قومی

وزیر مملکت برائے ماحولیاتی تبدیلی زرتاج گل نے کہا ہے کہ لاہور کی آلودگی میں اضافہ ریلیوں میں شرکت کے لیے دوسرے شہروں سے آنے والی گاڑیوں کی وجہ سے ہوا ہے۔سماجی رابطے کی ویب سائٹ ٹوئٹر پر انہوں نے  اپنے ایک ویڈیو پیغام میں لاہور کو آلودہ ترین قرار دینے کی خبروں کی تردید کرتے ہوئے کہا کہ لاہور کو آلودہ ترین شہروں کی فہرست میں ڈالے جانے کی خبریں بلکل غلط ہیں۔انہوں نے کہا کہ درست ذرائع سے یہ ڈیٹا نہیں لیا گیا۔ انہوں نے کہا کہ یہ خبر پھیلانے والی کمپنی گزشتہ دو سال سے ایسی سنسنی خیز خبریں پھیلانے کی کوشش کررہی ہے۔انہوں نے اپنے ویڈیو پیغام میں کہا کہ ڈیٹا دینے والی کمپنی شدید ٹریفک کے دباؤ کے وقت اعداد و شمار کا تعین کرتی ہےانہوں نے کہا کہ ریلیوں میں دوسرے شہروں سے آنے والی گاڑیوں کی وجہ سے بھی آلودگی پھیل رہی ہے۔اپنے ویڈیو پیغام میں انہوں نے عوام سے اپیل کی ہے کہ وہ غیر مستند اطلاعات پر کان نہ دھریں اور صرف مستند ذرائع پر یقین کریں۔انہوں نے یہ بھی کہا کہ  چند لوگ اپنے ذاتی مفاد کے لئے عوام کو گمراہ کررہے ہیں۔ وزارت ماحولیات اپنا کام کررہی ہے، اسموگ کی وجوہات پر کافی حد تک قابو پایا جاچکا ہے۔اپنے ویڈیو پیغام میں زرتاج گل نے بتایا کہ لاہور میں 1 سو پچپن اور پنجاب میں 2 سو ساٹھ سے زائد فرنس یونٹ بند کئے ہیں پاکستان بھر میں 20 ہزار کے قریب اینٹوں کے بھٹے ہیں۔انہوں نے بتایا کہ 80فیصد آلودگی بھارت کی طرف جبکہ 20 فیصد پاکستان کی طرف ہے۔زرتاج گل کے اس بیان پر سوشل میڈیا صارفین شدید ردعمل دیتے ہوئے غم و غصے کا اظہار کر رہے ہیں۔ ایک صارف نے زرتاج گل کو جواب دیتے ہوئے کہا کہ ’ہم مفاد پرست عناصر نہیں۔ ہم لاہور کے شہری ہیں۔ ہماری آنکھیں جل رہی ہیں، سر درد سے بوجھل ہے، ہم سانس نہیں لے سکتے۔‘

رحیم یارخان میں لیاقت پور کے قریب حادثے کا شکار ہونے والی ٹرین کے ڈرائیور نے آگ لگنے کی وجہ بتا دی۔تیزگام ایکسپریس کے ڈرائیور محمد صدیق نے جیونیوزسے گفتگو میں کہا ہے کہ ٹرین میں آگ چھ بج کر اٹھارہ منٹ پر لگی۔ڈرائیور کے مطابق حادثہ سلنڈر پھٹنے کی وجہ سے پیش آیا۔ٹرین ڈرائیور کا کہنا ہے کہ ریسکیو کے تاخیرسے پہنچنے کی وجہ سے ہلاکتیں زیادہ ہوئیں۔ڈرائیور نے کہا کہ آگ سے متاثرہ بوگیوں کوالگ کیا گیا تاکہ مزید آگ نہ پھیلے۔دوسری طرف رحیم یار خان کے قریب حادثے کا شکار ہونے والی تیز گام ایکسپریس کے عینی شاہد کا کہنا ہے کہ آگ شارٹ سرکٹ کی وجہ سے لگی ہے، سلینڈر کا کوئی نام و نشان نہیں ہے۔عینی شاہد کا کہنا ہے کہ سلینڈر کو حادثے کی وجہ قرار دینے والے جھوٹ بول رہے ہیں۔حادثے کا شکار ٹرین کے 9 نمبر بوگی کے مسافر نے یہ بھی بتایا کہ آگ 12 نمبر بوگی میں لگی ہے جبکہ ڈی سی او ریلویز کراچی جنید اسلم کا کہنا ہے کہ تیز گام کی 3، 4 اور5 نمبر کی بوگی میں آگ لگی ہے۔عینی شاہد نے بتایا کہ آگ لگنے کے بعد جب ٹرین رکی تو آگ لگنے والی بوگی کے ایک مسافر نے انہیں بتایا کہ پردہ ڈلی ہوئی برتھ سے ایک دم شور کی آواز آئی اور دیکھتے ہی دیکھتے آگ پھیل گئی۔عینی شاہد کا یہ بھی کہنا تھا کہ اگر گاڑی کے اندر آگ بھجانے کا انتظام ہوتا یا گاڑی بروقت رُک جاتی تو اموات میں کمی ہوسکتی تھی۔انہوں نے یہ بھی کہا کہ 25 سے 30 افراد تو چلتی ٹرین سے چھلانگ لگانے کے باعث اپنی زندگی سے ہاتھ دھو بیٹھے ہیں۔ایک اور عینی شاہد کا کہنا تھا کہ جب انہوں نے دیکھا تو لوگ ٹرین سے باہر چھلانگیں لگا رہے تھے اور بوگیوں میں ہرطرف دھواں ہی دھواں تھا۔ریسکیو ٹیموں نے موقع پر پہنچ کر کوشش کی لیکن انہیں ریلوے پھاٹک نہ ہونے کے باعث دشواری کا سامنا کرنا پڑا۔واضح رہے کہ صبح تقریباً ساڑھے 6 بجے کے قریب کراچی سے لاہور جانے والی تیز گام ایکسپریس میں آگ بھڑک اٹھی تھی، جس کے نتیجے میں75 افراد جاں بحق جبکہ متعدد زخمی ہوگئے۔

