کورونا کے خاتمے کا امکان نہ ہونے کے برابر ہے، ڈاکٹر فاؤچی

امریکی صدر کے مشیر اور وبائی امراض سے بچاؤ کے ماہر ڈاکٹر انتھونی فاؤچی نے کہا ہے کہ کورونا وائرس کے خاتمے کے امکانات نہ ہونے کے برابر ہیں۔ایک انٹرویو میں ڈاکٹر انتھونی فاؤچی کا کہنا تھا عام دنوں میں دنیا بھر سے لاکھوں لوگ روز امریکا میں داخل ہوتے ہیں ۔انہوں نےکہا کہ اس لیے اس بات کا کوئی امکان نہیں ہے کہ امریکا کورونا وائرس سے پاک ہوجائے گا۔امریکی صدر کے مشیر نے مزید کہا کہ دیگر انفیکشنز کی طرح گرمیوں میں کورونا وائرس کے کیسز میں بھی کمی آسکتی ہے۔ان کا کہنا تھا کہ اگر جون اور جولائی میں امریکا میں کورونا وائرس کے کیسز میں ڈرامائی کمی آجائے، تب بھی حفاظتی انتظامات برقرار رکھنا ہوں گے۔دوسری جانب امریکی صدر ڈونلڈ ٹرمپ نے کورونا وائرس کی ٹیسٹنگ کے لیے اضافی رقم مختص کرنے کا اعلان کردیا ہے تاہم انہوں نے چین پر کڑی تنقید کی ہے، اُن کا کہنا ہے کہ وہ چین سے خوش نہیں، وہ کورونا وائرس کو روک سکتا تھا۔امریکا میں کورونا وائرس کیسز میں تیزی سے اضافہ ہورہا ہے، جہاں مزید 17 ہزار 500 نئے کیسز سامنے آگئے اور ایک دن میں 1150 جان کی بازی ہار گئے۔دنیا کے طاقتور ترین ملک میں کورونا وائرس کی تباہ کاریاں بڑھتی ہی جارہی ہیں، جہاں 13 لاکھ 80 ہزار 235 افراد مہلک مرض کا شکار ہوچکے ہیں۔کورونا وائرس سے امریکا میں اموات کی تعداد 81 ہزار 634 تک پہنچ چکی ہے جبکہ 2 لاکھ 19ہزار 839 صحتیاب ہوچکے ہیں۔چین میں 2 دن میں کورونا وائرس کے نئے کیسز بڑھنے کے بعد پھر بریک لگ گیا ہے، 24 گھنٹوں میں کوئی نیا کیس رپورٹ نہیں ہوا۔جنوبی کوریا میں لاک ڈاؤن میں نرمی سے کورونا وائرس کو کنٹرول کرنے کی کوششوں کو دھچکا لگا ہے، چند دنوں میں نائٹ کلب سے جڑے 100 کیسز رپورٹ ہوچکے ہیں۔