نذر حافی

خانم کونیکو کا تعلق جاپان سے ہے۔ جنگ اُنہیں سخت ناپسند ہے، انہوں نے اپنے بچپن میں ہیروشیما اور ناگاساکی کے مناظر دیکھ رکھے ہیں، انہیں جنگ کی وحشت، دربدری اور نہتے لوگوں کی موت کا پہلے سے تجربہ ہے۔ اُنہیں پتہ ہے کہ جنگ میں غذائی قلت کا اژدھا کیسے پھنکارتا ہے۔ وہ ایک بودایی خاندان میں پیدا ہوئیں تو اُن کی ماں اور باپ نے ان کا نام کونیکو رکھا۔ کونیکو ایک جاپانی لفظ ہے۔ جاپانی میں کونیکو یعنی وطن کی بیٹی۔ جاپان دنیا کی وہ پہلی جگہ ہے، جہاں سورج سب سے پہلے طلوع ہوتا ہے۔ اسی لئے جاپان کو سرزمین خورشید بھی کہتے ہیں۔ دوسری جنگ عظیم کی ایک خوفناک رات کا واقعہ ہے۔ اس رات سورج کی دھرتی راکھ کے ڈھیر میں تبدیل ہوگئی تھی۔ دس مارچ 1945ء کو طلوعی خورشید سے دو گھنٹے پہلے، جاپان کے شہر ٹوکیو پر 325 امریکی جنگی جہازوں نے تین گھنٹے مسلسل بارود کی بارش برسائی۔ بارود کی اِس بارش کے لئے گنجان آباد علاقے کا انتخاب کیا گیا تھا۔ کچھ ہی دیر میں بارود نے ساٹھ فی صد آبادی اور رقبے کو بھسم کرکے رکھ دیا۔

ان تین گھنٹوں میں ایک لاکھ انسان صفحہ ہستی سے مٹ گئے، جبکہ دس لاکھ زخمی اور بے گھر ہوئے۔ اسی طرح 1946ء میں جب ہیرو شیما اور ناگا ساکی پر ایٹم بم پھینکے گئے تو کونیکو نے انتہائی کم سنی میں ان حوادث کا مشاہدہ کیا۔ جب امریکی فوجی جاپان میں ایٹم بم سے کوئلہ بن جانے والے انسانوں کو دفنا رہے تھے تو اس وقت خانم کونیکو اس تاریخی جرم کو نزدیک سے دیکھ رہی تھیں۔ یہ وہی زمانہ تھا جب جاپان میں امریکی فوجی، جاپانی لڑکیوں کو جسم فروشی کی ترغیب دینے میں مصروف تھے۔ کونیکو نے امریکی و مغربی سماج کے اس زہر کو اپنے وطن میں سرایت کرتے ہوئے بھی دیکھا۔ خانم کونیکا میدانِ جنگ میں جاپانی خواتین کے حوصلوں کی بھی عینی شاہد ہیں۔ یہ اُن کے سامنے کا واقعہ ہے کہ جب جاپانی عورتوں نے اپنے بالوں سے ستر ستر میٹر لمبی اور تیس تیس سینٹی میٹر موٹی رسیاں بٹی تھیں۔ ان رسیوں کو جاپانی جنگجو جہاز باندھنے کیلئے استعمال کرتے تھے۔

وقت پر لگا کر اڑتا رہا، وہ پرائمری سکول سے ہائی سکول اور ہائی سکول سے کالج میں پہنچ گئیں۔ اب یہ عمر، ان کی شادی کی تھی۔ انہوں نے گھریلو مہارتیں سیکھنے کیلئے انگلش بھی سیکھ لی، انگریزی زبان سکھانے کے ایک ادارے میں اُنہوں نے ایک آدمی کو عجیب و غریب حرکات کرتے دیکھا، استفسار پر پتہ چلا کہ وہ ایک ایرانی تاجر ہے اور نماز پڑھ رہا ہے۔ اس تاجر سے ملاقات نے کونیکو کی زندگی میں طلاطم برپا کر دیا۔ بعد ازاں اسی تاجر سے خانم کونیکو نے شادی کر لی۔ بدھ مت سے مسلمان ہونے کے بعد وہ اپنا سب کچھ ترک کرکے ایران چلی گئیں۔ ایران میں ایک جدوجہد بھری زندگی نے ان کا ستقبال کیا۔

رضا شاہ پہلوی کے دور میں اسلامی انقلاب کی تحریک میں انہوں نے اپنا حصہ ڈالا، یہ انقلاب کامیاب ہوا تو وہ اس کی مضبوطی اور پائیداری کیلئے سرگرم ہوگئیں۔ انہیں ایران پر ہونے والے صدامی حملے میں اپنے بیٹے کی قربانی دینے کا اعزاز بھی حاصل ہے. یوں وہ واحد جاپانی خاتون ہیں، جنہیں ایک شہید کی ماں کے طور پر ایران میں پہچانا جاتا ہے۔ ایران میں اُن کا افتخار صرف ایک شہید کی ماں ہونا ہی نہیں بلکہ آج بھی وہ اپنے سارے وجود کے ساتھ دینِ اسلام کی خدمت کرنے میں مصروف ہیں۔ اگر آج کے زمانے میں کسی نے ہجرت کے مقدس مفہوم کو کسی کے وجود میں دیکھنا ہو تو وہ خانم کونیکو یاما مورا کو دیکھ لے۔