وزیراعظم عمران خان نےتیز گام ساتحے پر گہرے دکھ اور افسوس کا اظہار کرتے ہوئے ہنگامی بنیادوں پرحادثے کی تحقیقات کا حکم دے دیا۔وزیراعظم عمران خان نے سماجی رابطے کی ویب سائٹ ٹوئٹر پر ایک بیان میں ٹرین سانحے کے غمزدہ خاندانوں سے اظہار تعزیت کرتے ہوئے کہا کہ تیزگام کو پیش آنے والے المناک حادثے پر دل نہایت رنجیدہ ہے۔ میری تمام ہمدردیاں غم میں ڈوبے خاندانوں کیساتھ ہیں اور میں زخمیوں کی جلد شفایابی کیلئے دعاگو ہوں۔انہوں نے مزید کہا کہ اس کے ساتھ حادثے کی فوری تحقیقات ہنگامی بنیادوں پر مکمل کرنے کے احکامات بھی صادر کرچکا ہوں۔انہوں نے زخمیوں کو بہترین طبی امداد فراہم کرنے کی بھی ہدایت دی ہے۔واضح رہے کہ کراچی سے لاہور جانے والی تیز گام ایکسپریس میں رحیم یار خان کے قریب سلنڈر پھٹنے سے آگ لگ گئی جس کے نتیجے میں جاں بحق افراد کی تعداد 65 ہوگئی، جس میں سے 17 لاشیں ناقابل شناخت ہیں۔

وزیراعظم عمران خان نے وفاقی وزراء کو دھرنے کے دنوں میں اسلام آباد سے باہر جانے سے روک دیا۔وزیراعظم عمران خان کی زیر صدارت حکومتی مذاکراتی کمیٹی اور ترجمانوں کے الگ الگ اجلاس ہوئے، جن میں آزادی مارچ سے نمٹنے سے متعلق حکمت عملی تیار کی گئی۔وزیراعظم نے کہا کہ اپوزیشن نے معاہدے کی خلاف ورزی کی تو اس کے خلاف سخت ایکشن لیا جائے گا۔طے پایا کہ اپوزیشن نے وزیراعظم کے استعفے کی شرط رکھی تو اس پر کوئی بات نہیں کی جائے گی۔اجلاس میں فیصلہ کیا گیا ہے کہ مارچ کے جلسہ گاہ تک پہنچنے تک کوئی رکاوٹ کھڑی نہیں کی جائے گی۔آزادی مارچ کے شرکاء جلسہ گاہ کے بجائے کسی اور جانب رخ کریں گے تو پولیس کے ذریعے انہیں روکا جائے گا۔یہ بھی طے پایا کہ آزدی مارچ کے پس پردہ مقاصد کو میڈیا پر بے نقاب کیا جائے گا، وزیراعظم نے اس حوالے سے میڈیا حکمت عملی پر اطمینان کا اظہار کیا۔جمعیت علمائے اسلام( ف) کی قیادت اگر اپوزیشن کو ملاکر دھرنا دینے کی کوشش کرتی ہے تو حکومت کی مذاکراتی کمیٹی اپوزیشن رہنماؤں سے بات کرے گی۔مذاکراتی کمیٹی کے اجلاس کےدوران وزیراعظم نے کہا کہ اپوزیشن معاہدے پر قائم رہتی ہے تو حکومت بھی پاسداری کرےگی، دوسری صورت میں سخت ایکشن ہو گا۔انہوں نے یہ بھی کہا کہ اپوزیشن کے احتجاج کے دوران اسلام آباد کے رہائشیوں کو کسی قسم کا مسئلہ نہیں ہونا چاہیے۔وزیراعظم نے ترجمانوں کو ہدایت کی کہ وہ ذاتی ایجنڈے کے بجائے حکومتی پالیسی کا دفاع کریں تاکہ حکومت کےا قدامات اور پالیسیاں موثر انداز میں اجاگر کی جاسکیں۔

