کھیل

ویسٹ انڈیز کرکٹ ٹیم کے سلیکٹرز نے بھارت کے خلاف واحد ٹی ٹوئنٹی میچ کے لئے جارح مزاج بلے باز کرس گیل کو اسکواڈ میں شامل کرلیا۔کرس گیل اور کرکٹ بورڈ کے درمیان مالی معاملات پر تنازع چلا آرہا ہے جس کی وجہ سے گیل قومی ٹیم کی نمائندگی نہیں کر رہے تاہم سلیکٹرز نے ایک مرتبہ پھر کرس گیل پر اعتماد کرتے ہوئے انہیں بھارت کے خلاف 9 جولائی کو کھیلے جانے والے واحد ٹی ٹوئنٹی میچ کے لئے طلب کرلیا ہے۔بھارت اور ویسٹ انڈیز کے درمیان واحد ٹی ٹوئنٹی میچ کنگسٹن کے سبینا پارک اسٹیڈیم میں کھیلا جائے گا جس کے لئے لینڈل سیمنز کی جگہ ٹیم میں کرس گیل کو شامل کیا گیا ہے۔کرس گیل نے آخری مرتبہ انگلینڈ کے خلاف 2016 کے ٹی ٹوئنٹی ورلڈ کپ کے فائنل میں ویسٹ انڈیز کی نمائندگی کی تھی جس کے بعد سے وہ ٹیم سے باہر ہیں۔ٹی ٹوئنٹی طرز کی کرکٹ میں کرس گیل ویسٹ انڈیز کی جانب سے سب سے زیادہ رنز بنانے والے بلے باز ہیں جنہوں نے 2 سنچریوں کی بدولت 35.32 کی اوسط سے 1519 رنز بنائے جب کہ ان کا اسٹرائک ریٹ 145.49 ہے۔ویسٹ انڈیز کرکٹ کے چیئرمین سلیکٹرز کارٹنی براؤن کا کہنا ہے کہ کرس گیل کو ایک مرتبہ پھر ٹیم میں شامل ہونے پر انہیں خوش آمدید کہتے ہیں اور ان کی شمولیت سے ویسٹ انڈیز کے ٹاپ آرڈر کو مضبوط بنانے میں مدد ملے گی۔بھارت کے خلاف واحد ٹی ٹوئنٹی کے لئے ویسٹ انڈیز کا 13 رکنی اسکواڈ کپتان کارلوس بریتھ ویٹ، سیمول بدری، کرس گیل، رونس فورڈ بیٹن، ایون لیوس، جیسن محمد، سنیل نارائن، کیرون پولارڈ، رومین پاویل، مارلن سیموئلز، جیروم ٹیلر، چیڈوک والٹن اور کیسرک ولیم پر مشتمل ہے۔

آئی سی سی ویمنز ورلڈ کپ میں آج پاکستان کا بامقابلہ آسٹریلیا ہے،جہاں کینگروز ویمنز ٹیم نے قومی ویمنز ٹیم کے خلاف ٹاس جیت کر پہلے بیٹنگ کا فیصلہ کیا ہے ۔پاکستان ویمنز ٹیم میں ایک تبدیلی کی گئی ہےجہاں مڈل آرڈر بیٹسمین جویریہ خان کی جگہ مرینہ اقبال کو ٹیم میں شامل کیا گیا ہے۔ادھر آسٹریلیا ویمنز ٹیم کو کپتان میگ لیننگ کی شکل میں شدید جھٹکا لگا ہےوہ کندھے میں تکلیف کے باعث آج کے میچ سے باہر ہوگئی ہیں۔میگ لیننگ کی جگہ ریچل ہینز ٹیم کپتانی کے فرائض سر انجام ددے رہی ہیں جبکہ دوسری تبدیلی میں میگن شہوٹ کی جگہ بولر سارہ ایلےکو ٹیم میں شامل کیاگیا ہے۔واضح رہے کہ آئی سی سی ویمنز ورلڈ کپ میں قومی ویمنز کرکٹ ٹیم کا سفر بغیر کسی کامیابی کے جاری ہے ۔ ٹیم نے اب تک تین میچ کھیلےاور کسی میچ میں فتح حاصل نہیں کی ہے۔