اٹھہتر سالہ خانم کونیکو یاما مورا آج بھی تہران میں مقیم ہیں۔ ان کی زندگی ایک سبق آموز زندگی ہے۔ اس کا مطالعہ ہمیں دینِ اسلام کی آفاقیت کی یاد دلاتا ہے۔ وہ لوگ جو دینِ اسلام کی خاطر اپنی ہر چیز چھوڑ دیتے ہیں، دین کی اصطلاح میں انہیں مہاجر کہا جاتا ہے۔ خانم کونیکا ایک مہاجر ہیں، ان کی ہجرت دو عناصر پر مشتمل ہے، ایک توفیقِ خداوندی اور دوسرا مضبوط ارادہ۔ خانم کونیکو نے سورج کی سرزمیں سے اسلام کے آسماں کا سفر انہی دو پروں کے ساتھ کیا ہے۔ یہی دو عناصر ہیں جنہوں خانم کونیکو کو سبأ بابایی بنا دیا۔ سبا کا اسم انہوں نے قرآن مجید میں مذکور ملکہ سبا سے لیا اور بابائی ان کے ایرانی شوہر کا خاندانی نام ہے۔

گزشتہ شب سپورٹ کشمیر انٹرنیشنل فورم کا بارہواں آن لائن سیشن ہوا۔ قاری قرآن محترم مصطفی اکبری نے قم المقدس ایران سےتلاوتِ قرآن مجید کے ساتھ سیشن کا آغاز کیا۔ انہوں نے انتہائی خوبصورت لحن میں جہاد اور مقاومت کی مناسبت سے کتابِ خدا کی آیات پڑھ کر سنائیں۔ یہاں پر یہ بتانا ضروری ہے کہ اس فورم کے زیرِ اہتمام گزشتہ گیارہ سیشنز میں تنازعہ جموں و کشمیر کے متعدد خدشات اور امکانات پر بحث ہو چکی ہے۔ خصوصاً یہ جاننے کی کوشش کی گئی ہے کہ اس مسئلے کا نظریاتی سرچشمہ کہاں ہے؟ اس منطقے کا جغرافیائی حدود اربعہ کتنا ہے؟ مقبوضہ جموں و کشمیر میں جاری جدو جہد آزادی کو کیا خدشات لاحق ہیں اور اس مسئلے کے حل کیلئے کتنے فیصد امکانات موجود ہیں؟ یہ کتنی جغرافیائی اکائیوں میں تقسیم ہو چکا ہے؟ پاکستان اور ہندوستان کیلئے کشمیر اہم کیوں ہے؟ کشمیر پاکستان کی ضرورت ہے یا کشمیر کی تکمیل پاکستان کے ساتھ ہوتی ہے؟ اس تنازعے کے بارے میں پاکستان اور ہندوستان کا کیا موقف ہے؟ خود کشمیری اس مسئلے کو کس نگاہ سے دیکھتے ہیں؟ عالمی برادری اس مسئلے میں کس قدر دلچسپی رکھتی ہے؟اقوامِ متحدہ کی قرارددیں کس حد تک مفید ہیں؟ اس وقت مقبوضہ کشمیرمیں انسانی حقوق کی پامالی کا کیا عالم ہے؟ اس مسئلے کے حل کیلئے اب تک کیاکچھ سفارتی و سیاسی اور عسکری اقدامات سامنے آئےہیں؟

بارہویں سیشن میں یہ مباحث ایک نئے مرحلے میں داخل ہو گئی ہیں۔ اب یہ جاننے کی کوشش کی جائے گی کہ کشمیرکی جدوجہدآزادی کو اب تک کس چیز نے زندہ رکھا ہوا ہے؟ کشمیریوں کی زندگی میں نظریے کی کیا اہمیت ہے؟ اس وقت کشمیر میں نظریاتی انتشار کس سطح کو چھو رہا ہے؟ اس نئے مرحلے میں قائداعظم محمد علی جناح، علامہ محمد اقبال، چوہدری غلام عباس، شیخ عبداللہ،مقبول بٹ شہید، آنجہانی گاندھی اور مسٹر نہرو کے کشمیر کے حوالے سے نظریات کو سمجھنے کی کوشش کی جائے گی۔

اس نئے مرحلے کا پہلا تجزیہ محترم ڈاکٹر ساجد خاکوانی صاحب نے جمعرات کی شب پاکستانی وقت کے مطابق ساڑھے آٹھ بجے شروع کیا۔انہوں نےاپنی گفتگو کو مندرجہ زیل تین حصوں میں تقسیم کیا۔ پہلے حصے میں انہوں نے قائداعظم محمد علی جناح کے ایمان کی پختگی، کردارکی بلندی اور نظریات کی بالیدگی کا جائزہ لیا۔ دوسرے حصے میں انہوں نے پاکستان کے نظریاتی جغرافیے پرروشنی ڈالی، اور تیسرے حصے میں جموں و کشمیر کے نظریاتی پسِ منظر کو بیان کیا۔