کراچی سے لاہور جانے والی تیز گام ایکسپریس میں رحیم یار خان کے قریب سلنڈر پھٹنے سے آگ لگ گئی جس کے نتیجے میں جاں بحق افراد کی تعداد 65 ہوگئی، جس میں سے 17 لاشیں ناقابل شناخت ہیں۔بہاول پور، رحیم یارخان کے سرکاری اسپتالوں میں ایمرجنسی نافذ کردی گئی ہے۔ریلوے ذرائع کے مطابق تیزگام ایکسپریس کراچی سے راولپنڈی جا رہی تھی جس میں سلنڈر پھٹنے سے تین بوگیوں میں آگ لگی۔

آگ نے 3 بوگیوں کو اپنی لپیٹ میں لے لیا۔ مسافر ٹرین میں سلنڈر سے انڈا بوائل کررہے تھے کہ اچانک آگ بھڑ ک اُٹھی، متعدد افراد نے کود کر جان بچائی۔10 لاشوں کی شناخت ہوگئی، 17 لاشیں ناقابل شناخت ہیںڈی سی او ریلویز کراچی جنید اسلم نے میڈیا سے گفتگو میں بتایا کہ متاثر ہونے والی تین بوگیوں میں 207 افراد سوار تھے جبکہ ان میں زیادہ تر مسافر حیدرآباد سے ٹرین میں چڑھے تھے۔جنید اسلم کے مطابق ایک بوگی میں 78 افراد اور دوسری بوگی میں 77 افراد کی بکنگ تھی جبکہ  بزنس کلاس کی بوگی میں 54 افراد کی بکنگ تھی۔

ڈسٹرکٹ ایمرجنسی آفیسر باقر حسین نے بتایا کہ 10 لاشوں کی شناخت ہوگئی ہے جبکہ دیگر جاں بحق افراد کی شناخت ڈی این اے کے ذریعے کی جارہی ہے۔

وزیر ریلوے شیخ رشید احمد کا بیان

وفاقی وزیر ریلوے شیخ رشید احمد کے مطابق ٹرین کی اکانومی کلاس میں آگ لگی۔ تبلیغی جماعت کے لوگ اجتماع میں جارہے تھے۔شیخ رشید نے کہا کہ زیادہ ہلاکتیں مسافروں کےچلتی ٹرین سےچھلانگ لگانے کی وجہ سے ہوئیں جبکہ شدید زخمیوں کو رحیم یار خان منتقل کیاجارہا ہے۔ انہوں نے بتایا کہ کھاریاں اور ملتان میں برن یونٹس ہیں۔واقعے میں ریلوے کی نہیں، مسافروں کی غلطی ہےاس کے علاوہ انہوں نے بتایا کہ بوگیوں میں لگی آگ پر قابو پالیا گیا ہے۔ اُن کا کہنا ہے کہ مسافروں کےدو سلنڈر پھٹنے کے باعث بوگیوں میں آگ لگی تھی۔انہوں نے کہا کہ اس واقعے میں ریلوے کی غلطی نہیں، مسافروں کی غلطی ہے۔ مسافر ٹرین میں سلینڈر کیسے لے کر پہنچے ، اس کی تحقیقات کی جائے گی۔

پاکستان کی معیشت مستحکم ہو رہی ہے،روپے کی قدر میں بھی بہتری آئی ہے۔ورلڈ بینک کے صدر پاکستان آرہے ہیں انہوں نے بھی ہماری اقتصادی صلاحات کو سراہا ہے۔تاجروں کے ساتھ میٹنگز بہت اچھی رہی اور امید ہے کہ اچھا نتیجہ نکلے گا مزاکرات کا۔

