سردرد آج کل ہر عمر کے انسان میں عام ہے۔
دفتر میں دیر تک کمپیوٹر اسکرین پر کام کرنا دماغ اور آنکھوں کو تھکا دیتا ہے جو کہ سردرد کا باعث بنتا ہے جبکہ آج کل بچے موبائل اور ٹیب پر زیادہ وقت گزارتے ہیں جو ان کے لئے سردرد کا باعث بنتا ہے۔اس سردرد سے نجات کے لئے ڈاکٹر مہنگی دوائیاں دیتے ہیں جو کافی نقصان دے ہوسکتی ہیں، اس لئے ہم آپ کو نہایت آسان اور آزمودہ ٹوٹکا بتائیں گے جو سردرد سے نجات میں مدد فراہم کریگا۔
بغیر گولی سر درد کا علاج
برف کی ڈلیاں پانی میں ڈال دیں اور جب پانی برف کی ڈلیوں کی مدد سے ٹھنڈا ہوجائے تو اپنے دونوں ہاتھ جتنی دیر تک رکھ سکتے ہیں اندر رکھیں۔اس دوران اپنے ہاتھوں کی مُٹھی بنالیں اور انہیں متواتر کھولنے اور بند کرنے کا عمل کریں اور ایسا کرنے سے پانچ منٹ کے اندرآپ سر درد سے نجات پالیں گے۔

ہندوستان کو یہ حقیقت قبول کرنی چاہیے کہ جو آزادی کیلئے اٹھ کھڑا ہوتا ہے اُسے غلام نہیں رکھا جا سکتا۔سپورٹ کشمیر انٹرنیشنل فورم کے اکتیسویں آنلائن سیشن سے ڈاکٹر شفقت شیرازی کی گفتگو۔انہوں نے کہا کہ آزادی کشمیریوں کا بنیادی اور مسلمہ حق ہے۔ ہندوستان کو انسانی حقوق کا احترام کرتے ہوئے یہ حق تسلیم کرنا چاہیے۔ سیشن کے دوران ہندوستانی تعصب کے حوالے سے ڈاکٹر شفقت شیرازی نے ایک سوال کے جواب میں کہا کہ استعمار نے برّصغیر پاک و ہند میں عدم تحمل اور نفرت کا بیج بویا۔۱۸۵۷ سے پہلے ہمارے ہاں ادیان و مذاہب تو تھے لیکن کینہ اور شدّت پسندی نہیں تھی۔۱۹۲۰ سے باقاعدہ ہمارے ہاں شدّت پسندوں کی نرسریاں لگانے کا کام شروع ہوا۔ ۱۹۲۶ کے بعد ہندووں میں آر ایس ایس جیسی تنظیم کی بنیاد رکھی گئی اور انھوں نے اردو مخالف کام شروع کیا۔ آج آر ایس ایس کی تعداد ۵ سے ۶ میلیون تک پہنچ چکی ہے ۔
اسی طرح پاکستان میں جو متشدد فکر کے حامل مسلح لشکر، ٹولے اور سپاہیں موجود ہیں یہ بھی اسی دور کی پیداوار ہیں۔ برطانوی سامراج کے بعد ہمارے ہاں بھی یہی متشدد لوگ پھلتے پھولتے رہے ۔ چنانچہ آج ہندوستان و پاکستان دونوں طرف شدت پسندی کا راج ہے۔
اگر ہندوستان میں آج آر ایس ایس کی حکومت ہے تو پاکستان کے کلیدی اداروں پر بھی شدت پسندوں کا قبضہ ہے۔اس کی واضح مثال پاکستان میں نصاب کی آڑ میں شدّت پسندی کا فروغ ہے۔
اگر ہندوستان میں بابری مسجد کو شہید کیا جاتا ہے تو پاکستان میں بھی روزانہ مساجد پر حملے ہوتے ہیں۔ کشمیری عوام کو ان کا حق خود ارادیّت نہ دینا یہ بھی ہندوستان کی متشددانہ سوچ ہے۔کشمیر دینی، ثقافتی اور آئینی لحاظ سے پاکستان کا حصّہ ہے لیکن ہندوستان کی متشدد قوّتیں کشمیریوں کو ان کے بنیادی حق سے محروم کئے ہوئے ہیں۔ ہندوستان کا یہ متعصبانہ اور شدت پسندانہ رویہ اس منطقے میں سارے مسائل کی بنادی وجہ ہے۔ ہندوستان کو یہ حقیقت قبول کرنی چاہیے کہ جو آزادی کیلئے اٹھ کھڑا ہوتا ہے اُسے غلام نہیں رکھا جا سکتا۔