انہوں نے قائداعظم کی زندگی پر متعدد شواہد لاکر پہلے یہ ثابت کیا کہ وہ سیکولر کے بجائے ایک دیندار شخصیت کے مالک تھے۔ انہوں نے کہا کہ قائداعظم محمد علی جناح کو سیکولر کہنا اغیار کا ایجنڈہ ہے۔ ان کے تجزیے کے مطابق قائداعظم کی زندگی دینی و مذہبی تعلیمات کی عکاس ہے۔ انہوں نے اپنی ساری زندگی میں کبھی دین کا دامن ہاتھ سے نہیں چھوڑا۔ اس پر انہوں قائداعظم کی شادی اور ان کی بیٹی کے ساتھ اختلافات کو بھی بطورِ ثبوت بیان کیا۔

اس مقدمے کے بعد انہوں نے پاکستان کی ریاستِ مدینہ کے ساتھ بہت زیادہ شباہتیں بیان کیں۔ ان شباہتوں کے تناظر میں ان کا کہنا تھا کہ قائداعظم محمد علی جناح ایک اسلامی و نظریاتی قائد تھے اور پاکستان ایک اسلامی و نظریاتی سلطنت ہے۔ ان کا کہنا تھا کہ قیامِ پاکستان کسی اتفاق یا حادثے کا نتیجہ نہیں بلکہ یہ کارخانہ قدرت کی حکمتِ عملی اور کرشمہ سازی ہے۔

قائداعظم اور پاکستان کے نظریات پر بات کرنے کے بعد انہوں جموں و کشمیر کے نظریاتی دھارے کا تجزیہ کیا۔ انہوں نے کہا کہ کشمیر میں جاری جنگ نظریہ پاکستان، نظریہ قائداعظم یعنی دینِ اسلام کے خلاف جنگ ہے۔ ان کے تجزیے کے مطابق یہود و نصاری اپنے آپ کو بظاہرسیکولر اور لبرل کہہ کر در پردہ اسلام کےخلاف نبردازما ہیں۔ انہوں نے کشمیر کو بھی یہود و ہنود اور نصاری کی طرف سے کھڑا کیا گیا مسئلہ قرار دیا۔ انہوں نے بطورِ ثبوت کہا کہ وائسرائے ہند لارڈ ماونٹ بیٹن ۲۶ جون ۱۹۴۷ کو خود کشمیر گیا۔ وہاں اس نے مہاراجہ ہری سنگھ کے ساتھ طولانی نشستوں میں کشمیر کو غلام رکھنے کے حوالے سے منصوبہ بندی کی، اس منصوبہ بندی کے ذریعے انہوں نے ہندوستان اور پاکستان کو لڑوا لڑوا کر کمزور کرنے کا ہدف بھی مد نظر رکھا۔ انہوں نے کہا کہ پٹھانکوٹ اور گورداس پور کے علاقے ہندوستان کو صرف کشمیر تک رسائی دینے کیلئے دئیے گئے۔ اس موقع پر انہوں نے یہود و نصاری اور ہنود کے گٹھ جوڑ کی کئی مثالیں بھی پیش کیں۔

ان کی گفتگو کے مطابق جموں و کشمیر سمیت سارے جہانِ اسلام کے اس وقت تین اہم مسئلے ہیں۔ ایک یہ کہ مسلمانوں میں اتحاد کا فقدان ہے۔ ہمارے حکمرانوں کی وحدتِ اسلامی کی طرف توجہ نہیں۔ ہمارے ہاں اتحاد کی کہانیاں تو بہت سنائی جاتی ہیں لیکن حکومتی سطح پر اسے اہمیت نہیں دی جاتی۔ دوسری بڑی وجہ یہ ہے کہ آج مسلمانوں کے پاس قائداعظم کی طرح کی کوئی قدآور اور جامع سیاسی قیادت نہیں ہے۔ تیسری اور اہم وجہ انہوں نے یہ بیان کی کہ مسلمانوں کے درمیان مشترکہ دفاع کی کوئی منصوبہ بندی نہیں ہے۔ان کا کہنا تھا کہ جہانِ اسلام کو ترجیحی بنیادوں پر ان مسائل کو حل کرنے کی کوشش کرنی چاہیے۔ جاری ہے۔۔۔

۴ جنوری ۲۰۲۱ کو ایران کے شہر قم المقدس میں ایک انٹرنیشنل کشمیر کانفرنس منعقد ہوئی، کانفرنس کا مقصد کشمیریوں کی آزادی کی جدوجہد کی حمایت کرنا تھا۔ کانفرنس سے آنلائن خطاب پاکستان سےمرکزی امیرجماعت اہل حرم مفتی گلزار احمد نعیمی صاحب نے کیا۔ اس موقع پر مفتی صاحب نے انتہائی مدلل انداز میں اسلام کی آفاقیت کو بیان کیا۔ اُن کی گفتگو کا خلاصہ یہ ہے کہ اسلام ایک کامل دین ہے اور مسلمان جسدِ واحد کی مانند ایک قوم ہیں۔ اگردنیا کے کسی بھی خطے میں مسلمانوں پر ظلم ہوتا ہے تو اس کا درد سارے مسلمانوں کو محسوس کرنا چاہیے۔ فلسطین اور کشمیر کے مسلمانوں کی مدد و نصرت کیلئے عرب و عجم سے صدائیں بلند ہونی چاہیے۔ اگر کشمیر میں ہونے والے ظلم سے ہم بے تاب نہیں ہوتے تو ہمیں اپنے ایمان اور مسلمان ہونے پر شک کرنا چاہیے۔