آسٹریلوی کرکٹ ٹیم کے سابق کپتان مائیکل کلارک نے کرکٹ بورڈ اور کھلاڑیوں کے درمیان مالی معاملات پر جاری تنازع حل کرنے کے لئے تجویز پیش کردی۔آسٹریلوی کرکٹ ٹیم کے کھلاڑی بورڈ کی جانب سے تنخواہوں کے معاملے پر نئے معاہدے پر دستخط نہ کرنے کی وجہ سے پہلے بھی بے روزگار ہوچکے ہیں اور اب تنازع اس قدر شدت اختیار کرگیا ہے کہ اس کی وجہ سے ایشز سیریز منسوخ ہونے کا خدشہ ہے تاہم تنازع کے حل کے لئے سابق کپتان مائیکل کلارک میدان میں آگئے ہیں۔مائیکل کلارک نے تجویز پیش کی ہے کہ دونوں فریقین کو باہمی رضامندی کے ساتھ تنخواہوں کے معاملے پر ہونے والے گزشتہ معاہدے کو ایک سال کے لئے بڑھا دینا چاہیئے جس کے بعد ایک سال کے دوران کرکٹ بورڈ اور کھلاڑیوں کو کسی ایک معاہدے پر راضی ہونا چاہیئے۔کرکٹ بورڈ اور کھلاڑیوں کے درمیان کشیدگی کی کوئی صورت نہ نکلنے کی صورت میں انگلینڈ کے خلاف 23 نومبر سے شروع ہونے والی ایشز سیریز کے منسوخ ہونے کا خدشہ موجود ہے۔میڈیا سے بات کرتے ہوئے مائیکل کلارک کا کہنا تھا کہ یہ کرکٹ کے لئے بہت بدقسمتی ہے، کرکٹ بورڈ اور کھلاڑیوں کو ایک ساتھ بیٹھ کر مسئلے کا حل تلاش کرنا چاہیئے۔مائیکل کلارک نے کہا کہ تمام کھلاڑی کرکٹ کھیلنا چاہتے ہیں اس لئے انہیں کھیلنے دیا جائے اور ایشز سیریز کے لئے کھلاڑیوں کو مکمل طور پر اپنے کھیل پر دیہان دینا ہوگا تاہم اس کے لئے مالی معاملات کے پچھلے معاہدے کو 12 ماہ کے لئے بڑھانا ہوگا۔کھلاڑیوں کا موقف ہے کہ انہیں بورڈ کے حاصل ریونیو میں سے رقم ادا کی جائے تاہم کرکٹ بورڈ کا کہنا ہے کہ اگر کھلاڑیوں کو تنخواہوں سے ہٹ کر ادائیگی کا کوئی دوسرا طریقہ اختیار کیا گیا تو اس سے نچلی سطح پر کرکٹ متاثر ہوگی۔دوسری جانب آسٹریلوی کرکٹ بورڈ نے کھلاڑیوں کو نئے معاہدے پر دستخط کے لئے یکم جولائی کی ڈیڈ لائن دی تھی تاہم کسی کھلاڑی نے نئے معاہدے پر دستخط نہیں کئے جس کے بعد باعث 230 کھلاڑی بے روزگار ہوگئے ہیں۔

آئی سی سی ویمنز کرکٹ ورلڈ کپ کے 15ویں میچ میں آسٹریلیا نے پاکستان کو جیت کے لئے 291رنز کا ہدف دیا ہے۔انگلینڈ کے لیسٹر میں کھیلے جارہے میچ میں آسٹریلوی کپتان ریچل ہینز نے ٹاس جیت کر بیٹنگ کا فیصلہ کیا اورمقررہ 50اوورز میںایلس ولانی ،ایلسا ہیلی اور ایلسی پیری کی شاندار نصف سنچریوں کی بدولت 8وکٹ پر 290رنز بنائے۔پاکستان کی طرف سے کپتان ثنا میر نے 10اوورز میں 49رنز دے کر 3جبکہ سعدیہ یوسف نے 9اوورز میں 66رنز دے کر 2وکٹیں حاصل کی ۔پاکستان نے ایونٹ میں جنوبی افریقہ ،انگلینڈ اور روایتی حریف بھارت کے خلاف میچز کھیلے ہیںاور تمام ہی مقابلے میں اسے شکست کا سامنا کرنا پڑا۔