پاکستان فلم و ٹی وی انڈسٹری کے معروف اداکار و میزبان فہد مصطفیٰ بھی اداکارہ ثناء جاوید کا ساتھ دینے میدان میں آگئے۔

مائیکرو بلاگنگ سائٹ ٹوئٹر پر فہد مصطفیٰ نے ثناء جاوید کے ہمراہ اپنی تصویر شیئر کی اور ساتھ ہی اداکارہ کے لیے حمایتی پیغام بھی لکھا۔فہد مصطفیٰ نے اپنے ٹوئٹ میں کہا کہ میں نے ثناء جاوید کے ساتھ مختلف پراجیکٹس پر کام کیا ہے اور وہ پچھلے 2 سالوں سے میرے شو کا حصہ ہیں اور ان دنوں میں نے انہیں ناصرف اپنے ساتھ بلکہ اپنی ٹیم کے ساتھ بھی انتہائی پروفیشنل اور شائستہ پایا۔

اداکار نے ثناء جاوید کے لیے مزید نیک خواہشات کا اظہار بھی کیا۔خیال رہے کہ پاکستانی فلم و ڈرامہ اداکارہ ثناء جاوید کے نامناسب رویے سے متعلق سوشل میڈیا پر اس وقت شوبز انڈسٹری کے دیگر فنکاروں کی جانب سے کی جانے والی متعدد پوسٹس وائرل ہیں۔

ثناء جاوید کے لیے سوشل میڈیا پر متعدد شوبز انڈسٹری کی شخصیات اپنے ناگوار تجربات سے متعلق پوسٹس شیئر کر کے اُن کے چھپے ہوئے دوسرے چہرے سے پردہ اٹھا رہے ہیں جن پر انٹرنیٹ صارفین حیران و پریشان نظر آ رہے ہیں۔دوسری جانب ثنا جاوید نے معروف شخصیات کی جانب سے منفی رویے کے حوالے سے لگائے جانے والے الزامات پر قانونی کارروائی کا آغاز کردیا ہے۔

شہرِ اقتدار، اسلام آباد میں اپنے جیالوں سے خطاب کے دوران بلاول بھٹو زرداری کی زبان کیا پھسلی سوشل میڈیا پر میمز کا سیلاب ہی آ گیا جس کا سلسلہ تا حال جاری ہے۔

بلاول بھٹو زرداری کی جانب سے کہے گئے جملے ’کانپیں ٹانگ رہی ہیں‘ پر شعر و شاعری، میمز اور لطیفے بننے کے بعد اب اس اُلٹے ہی مگر دلچسپ لفظ پر جنرل اسٹور بھی کھُل گیا ہے۔جی ہاں، جس طرح پاکستان میں ہر مشہور ڈرامے، کردار کے نام پر پاپڑ اور نسوار ملنا شروع ہو جاتی ہے ویسے ہی اب بلاول بھٹو کی جانب سے ادا کیے گئے اس لفظ پر کریانہ جنرل اسٹور کا بھی افتتاح کر دیا گیا ہے۔سوشل میڈیا پر وائرل ہوتی اس پوسٹ میں ’کانپیں ٹانگ‘ کے نام سے سپر جنرل اسٹور کو دیکھا جا سکتا ہے جبکہ اتنا ہی نہیں اس پوسٹ کے کمنٹ باکس میں انٹرنیٹ صارفین کی جانب سے ’کانپیں ٹانگ‘ کے نام سے پاپڑ بھی مارکیٹ میں لانے کا مطالبہ کیا جا رہا ہے۔