اگر ہم توجہ فرمائیں تو محترم مفتی گلزار احمد نعیمی صاحب نے اپنے خطاب میں ہمیں نظریہ پاکستان کی ہی یاد دہانی کرائی ہے۔اُمت مسلمہ کے ایک ملت ہونے کا یہی وہ نظریہ ہے جس کی بنیاد پر مسلمانوں نے پاکستان کو حاصل کیا تھا، اور اسی نظریے کو عملی جامہ پہنانے کیلئے کشمیر کے مسلمان آج تک قربانیاں دیتے آرہے ہیں۔ کشمیر کے مسلمانوں کا یہی مطالبہ ہے کہ وہ بحیثیت مسلمان ایک قوم ہیں اور بحیثیت مسلمان قوم انہیں ہندوستان کی غلامی قبول نہیں۔ جس غلامی سے نجات کیلئے پاکستان بنایا گیا تھا، کشمیری بھی اسی غلامی سے نجات کیلئے جدوجہد کر رہے ہیں۔

مسلمانوں کی علیحدہ قومیت کا نظریہ کوئی جذباتی یا غیر سنجیدہ نظریہ نہیں ہے۔ اس نظریے کے پیچھے قرآن و سنت کی تعلیمات کا سمندر موجزن ہے۔ نظریہ پاکستان یا دوقومی نظریے کے تینوں اہم رہنما ﴿سرسید احمد خان، علامہ اقبال اور قائداعظم ﴾پہلے پہل امت مسلمہ کے بجائے ہندوستان کی متحدہ قومیت کے ہی علمبردار تھے۔ انہوں نے بڑی فراخدلی کے ساتھ ہندووں اور مسلمانوں کو اکٹھا رکھنے کی کوشش کی۔ سرسید تو ہندووں اور مسلمانوں کو ایک خوبصورت دلہن کی دو آنکھیں قرار دیتے تھے، علامہ اقبال کا کہنا تھا کہ سارے جہاں سے اچھا ہندوستاں ہمارا ، اور قائد اعظم محمد علی جناح تو کانگرس کے عملی رہنما تھے اور انہیں ہندومسلم اتحاد کا سفیر بھی کہاجاتا تھا۔ان تینوں شخصیات نےکئی برس تک ہندومسلم اتحاد کیلئے ایڑی چوٹی کا زور لگایا۔یہ صرف باتیں کرنے کے بجائے عملی اقدام کرنے والے لوگ تھے۔ ان کی ساری جدوجہد کو ہندو اکابرین اور برہمن سماج نے ان کے منہ پر دےمارا۔ آج بھی لوگ مسٹرگاندھی اور نہروکو ایک سیکولر اور وسیع القلب رہنما کےطور پر پیش کرتے ہیں۔ ایسے افراد شاید یہ بھول جاتے ہیں کہ اگر مسٹرگاندھی اور نہروسیکولر اور وسیع القلب ہوتے تو علامہ اقبال اور قائداعظم جیسی شخصیات ان سے اپنا راستہ جدا نہ کرتیں۔ نہ ہی تو وہ لوگ سیکولر تھے اور نہ ہی ان کا بنایا ہوا ہندوستان سیکولر ہے۔ہندوستان اور مقبوضہ کشمیر میں آج بھی مسلمانوں کے ساتھ جو کچھ ہو رہا ہے ، وہ کسی سے ڈھکا چھپا نہیں۔

بعض احباب کہتے ہیں کہ مہاتما گاندھی صاحب نے کہاتھاکہ میں نے انقلاب کا درس حضرت امام حسین سے سیکھا ہے۔ ایسے احباب کو معروف ہندو دانش مند مسٹر چانکیہ کی تصنیفات اور ارتھ شاستر کا مطالعہ کرنا چاہیے۔مسٹرگاندھی ایک پڑھے لکھے اور تجزیہ و تحلیل کرنے والے انسان تھے۔ ان کی شخصیت میں ارتھ شاستر کا پرتو نمایاں طور پر نظر آتا ہے۔وہ ماہر سیاستدانوں کی طرح ہی ماحول اور حالات کے مطابق بیانات دیتے تھے۔ ماہر سیاستدان اسی طرح کیا کرتے ہیں، وہ عیسائیوں میں حضرت عیسیٰؑ ، یہودیوں میں حضرت موسیٰ ؑ اور سکھوں میں بابا گورونانک سے سیکھنے کی بات ہی کرتے ہیں۔انسان کس کا پیروکار ہے اور اس نے کس سے سیکھا ہے اس پر اس کا عمل ہی بہترین گواہ ہوتا ہے۔ اگر امام حسینؑ سے سیکھنے کی بات ہے تو پھر ہر منصف مزاج انسان کو یہ دیکھنا چاہیے کہ کیا آنجہانی گاندھی کی فکر اور تحریک قرآن و سنت اور امام حسینؑ کی تعلیمات کے مطابق تھی یا قائداعظم محمد علی جناح کا راستہ قرآن و سنت اور امام حسینؑ کے مطابق تھا۔