وزیراعظم نواز شریف نے  پی سی بی حکام کو ہدایت کی ہے کہ کسی بھی غیر ملکی ٹیم کی پاکستان آمد کے لئے منت نہ کی جائے۔چیمپئنز ٹرافی کی فاتح ٹیم کے اعزاز میں دیئے گئے استقبالیہ سے خطاب کرتے ہوئے وزیراعظم نواز شریف نے پی سی بی حکام کو ہدایت کی کہ ہم ہر میدان کے فاتح ہیں اس لئے جو غیر ملکی ٹیم پاکستان آنا نہیں چاہتی تو اس کی منت نہ کریں۔وزیراعظم نے کہا کہ ہمارا بھی اپنا مقام ہے اور عزت ہے، پاکستان نہ آنے والی ٹیم اور ملک جلد ہمارے پاس کھیلنے کے لئے بھاگے بھاگے آئیں گے۔وزیراعظم نے ماضی کی یادوں کا تذکرہ کرتے ہوئے کہا کہ ساری زندگی کرکٹ دیکھتا اور کھیلتا آیا ہوں، بچپن سے باؤنسر جب بھی آتا مجھے برداشت نہیں ہوتا تھا، ریلوے کے گراونڈ پر کھیلنے گئے تو منع کر دیا گیا جس پر بہت تکلیف ہوئی اور پاناما لیکس سے اتنی تکلیف نہیں ہوئی جتنی کرکٹ گراؤنڈ سے نکالے جانے پر ہوئی تھی۔وزیراعظم نے اپنے خطاب کے دوران کھلاڑیوں کو مخاطب کرتے ہوئے کہا کہ اصل وزیراعظم تو آپ لوگ ہیں،  ہم تو ٹائٹل کے وزیراعظم ہیں جن کی اپنی خواہش آپ جیسے ہیروز سے ملنے کی ہوتی ہے۔ وزیراعظم نوازشریف نے وننگ ٹیم کے کپتان سرفراز احمد سے بھی کہا کہ شہر یار خان کہتے رہتے تھےکہ سرفراز کو کپتان بنانا چاہتاہوں، میری خواہش ہے کہ آپ سے ہاتھ ملاؤں۔خیال رہے کہ وزیراعظم ہاؤس میں ہونے والی استقبالیہ تقریب میں چیف سلیکٹر اور کھلاڑیوں کے اہلخانہ بھی شریک تھے ،اس موقع پرچیمپئنز ٹرافی جیتنے والی ٹیم کے کھلاڑیوں کو انعامی رقم کے ساتھ اعزازات سے بھی نوازا گیا۔قومی ٹیم کے کھلاڑیوں اور آفیشلز نے وزیراعظم ہاؤس روانگی سے قبل گروپ فوٹو بھی بنوایا۔

پاکستان کرکٹ بورڈ کے چیئرمین شہریار خان نے ون ڈے اور ٹی ٹوئنٹی ٹیم کے کپتان سرفراز احمد کو ٹیسٹ ٹیم کی بھی قیادت سونپنے کا اعلان کیا ہے۔وزیراعظم ہاؤس میں چیمپئنز ٹرافی کی فاتح ٹیم کے اعزاز میں دیئے گئے استقبالیہ میں چیئرمین پی سی بی شہریار خان نے اعلان کیا کہ مصباح الحق کی ٹیسٹ کرکٹ سے ریٹائرمنٹ کے بعد سرفراز احمد قومی ٹیسٹ ٹیم کے نئے کپتان ہوں گے۔شہریار خان کا کہنا تھا کہ سرفراز احمد نے چیمپئنز ٹرافی کے دوران زبردست قیادت کی اور وہ میچور ہورہے ہیں۔شہریار خان نے بھارت کو چیلنج دیتے ہوئے کہا کہ بھارت ہم سے ڈرتا ہے اور کرکٹ نہیں کھیلتا، وہ آئیں اور کرکٹ کھیلیں۔چیئرمین پی سی بی نے امید دلائی کہ پاکستان میں ایک مرتبہ پھر انٹرنیشنل ٹیمیں آئیں گی اور اس سلسلے میں سری لنکا اور بنگلادیش سے بات کر رہے ہیں۔شہریار خان نے کہا کہ چیمپئنز ٹرافی کے فائنل میں متحد ہوکر کھیلنے سے کامیابی نصیب ہوئی جب کہ ایونٹ میں فتح کے بعد دنیا کی ٹیمیں ہم سے کھیلنا چاہتی ہیں اور کرکٹ ٹیم کی اس کامیابی سے پوری قوم خوش ہے۔

