خبریں

عالیہ بھٹ اور ورون دھون کی فلم ’بدریناتھ کی دلہنیا‘ باکس آفس پر تہلکہ مچانے میں کامیاب ہوگئی اور ریلیز کے تیسرے دن 43کروڑ سے زائد کا بزنس کر لیا۔عالیہ بھٹ اور ورون دھون کی نئی فلم ’بدریناتھ کی دلہنیا‘ بالی ووڈ فلم’ہمٹی شرما کی دلہنیا‘ کاسیکوئل ہے جس نے اپنی ریلیز کے تیسرے دن 43کروڑسے زائد کا بزنس کیا ہے جبکہ فلم میں ورون دھون اور عالیہ بھٹ کی اداکاری کو شائقین کی جانب سے بت حد پسند کیا جا رہا ہے۔ششانک کھیتن کی ہدایتکاری اور کرن جوہر کی پروڈیوس کردہ اس فلم میں عالیہ بھٹ اور ورون دھون مرکزی کردار ادا کر رہے ہیں جبکہ فلم کی دیگر کاسٹ میں گوہر خان،موہت مروہ اور شویتاباسو پراساد شامل ہیں۔بھارتی میڈیا رپورٹس کے مطابق فلم ’بدریناتھ کی دلہنیا‘ شائقین کو کافی حد تک متاثر کرنے میں کامیاب ہوگئی ہے اور امید کی جا رہی ہے کہ آنے والے دنوں میں اسکے بزنس میں مزید اضافہ ہوگا۔

’کنگ کانگ‘ نے دھماکے دار اینٹری دیتے ہوئے آتے ہی ’لوگن‘ کو پچھاڑ دیا، صرف 3روز میں 6ارب روپے کما کر باکس آفس پر قبضہ کر لیا۔ ہالی وڈ کی ایکشن اور ایڈونچر سے بھرپور فلم ’کانگ، اسکل آئی لینڈ‘ کی کہانی اس بار بھی ایک ایسے دہشت ناک گوریلے پر مبنی ہے جو گھنے اور پراسرار جنگلات میں رہتا ہے۔دل دہلا دینے والے مناظر سے بھرپور فلم ’کانگ، اسکل آئی لینڈ‘20ارب روپے کی لاگت سے تیار کی گئی ہے۔ایکس مین سیریز کی دسویں فلم ’لوگن‘ نے گزشتہ ہفتے باکس آفس پر دھوم مچائی لیکن اس ہفتے یہ دوسرے نمبر پر آگئی، فلم میں اس بار لوگن کے ساتھ ان کی بیٹی بھی ایکشن دکھا رہی ہے،جس میں اپنے والد کی صلاحیتیں منتقل ہو جاتی ہیں۔ایکس مین لوگن دشمنوں سے اپنی بیٹی کو بچانے کی کوشش کرتا ہے لیکن دشمن اس کا تعاقب کرتے ہیں اور پھر ایکشن کا آغاز ہوتا ہے، فلم نے اس ہفتے 2ارب 51کروڑ روپے کمائے۔ہارر اور مسٹری سے بھرپور فلم ’گیٹ آئوٹ‘ تیسرے ہفتے تیسرے نمبر پر رہی۔فلم ’گیٹ آؤٹ‘ کی کہانی ایسے سیاہ فام امریکی نوجوان کے بارے میں ہے جو اپنی دوست کے خاندان سے ملاقات کے لیے اس کے گھر جاتا ہے جہاں اسے معلوم ہوتا ہے کہ اس گھر میں کام کرنے والے بہت سے سیاہ فام ملازمین پراسرار طور پر غائب ہوئے ہیں۔فلم نے اس ہفتے ایک ارب 40کروڑ روپے کمائے۔

ہالی ووڈ کی2011 کی بلاک بسٹر اینیمیٹڈ کامیڈی فلم دی اسمرفز کے نئے حصے ’اسمرفز: دی لوسٹ ولیج‘ کی نئی جھلکیاں جاری کردی گئی ہیں۔کیلی ایسبیری کی ہدایتکاری میں بننے والی اس فلم کی کہانی اسمرفز کے گرد گھوم رہی ہے جو جنگلات میں چھپے پراسرار حقائق کی کھوج لگاتے دکھائی دیںگے۔فلم میں آواز کا جادو جگانے والے فنکاروں میں ڈیمی لوویٹو،مینڈی پیٹنکن،جیک میک بریئر،ڈینی پوڈی اور رین ولسن سمیت دیگر شامل ہیں۔جارڈن کرنر کی پروڈیو س کردہ یہ فلم کولمبیا پکچرز کے بینر تلے30مارچ کو سینما گھروں کی زینت بنے گی۔

مشہورمارشل آرٹس ہیرو ہیرو جیکی چن کی ایکشن اور کامیڈی سے بھرپور تھری ڈی اینی میٹڈ فلم دی لیگو ننجاگو موودی کی نئی جھلکیاں جاری کردی گئی ہیں۔چارلی بین کی ہدایتکاری میں بننے والی اس فلم کی کہانی 6ایسے ننجاز کے گرد گھومتی ہے، جنہیں انتقام لینے کیلئے غیر معمولی صلاحیتوں سے نوازا جاتا ہے۔فلم میں اپنی آواز کا جادو جگانے والے فنکاروں میں جیکی چن،ڈیو فرانکو،مائیکل پینا،فریڈ آرمیسن،کومیل نانجیانی اور زیچ ووڈز سمیت دیگر شامل ہیں۔ڈین لن اور رائے لی کی مشترکہ پروڈیوس کردہ یہ فلم وارنر برادرز پکچرز کے بینر تلے 22ستمبرکو سینما گھروں میں نمائش کیلئے پیش کی جائے گی۔