یہ انتہائی افسوسناک امر ہے کہ ہندوستان نے تو ساری دنیا میں اپنے ہیروز کو دانش مند اور مفکر کے طور پر متعارف کروایا ہے۔ لیکن ہم صرف کشمیر میں بھی قائداعظم محمد علی جناح کے نظریات کو متعارف نہیں کرا سکے۔کشمیر کے حوالے سے ہماری اکثریت کو زیادہ سے زیادہ صرف اتنا پتہ ہے کہ قائداعظم نے کہا تھا کہ کشمیر پاکستان کی شہ رگ ہے۔ یہ اکثریت تو یہ بھی نہیں جانتی کہ قائداعظم نے یہ جملہ کب اور کس سے کہا تھا۔ اس ایک جملے کے خلاف بھی ہندوستان نے کشمیر میں بڑے پیمانے پر ذہن سازی کی ہے۔دوسری طرف ہمارے ہاں کشمیر کے حوالے سے قائداعظم کے نظریات اور خدمات کو متروک کردیا گیا ہے۔ لوگ نہیں جانتے کہ کشمیر کے حوالے سے قائداعظم کیاسوچتے، کیا کہتے اور کیا چاہتے تھے!؟۔ عوام النّاس کو اب نہیں معلوم کہ قائداعظم نے کشمیر کے حوالے سے کوئی فعالیت بھی کی تھی یا نہیں؟ المختصریہ کہ قائداعظم کے نظریات کے حوالے سے ہم نے ایسی سنگین غفلت کا ارتکاب کیا ہے کہ جس کا خمیازہ آج بھی سارے پاکستانی اور کشمیری بھگت رہے ہیں اور آئندہ بھی بھگتیں گے۔

دنیا میں مجموعی طور پر تین طرح کے قائدین ہوتےہیں، ایک دوسروں کو اپنا غلام بنانے کی سعی کرنے والے، دوسرے غلاموں کو غلامی پر رضامند رکھنے کی جدو جہد کرنے والے اور تیسرے غلاموں کو آزادی دلانے کی کوشش کرنے والے۔ ایک مسلمان کیلئےکسی طرح سے بھی یہ روا نہیں کہ وہ اپنے ارادے اور اختیار کے ساتھ کفار کی غلامی اختیار کر لے۔ بر صغیر میں قائداعظم محمد علی جناح اور آنجہانی مہاتما گاندھی کے نظریات میں بنیادی طور پر یہی اختلاف تھا۔ نظریاتی طور پر یہ دونوں شخصیات ایک دوسرے کی ضد اور برعکس تھیں۔ایک کے نزدیک اسلام ایک جامع نظامِ حیات ، مسلمان ایک قوم اور بطورِ قوم آزاد رہنے کا حق رکھتے تھے جبکہ دوسرے کے نزدیک ہندوستانی ایک قوم تھے اور مسلمانوں نے ہندی غلبے میں ہندووں کے ساتھ ساز باز کر کے زندگی گزارنی تھی۔

پاکستان کا فلسفہ وجودی یہی تھا کہ مسلمان کسی بھی طور پرکفار کے غلام نہ رہیں اور اپنے لئے ایک الگ مملکت تشکیل دیں۔جو مناطق پاکستان میں شامل ہوگئے انہوں نے ایک بہت ہی عظیم مقصد کو پالیا اور کفّار کی غلامی سے آزاد ہوگئےلیکن جو مناطق کسی بھی وجہ سے پاکستان میں شامل نہ ہو سکے وہ آزادی کی نعمت سے محروم رہ گئے۔ ان محروم مناطق میں سے ایک اہم منطقہ کشمیر کا ہے۔ کشمیر کو ایرانِ صغیر بھی کہاجاتا ہے۔ لہذا یہاں پر ہم یہ بھی عرض کرتے چلیں کہ ایران میں اسلامی انقلاب کی کامیابی کا مطلب یہ نہیں ہے کہ اب ایران کو مزید اسلامی بنانے کی ضرورت نہیں رہی بلکہ اس کا مطلب یہ ہے کہ یہ ملک اسلام کے راستے پر چل پڑا ہے۔ اسی طرح مسلمانوں کیلئے پاکستان کے وجود میں آنے کا مطلب یہ نہیں ہےکہ اب پاکستان میں سو فیصد اسلامی نظام نافذ ہو گیا ہے بلکہ اس کا مطلب یہ ہے کہ برصغیر کے مسلمان آزادی کے ساتھ اسلام کی شاہراہ پر آگئے ہیں، اب اس ملک کو اسلامی تعلیمات کے مطابق رشد اور ترقی دینا یہ اہلیانِ پاکستان کی ذمہ داری ہے۔