مشیر برائے خزانہ وزیر اعظم پاکستان ڈاکٹر عببد الخفیظ شیخ 

پاکستان مسلم لیگ (ن) رہنما کیپٹن ریٹائرڈ محمد صفدر کو کیمپ جیل سے رہا کردیا گیا۔اس موقع پر کیمپ جیل کے باہر کیپٹن ریٹائرڈ محمد صفدر کے بیٹے سمیت پارٹی کارکن بھی موجود تھے، جو نعرے بازی کررہے تھے۔کیپٹن ریٹائرڈ محمد صفدر کو اشتعال انگیز تقریر کے الزام میں گرفتار کیا گیا تھا اور آج سیشن عدالت نے اُنہیں ضمانت پر رہا کرنے کا حکم دیا تھا۔عدالت نے اُنہیں 2 لاکھ روپے کے ضمانتی مچلکےجمع کرانے کا بھی حکم دیا تھا۔واضح رہے کہ لاہور پولیس نے محمد صفدر کو راوی ٹول پلازہ سے گرفتار کیا تھا اور ان کے خلاف تھانہ اسلام پورہ میں 16 ایم پی او کے تحت مقدمہ درج کیا گیا تھا۔گرفتاری کے اگلے روز جب انہیں عدالت میں پیش کیا گیا تو پولیس نے ان پر مزید دو مقدمات درج کرلیے تھے۔

سابق صدر آصف علی زرداری کے پلیٹ لیٹس 1 لاکھ 35 ہزار تک پہنچ گئے تاہم کمزوری اور شوگر کے باعث ہاتھوں میں کپکپاہٹ کی شکایت ہے۔اسلام آباد کے پمز اسپتال میں آصف زرداری کا علاج جاری ہے، ڈاکٹروں کے مطابق ان کے پلیٹ لیٹس نارمل ہونا شروع ہوگئے ہیں۔ڈاکٹروں کے مطابق پرانے اسٹنٹ کی وجہ سے آصف زرداری کے دل کے وال میں کلاٹ پیدا ہوگیا ہے، جسے نکالنے کے لیے تھیلیئم اسکین کرانا ہوگا۔ڈاکٹروں کے مطابق تمام ٹیسٹ کلیئر ہونے تک آصف زرداری کو اسپتال میں رکھے جانے کا امکان ہے۔نیب راولپنڈی کی حراست میں موجود آصف زرداری کو 23 اکتوبر کی رات کمر اور گردن کی تکلیف کے باعث پمز اسپتال میں داخل کیا گیا تھا۔آصف زرداری کو ڈپریشن، جسمانی کمزوری، گردن اور مہروں میں شدید درد کی بھی شکایت ہے۔ اس کے علاوہ ان کے غدود میں غیر معمولی اضافے کی تشخیص بھی ہوئی ہے جسے خطرناک قرار دیا گیا ہے۔پمز اسپتال میں آصف علی زرداری کے وارڈ کو ہی سب جیل کا درجہ دیا گیا ہے۔

جمعیت علمائے اسلام (ف) کے سربراہ مولانا فضل الرحمٰن کی قیادت میں نکالے گئے آزادی مارچ کے لاہور میں اسٹیج پر پیپلز پارٹی موجود اور ن لیگ غائب رہی۔پیپلز پارٹی کے سینئر رہنما قمر زمان کائرہ نے بھی آزادی مارچ سے خطاب کیا اور کہا کہ اس حکومت کا جانا اب ٹھہر گیا ہے۔انہوں نے مولانا فضل الرحمٰن کو مبارک باد دی اور کہا کہ آزادی مارچ کا جتنا بڑا ہجوم لے کر آپ کراچی سے چلے، اس نے عمران خان کے قدم اکھاڑ دیے ہیں۔قمر زمان کائرہ نے مزید کہا کہ عمران خان کو شک تھا کہ آپ بڑا ہجوم اپنے ہمراہ نہیں لاسکیں گے اور وزیراعظم کو یہ بھی شک تھا کہ کچھ نادیدہ قوتیں آپ کا راستہ روک لیں گی۔ان کا کہنا تھا کہ مولانا آپ بڑے اجتماع، بڑے عزم اور بڑے نظم و ضبط کے ساتھ اس کارواں کی قیادت کی ہے، جوں جوں آپ اسلام آباد کی طرف بڑھ رہے ہیں قافلہ بڑھتا جارہا ہے۔پی پی رہنما نے کہا کہ آپ کے اس اجتماع میں ابھی سندھ اور پنجاب اکٹھا ہے جب آپ اسلام آباد میں داخل ہوں گے تو خیبرپختونخوا اور کشمیر کے عوام بھی اس قافلے کا حصہ ہوں گے اور آپ کا وعدہ پورا ہوگا۔