حقیقی عمر سے کئی سال کم دکھائی دینے والی تائیوانی بہنیں

چین، تائیوان اور جاپان کے بیشتر لوگ اپنی عمر سے کم دکھائی دیتے ہیں لیکن ایک خاندان تو ایسا ہے جس میں 3 بہنیں اپنی عمر سے کئی گنا کم جب کہ ان کی والدہ بڑی بہن لگتی ہیں۔41 سالہ لوری ہوسو پیشے کے اعتبار سے فیشن ڈیزائنر ہیں جن کی تصاویر پہلے ہی سوشل میڈیا پر دھوم مچا چکی ہیں، لوری اپنی تصاویر میں 18 سے 20 سالہ دوشیزہ دکھائی دیتی ہیں لیکن حال ہی میں انہوں نے اپنی بہنوں کے ساتھ ایک تصویر شیئر کی ہے جس میں ان کی بہنیں بھی زیادہ عمر ہونے کے باوجود کم عمر دکھائی دے رہی ہیں۔لوری ہوسو کی دیگر دو بہنیں 40 سالہ فے فے اور 36 سالہ شیرن شادی شدہ ہیں لیکن دیکھنے والے ان کی عمر کے حوالے سے ہمیشہ دھوکا کھا جاتے ہیں۔

لوری ہوسو کی والدہ اور بہنوں کے ساتھ تصاویر تائیوانی میڈیا میں بھی کافی سرگرم رہیں اور اب اس خاندان کو “فیملی آف فروزین ایج” یعنی منجمند عمر کے خاندان کے نام سے پکارا جانے لگا ہے۔40 سالہ فے فے کے مطابق جب ان کی والدہ جوان تھیں تو وہ بھی اپنی حقیقی عمر سے کئی گنا کم دکھائی دیتی تھیں اور اب ان کی عمر 63 برس ہوچکی ہے لیکن اب بھی لوگ انہیں ہماری بڑی بہن قرار دیتے ہیں۔

تصویر میں دائیں جانب لوری بائیں جانب فے فے اور درمیان میں ان کی والدہ کو دیکھا جاسکتا ہے۔لوری ہوسو اور فے فے نے نوجوان نظر آنے کا راز بتاتے ہوئے کہا ہے کہ اس کا کریڈٹ زیادہ سے زیادہ پانی پینے کو جاتا ہے، کیوں کہ وہ روزانہ خوراک سے زیادہ پانی پر انحصار کرتی ہیں اور صبح نیند سے بیدار ہونے کے بعد ضرور پانی پیتی ہیں جس کی وجہ سے وہ جواں دکھائی دیتی ہیں۔لوری ہوسو کے مطابق وہ گزشتہ کئی سالوں سے باقاعدگی سے صبح اٹھنے کے بعد 350 سے 500 ملی لیٹر پانی پیتی ہیں جو ان کی زندگی کا حصہ بن چکا ہے۔