ہم یہ تسلیم کرتے ہیں کہ قیامِ پاکستان کے بعد پاکستانی قیادت نے سنگین غلطیاں کی ہیں لیکن اس کا ہر گز یہ مطلب نہیں کہ قائداعظم محمد علی جناح کو بھی مسٹر گاندھی کی طرح ہی سمجھا جائے۔ دنیا میں جتنی بھی نظریاتی قیادتیں گزری ہیں اُن کے بعد انحرافات نے جنم لیا ہے۔آپ تاریخ کا مطالعہ کر کےدیکھیں ، خود پیغمبرِ اسلام ﷺکے بعد ملوکیت کا دور دورہ ہو گیا تھا۔ آج تک عرب دنیا میں اسلام کے نام پر ملوکیت قائم ہے۔ پیغمبرِ اسلام کے بعد نظامِ اسلامی میں یہ جو اتنا بڑا انحراف آیا ، اس انحراف کو بنیاد بنا کر نبی اکرم ﷺکے نظریات کی انفرادیت اور افادیت سے انکار نہیں کیا جا سکتا۔جہانِ اسلام پر ملوکیت کے چھا جانے کے باوجود پیغمبرِ اسلام ﷺ کے نظریات آج بھی عالمِ بشریت کیلئے نجات اور سعادت کا باعث ہیں۔ قائداعظم محمد علی جناح نےمسلمانوں کے ایک قوم ہونے اور مسلمانوں کوکفار کی غلامی سے نجات دلانے کا جو نظریہ دیا ہے یہ نظریہ در اصل قرآن و سنت کی تعلیمات کا نچوڑ ہے۔

گزشتہ تہتر سالوں میں پاکستانی تھنک ٹینکس سے بہت غلطیاں ہوئیں، خصوصا معاشی مسائل کے حل کیلئے افغانستان کی جنگ میں کودنا، پاکستان میں مجاہدین کے نام پر دہشت گردوں کی سرپرستی کرنا اور ٹارگٹ کلرز و خودکش بمبار تیار کر کے قتل و غارت کے ذریعے مخالفین کو راستے سے ہٹانا، ان امور نے جہاں پوری دنیا میں پاکستان کی ساکھ کو خراب کیا ہے وہیں کشمیر کے مسلمانوں کے درمیان بھی پاکستان سے عشق اور لگاو میں نمایاں کمی آئی ہے۔ مساجد و امام بارگاہوں میں قتل و غارت، کافر کافر کے نعروں، اہم شخصیات پر حملوں اور امنِ عامہ کے مسائل نے عام کشمیری مسلمان کو پاکستان سے سخت مایوس کیا ہے۔ دوسری طرف اس صورتحال سے ہندوستان نے بھرپور فائدہ اٹھایا ہے۔ جب ہم اپنے ہی لوگوں کی ٹارگٹ کلنگ میں مصروف تھے، اولیائے کرام کےمزارات اور امام بارگاہوں میں دھماکے کروا رہے تھے، ہزارہ کی ٹارگٹ کلکنگ کو رواج دے رہے تھے اور ساتھ ساتھ اپنی گندگی کو قالین کے نیچے چھپا رہے تھے تو اُس وقت ہندوستانی میڈیا اور تجزیہ کار ٹھوس شواہد کے ساتھ لوگوں کو یہ بتا رہے تھے کہ طالبان اور القاعدہ کس نے بنائے؟ داعش کے ترکیبی عناصر کیا ہیں؟ لشکر جھنگوی اور سپاہِ صحابہ کے سرپرست کون ہیں؟ ۔۔۔

ایک طرف ہم آنکھیں بند کر کے اپنے کاموں میں لگے رہے، ہم اپنے طور پر اپنا اقتصاد سنوارتے رہے، ڈالر اور ریّال سمیٹ کر اپنی معیشت کو مضبوط بناتے رہے جبکہ دوسری طرف ہندوستان مقبوضہ کشمیر میں مسلمانوں کے اذہان میں یہ نکات ڈالتا رہا کہ محمد علی جناح کا نظریہ غلط تھا، گاندھی نے بالکل درست کہا تھا، اگرمسلمان ایک قوم ہوتے تو پاکستان میں یو ں ایک دوسرے کے گلے نہ کاٹتے۔ ہندوستانی میڈیا نے اس پر ڈرامے اور فلمیں بنائیں، ڈاکومنٹریز نشر ہوتی رہیں، تجزیہ نگار لوگوں کو اطلاعات اور معلومات فراہم کرتے رہے جبکہ ہم نے جذباتی ترانوں اور یومِ کشمیر و یکجہتی کشمیر کی چھٹی منا کر کشمیر کو حاصل کرنے کی ٹھانے رکھی۔