ویسٹ انڈیز سے چوتھے ایک روزہ میچ میں عبرتناک شکست کے بعد بھارتی میڈیا نے سابق کپتان ایم ایس دھونی کی کارکردگی پر سوالات اٹھا دیئے۔چیمپئنز ٹرافی میں پاکستان کے ہاتھوں شکست کے بعد ویسٹ انڈیز سے ایک روزہ میچ میں عبرتناک ناکامی نے بھارتی میڈیا کو کرکٹ ٹیم پر انگلیاں اٹھانے کا موقع فراہم کردیا تاہم اس کی زد میں سب سے زیادہ سابق کپتان ایم ایس دھونی ہیں جن کی کارکردگی پر سوالات اٹھائے جارہے ہیں۔دھونی کو ایک کامیاب فنشر کھلاڑی قرار دیا جاتا ہے جو چئمپئنز ٹرافی میں بھارتی شائقین کی امیدوں پر پورا نہ اتر سکے اور 5 جولائی کو ویسٹ انڈیز کے خلاف کھیلے گئے چوتھے ایک روزہ میچ میں بھی وہ محتاط کھیلتے ہوئے آؤٹ ہوئے جس پر بھارتی کرکٹ شائقین سمیت میڈیا بھی ان سے ناراض ہے۔ویسٹ انڈیز کے خلاف دھونی 114 گیندوں پر 54 رنز بنا کر آؤٹ ہوئے جب کہ انہوں نے اپنی اننگز میں صرف ایک چوکا لگایا، جب تک دھونی کریز پر موجود رہے تو یہی گمان کیا جارہا تھا کہ بھارتی ٹیم میچ جیت جائے گی لیکن انڈین ٹیم 190 رنز کا ہدف حاصل کرنے میں ناکام رہی۔ بھارتی معروف نشریاتی ادارے ٹائمز آف انڈیا نے اپنی رپورٹ میں دھونی کی کارکردگی پر انگلیاں اٹھاتے ہوئے کہا ہے کہ دھونی اب کامیاب فنشر نہیں رہے اس لئے ورلڈ کپ سے قبل سلیکٹرز کو ان کے متبادل پر غور کرنا چاہیئے۔نشریاتی ادارے نے دھونی کے متبادل کا نام تجویز کرتے ہوئے کہا کہ دہلی سے تعلق رکھنے والے رشب پانت دھونی کے متبادل کے طور پر موزوں امیدوار ہیں جو موقع کی تلاش میں ہیں جو نہ صرف بڑے شارٹس کھیلنے کی صلاحیت رکھتے ہیں بلکہ وہ کئی لوگوں کو متاثر کرچکے ہیں تاہم بھارتی ٹیم مینجمنٹ حیران کن طور پر ان سے ناراض دکھائی دیتی ہے۔ نشریاتی ادارے نے بھارتی کرکٹ ٹیم کے تھنک ٹینک کو مشورہ دیا کہ دھونی کے متبادل کے طور پر رشب پانت کو آزمانا چاہیئے۔

چیمپینز ٹرافی کی فاتح قومی کرکٹ ٹیم آج وزیر اعظم میاں محمد نواز شریف سے ملاقات کرے گی۔ذرائع کے مطابق آئی سی سی چیمپینز ٹرافی جیتنے والی کرکٹ ٹیم کے اعزاز میں آج وزیر اعظم آفس میں خصوصی تقریب منعقد ہو گی۔وزیر اعظم نواز شریف چیمپینز ٹرافی کی فاتح ٹیم سے ملاقات کریں گے اور انہیں تاریخی فتح پر مبارکباد دیں گے۔وزیر اعظم کھلاڑیوں میں اعلان کردہ انعامی رقوم بھی تقسیم کریں گے۔ادھر قومی کرکٹ ٹیم کو انعامی رقم دینے کا وزیراعظم کا اعلان اسلام آباد ہائیکورٹ میں چیلنج کر دیا گیا ہے، عدالت نے رقم دینے سے متعلق ڈپٹی اٹارنی جنرل سے کل تک قانونی معاونت طلب کر لی ہے۔اسلام آباد ہائیکورٹ کے جسٹس عامر فاروق نے شہداء فاؤنڈیشن کی درخواست کی سماعت کی، عدالت نے استفسار کیا کہ بتایا جائے وزیراعظم کس قانون کے تحت رقم کھلاڑیوں کو دے سکتے ہیں اور کتنی رقم دے سکتے ہیں۔انعامی رقم دینے کے اعلان کے خلاف درخواست میں کہا گیا ہے کہ 22 کروڑ کی خطیر رقم ٹیکس کے پیسے سے کیوں بانٹی جارہی ہے، کھلاڑی کی مراعات 22 گریڈ کے افسر جتنی ہوتی ہیں، کھلاڑی تنخواہ اور دیگر میچ فیس بھی لیتے ہیں۔درخواست میں استدعا کی گئی کہ عدالت معاملے پر حکم امتناع جاری کرے اور وزیراعظم کو ٹیکس کا پیسہ بانٹنے سے روکے، کیس کی سماعت کل تک ملتوی کر دی گئی۔