کیٹل پوکس یا لمپی وائرس کے حوالے سے ماہرین نے لوگوں کو خبردار کیا ہے کہ گائے کا گوشت اور دودھ نہ لیں۔ماہرین کا کہنا ہے کہ کیٹل پوکس یا لمپی وائرس گائے کو تیزی سے متاثر کر رہا ہے۔انہوں نے کہا کہ پاکستان میں ایسا وائرس پہلے کبھی رپورٹ نہیں ہوا ہے۔واضح رہے کہ سندھ بھر میں گائے، بیل بھینسوں میں جلدکی بیماری لمپی وائرس پھیل جانےسے مویشی بیمار ہو رہے ہیں ۔ڈائریکٹر جنرل لائیو اسٹاک سندھ نظیر احمد کلہوڑو کاکہنا ہے کہ لمپی اسکن ڈیزیز سے مویشی کی کھال میں چیچک کی طرح زخم ہو رہے ہیں جبکہ وائرس میں مبتلا مویشیوں میں دودھ اور وزن کی کمی واقع ہو رہی ہے۔

انہوں نے کہا کہ امکان ہے کہ لمپی اسکن وائرس شاید ایران ،انڈیا سمیت دیگر ممالک سے آئے مویشیوں کے ذریعے پھیلا ہو تاہم اس کی تحقیق جاری ہے ۔ان کاکہنا تھا کہ لمپی وائرس مچھر اور مکھی کے کاٹنے سے دوسرے صحت مند جانوروں میں پھیل رہا ہے تاہم لمپی وائرس میں مبتلا مویشیوں میں شرح اموات 2 فیصد ہے ۔ڈائریکٹر جنرل لائیو اسٹاک سندھ نے بتایا کہ انسداد لمپی وائرس ویکسین کے ذریعہ مویشیوں کو محفوظ کیا جاسکتا ہے ۔

سندھ ہائی کورٹ نے وفاقی تحقیقاتی ادارے ایف آئی اے سے متعلق بیان کے خلاف کیس کی سماعت کرتے ہوئے ٹک ٹاکر حریم شاہ کو 18 اپریل تک ایف آئی اے کے سامنے پیش ہونے کا حکم دے دیا۔سرکاری ادارے کے خلاف نازیبا الفاظ پر سندھ ہائی کورٹ نے حریم شاہ پر اظہارِ برہمی بھی کیا۔عدالتِ عالیہ نے حریم شاہ کو حکم دیا کہ انکوائری کے لیے پیش ہوں ورنہ حکم نامہ واپس لے لیں گے۔سندھ ہائی کورٹ نے اپنے حکم میں مزید کہا کہ منی لانڈرنگ کے الزام کا تعین کرنا ایف آئی اے کا کام ہے۔دورانِ سماعت حریم شاہ کے وکیل نے عدالت کو بتایا کہ حریم شاہ معافی مانگ چکی ہیں اور وہ منی لانڈرنگ میں ملوث نہیں ہیں۔واضح رہے کہ سیاستدانوں اور سیلیبریٹیز کے ساتھ متنازع ویڈیو بنا کر شہرت حاصل کرنے والی فضا حسین عرف حریم شاہ نے رواں برس جنوری میں برطانیہ کے دارالحکومت لندن میں غیر ملکی کرنسی کے بنڈلز کے ساتھ ایک ویڈیو بنائی تھی۔
ویڈیو میں انہوں نے دعویٰ کیا تھا کہ وہ پاکستان سے بھاری رقم لے کر برطانیہ آئی ہیں لیکن انہیں کسی نے بھی نہیں روکا اور نہ ہی انہیں کوئی روک سکتا ہے۔حریم شاہ نے ویڈیو میں کہا تھا کہ دوسرے لوگ ایسا کام کرتے ہوئے احتیاط کریں کیونکہ غریب پکڑا جاتا ہے۔ٹک ٹاکر کی جانب سے ویڈیو میں پاکستانی اداروں کا تمسخر بھی اڑایا گیا تھا۔ویڈیو سامنے آنے پر وفاقی تحقیقاتی ادارے (ایف آئی اے) نے حریم شاہ کے خلاف منی لانڈرنگ کی تحقیقات شروع کر دی تھیں۔معروف ٹک ٹاکر حریم شاہ ایف آئی اے کی جانب سے منی لانڈرنگ کی تحقیقات کی خبر چلتے ہی اپنے بیان سے مکر گئی تھیں اور کہا تھا کہ رقم اسمگل نہیں کی، بس ویڈیو بنائی۔ایف بی آر نے بھی حریم شاہ کے ٹیکس معاملات کی تحقیقات شروع کر دی تھیں۔