ویسے تو ہمارے ہاں خوشامد اور چاپلوسی کا ہی دور دورہ ہے۔ البتہ ہمیں یہ جان لینا چاہیے کہ مسئلہ کشمیر کسی چاپلوسی یا خوشامد سے حل ہونے والا نہیں ہے۔ پاکستان کے اعلی حکام اور اداروں کو چاہیے کہ وہ سنجیدگی سے مقبوضہ جموں و کشمیر کا سروے کروائیں، یہ جائزہ لیں کہ دہشت گردی کی انڈسٹری سے پاکستان نے دنیا میں اور خصوصاً جموں و کشمیر کے اندر کیا پایا ہے اور کیا کھویا ہے؟ ہمیں پروفیشنل بنیادوں پر یہ جاننے کی ضرورت ہے کہ آج کے کشمیری نوجوان ہندوستان کی پالیسیوں اور میڈیا سے کس قدر متاثر ہوچکے ہیں؟ راقم الحروف کے تجزیے کے مطابق یہ دورمقبوضہ جموں و کشمیر میں نظریاتی بحران کا دور ہے۔اس وقت لوگوں کے درمیان محمد علی جناح اور مہاتما گاندھی کا فرق مٹایا جا رہا ہے بلکہ مہاتما گاندھی کو ترجیح دیے جانے پر کام ہو رہا ہے۔ ہمارے اربابِ فکر و دانش اور ملکی سلامتی کے ضامن اداروں کو یہ محاسبہ کرنا چاہیے کہ ہم نےآج تک مقبوضہ کشمیر میں دینِ اسلام کے نظریہ آزادی اور قائداعظم محمد علی جناح کے نظریات کی ترویج و شاعت کیلئے کیا کچھ کیا ہے؟

قصّہ مختصر یہ ہے کہ جب ہم پاکستان میں برادر کُشی میں مصروف تھے، اس وقت ہندوستان ہائبرڈ وار کے ذریعے جموں و کشمیر کو فتح کر رہا تھا۔ آج جموں اور کارگل والے اپنے آپ کو تحریکِ آزادی کشمیر سے جدا رکھنے کو ہی دانشمندی کہتے ہیں، آج جو لوگ مقبوضہ کشمیر میں مقاومت کر رہے ہیں اب وہ پاکستان سے الحاق کے مسئلے پر تقسیم در تقسیم ہو چکے ہیں۔ کشمیر میں یہ نظریاتی کشمکش کا وقت ہے، پاکستانی اداروں کو اس وقت کشمیر میں قائداعظم کے نظریات کے احیا اور نظریہ پاکستان کی ترویج و اشاعت کی اشد ضرورت ہے۔ اگر ہم نے ماضی غلطیوں کو اب بھی تسلیم نہ کیا اور اپنی برادر کُشی پر مبنی پالیسیوں کو ترک نہ کیا تو تحریکِ پاکستان اور تحریکِ آزادی کشمیر کے شہدا سے بری طرح شرمندہ ہونگے۔

کشمیری شہدا سے اظہارِ وفاداری کیلئے سپورٹ کشمیر انٹرنیشنل فورم اور صدائے کشمیر فورم نے ۴ جنوری ۲۰۲۱ کو ایران کے شہر قم المقدس میں ایک انٹرنیشنل کشمیر کانفرنس منعقد کروائی، کانفرنس کا مقصد کشمیریوں کی آزادی کی جدوجہد کی حمایت کرنا تھا۔ کانفرنس سے آنلائن خطاب پاکستان سےمرکزی امیرجماعت اہل حرم مفتی گلزار احمد نعیمی نے کیا، انہوں وحدتِ اسلامی ، اسلام میں آزادی کی اہمیت اور کشمیریوں کی جدجہدِ آزادی کے حوالے سے انتہائی جامع اور جاندار گفتگو کی۔۔۔ جاری ہے

چشمے اور کنویں میں فرق ہے۔ یہ فرق سمجھنا ضروری ہے۔ چشمہ میٹھا ہو یا نمکین خود ہی زمین کا سینہ چیر کر پھوٹتا ہے۔ جاندار اس سے مستفید ہوتے ہیں۔ جبکہ کنواں زمین کی گہرائی میں خود کھودا جاتا ہے۔ جنہوں نے کسی کنویں کو کُھدتے دیکھا ہے، وہی اس کی اہمیت و قدر سے واقف ہیں۔ کھودنے والے کا ہدف پانی نکالنا ہوتا ہے۔ تاکہ یہ پانی لوگوں تک پہنچے۔ بس یہیں سے آزادی کی جدوجہد کو بھی سمجھئے۔ آزادی کے حصول کی خاطر ، جان جوکھوں میں ڈالی جاتی ہے۔ آزادی کا میٹھا پانی چشمے سے حاصل نہ ہو رہا ہو تو ، کنواں کھودنا ضروری و لازمی امر ہے۔ یہ کھدائی امید مانگتی ہے۔

سپورٹ کشمیر انٹرنیشنل فورم اور صدائے کشمیر فورم کا آن لائن سیشن اسی امید کی نشاندہی کرتا ہے ، مجھے اس سلسلے کا ساتواں پروگرام جوائن کرنے کا موقع ملا۔ مجھے اس پروگرام میں جو بات پسند آئی ہے وہ امید اور جدوجہد ہے۔ اس میں جب امکانات پر بات کی جاتی ہے تو خدشات کو بھی فراموش نہیں کیا جاتا۔ اس مرتبہ ڈاکٹر قیصر جعفری صاحب پہلے دورانیےکے مہمان تھے۔ انہوں نے بیس منٹ گفتگو کی۔

جعفری صاحب تاریخ کے لیکچرار ہیں، ان کا کہنا تھا کہ مسئلہ کشمیر کو تقسیم ہند کے وقت عمداً جنم دیا گیا تھا۔ اب اہلیانِ کشمیر کے سامنے تین ممکنہ راستے ہیں۔ خودمختاری یا پاکستان و ہندوستان میں سے کسی ایک کے ساتھ ملنا ۔ انہوں نے پہلے پسِ منظر بیان کیا۔ ان کے مطابق جموں و کشمیر ایک مسلم اکثریتی ریاست ہے۔ اس کے عوام کو اپنی قسمت کا فیصلہ کرنے کا اختیار دیاجانا چاہیے۔

پنڈت جواہر لال نے تہاڑ جیل سے شیخ عبداللہ کو، رہائی دے کر کہا کہ مسئلہ کشمیر کو ، چناب فارمولے کے تحت حل کرتے ہیں۔ پاکستان سے صدر ایوب نے بھی ، اس حل پر اپنی رضا مندی کا اظہار کیا ۔ اس کا ذکر شیخ عبد اللہ نے اپنی کتاب ، آتشِ چنار میں کیا ہے۔ حتی آزاد کشمیر کے صدر کے ایچ خورشید بھی راضی تھے۔ حل تکمیل کے نزدیک تھا کہ نہرو فوت ہو گئے۔ ان کے بعد نواز شریف نے دوبارہ اس فارمولے پر کام شروع کیا۔ یہ موضوع ایک بار پھر زندہ ہوا۔ جنرل پرویز مشرف نے مارشل لاء لگا کر ، کارگل کا ایشو کھڑا کر دیا۔ اس طرح چناب فارمولا ، جنگ کی نظر کر دیا گیا۔ موصوف کے مطابق، اگر مسئلہ کشمیر ، چناب فارمولے کے مطابق حل ہو جاتا ، تو چین کے زیر تسلط کشمیر کا علاقہ ، جو کہ متحدہ ہندوستان کے زمانے سے تھا، وہ بھی واگزار ہو جاتا ۔

ڈاکٹر قیصر جعفری صاحب نے ایک نکتے کی طرف اشارہ کیا کہ ، اگر کشمیر کو چناب فارمولے کے مطابق حل کیا جاتا تو ، یہ تقسیم کشمیر ، عین تقسیم ہند کی طرح تھی۔ جغفرافیائی لحاظ سے دریائے چناب ہندو اور مسلم اکثریتی علاقوں کو تقسیم کرتا ہے۔ اس طرح آدھے کشمیری پاکستان میں اور آدھے ہندوستان میں شامل ہوتے۔ کشمیری مسلمان آپس میں بھی تقسیم ہو جاتے۔ نصف کشمیری اپنی مراد پا لیتے اور باقی اپنوں سے ہی ہمیشہ کے لئے بچھڑ جاتے۔ اس طرح ان کی جدو جہد بے سود ہو جاتی۔ یوں چناب فارمولا بھی در حقیقت کشمیر کے مسئلے کا حل نہیں ہے۔لہذا ہمیں کسی جامع راہِ حل کی تلاش جاری رکھنی چاہیے۔

ڈاکٹر صاحب نے یہ بھی کہا کہ اندرون کشمیر بھی بعض اپنوں نے متحدہ جدو جہد آزادی کا دامن چھوڑ دیا ہے۔ جس سے کشمیرکاز کو نقصان پہنچا ہے۔انہوں نے اس امر پر زور دیا کہ پاکستان کی حکومت اپنی سفارتی فعالیت کا دائرہ وسیع کرے۔ اسی طرح پاکستانی عوام بھی اپنے کشمیری بہن بھائیوں کی آواز عالمی برادری تک پہنچائیں ۔

ڈاکٹر جعفری کے مطابق پاکستانی حکمرانوں اور عوام دونوں کو کشمیر کاز کیلئے اپنی کوششیں تیز کرنے کی ضرورت ہے۔

ہم اپنے قارئین کو ایک مرتبہ پھر یہ یاد دلاتے چلیں کہ کشمیر اور فلسطین سے ہمارا نظریاتی رشتہ ہے۔آج ہماری نئی نسل اپنے بزرگوں کے ہاتھوں نظریاتی موت کا نظارہ کر رہی ہے۔ ظلم پر خاموشی اختیار کرنا ، ظالم کو ظالم نہ کہنا ، غیرجانبدار ہوجانا اور مظلوم کی مدد نہ کرنا بھی ظلم ہے۔ بالاخر جب بھی مظلوم متحد ہوکر کھڑے ہونگے ، تاریکی کی کالی رات چھٹ جائے گی۔ ضرور چھٹ جائے گی ، چونکہ ظالم بڑا نہیں ، ظلم بڑا ہوتا ہے۔

ظلم پھر ظلم ہے بڑھتا ہے تو مٹ جاتا ہے

خون پھر خون ہے ٹپکے گا تو جم جائے گا

خاک صحرا پہ جمے یا کف قاتل پہ جمے

فرق انصاف پہ یا پائے سلاسل پہ جمے

تیغ بیداد پہ یا لاشہ بسمل پہ جمے

خون پھر خون ہے ٹپکے گا تو جم جائے گا