اسلام آباد (فخر درانی) پاکستان دنیا کے ان ممالک میں شامل ہے جہاں ہلاکت خیز عالمگیر وبا کورونا وائرس سے نبر آزما ہو نے کی تیاریاں نہ ہو نے کے برابر ہیں۔پاکستان میں ہر دس ہزار مریضوں پر دستیاب ڈاکٹرز 9.8، نرسیں 5 اور ہسپتالوں میں دستیاب بستروں کی تعداد 6 ہے۔پاکستان اپنی شرح نمو کا 3۔8 صحت کی مد میں خرچ کرتا ہے۔ ترقی یافتہ ممالک میں ایسے دس ہزار مریضوں کے ہسپتالوں میں 55 بستر، 30 ڈاکٹرز اور 81نرسیں دستیاب ہیں۔یو این ڈی پی کی تازہ رپورٹ کے مطابق پاکستان میں کورونا وائرس سے نبرد آزما ہو نے کے لئے تیاری نہ ہو نے کے برابر ہے۔دنیا کی آبادی اس وقت 6 ارب 50 کروڑ سے زائد ہے جس میں سے 85.5 کو انٹر نیٹ کی سہولت حاصل نہیں ہے ، جس کی وجہ سے ان میں آگہی اور خواندگی کا فقدان ہے۔کورونا وائرس اب وبا سے سے زیادہ انسانی بحران کی صورت اختیار کر گیا ہے ،ہر معاشرہ ، گروہ اور انفرادی طور پر افراد غیر محفوظ ہو گئے ہیں۔اعداد وشمار کے مطابق بھارت میں ہر دس ہزار افراد پر7.8 ڈاکٹرز ، 21 نرسیں اور ہسپتالوں میں سات بستر مہیا ہیں ۔بھارت اپنے شرح نمو کا 3.7 فیصد صحت پر خرچ کر تا ہے جبکہ ترقی یافتہ ملک امریکا میں یہ شرح ہر دس ہزار مریضوں پر 125.9 ڈاکٹرز ،86 نرسیں اور 29 بستر ہیں ۔امریکا اپنی شرح نمو کا سترہ فیصد سے زائد صحت پر خرچ کرتا ہے۔

مکّہ کی 70؍ فیصد آبادی کے کورونا وائرس میں مبتلا ہونے کا شبہ

کورونا وائرس دنیا بھر میں تیزی سے پھیل رہا ہے جبکہ پاکستان میں بھی اس سے متاثرہ افراد کی تعداد میں روز بروز اضافہ ہو رہا ہے، ملک بھر میں کورونا وائرس سے متاثرہ مریضوں کی تعداد 1865 ہو گئی۔سندھ کے شہر حیدر آباد میں تبلیغی جماعت کے مزید 54 افراد میں کورونا وائرس کی تصدیق ہو جانے کے بعد تبلیغی جماعت سے وابستہ مریضوں کی تعداد 90 ہو گئی۔کراچی، جیکب آباد اور جامشورو میں بھی مزید کیسز کی تصدیق ہونے کے بعد سندھ میں کورونا وائرس سے متاثرہ مریضوں کی تعداد سوا 6 سو سے زائد ہو گئی۔محکمۂ صحت نے تبلیغی جماعت کے مزید 54 افراد میں کورونا وائرس کی تصدیق کر دی ہے، تبلیغی جماعت سے وابستہ 200 افراد کے کورونا کے ٹیسٹ کیے گئے تھے۔اب حیدر آباد میں کورونا وائرس کے مثبت ٹیسٹ کی تعداد 94 ہو گئی ہے، جن میں سے 90 کا تعلق تبلیغی جماعت سے ہے۔تبلیغی مرکز سے کوہسار اسپتال منتقل کیے گئے چینی باشندے میں ہفتے کے روز کورونا وائرس کی تصدیق ہونے کے بعد تبلیغی مرکز میں قیام پذیر تمام افراد کو محدود کر دیا گیا تھا جن کے محکمۂ صحت نے ٹیسٹ کے لیے نمونے بھی حاصل کیے ہیں۔کراچی میں کورنا وائرس کے 45 نئے کیسز کی تصدیق کے بعد شہرِ قائد میں کل مریضوں کی تعداد 294 ہو گئی ہے، جبکہ جامشورو میں 2 اور ایک کیس جیکب آباد میں سامنے آیا ہے۔محکمۂ صحت سندھ کے مطابق صوبے میں کورونا کے61 نئے کیسز سامنے آنے کے بعد مجموعی تعداد 627 ہو گئی ہے جبکہ 41 کورونا سے متاثرہ افراد صحت یاب ہو چکے ہیں۔کراچی میں کورونا وائرس سے متاثرہ 3 افراد جاں بحق ہو چکے ہیں اور سندھ میں کورونا وائرس سے اموات کی تعداد 6 ہو چکی ہے۔کراچی میں کورونا سے صحت یاب مریضوں میں صوبائی وزیر سعید غنی بھی شامل ہیں۔پنجاب میں بھی کورونا وائرس کے ناصرف نئے کیسز میں بلکہ اموات میں بھی مسلسل اضافہ ہو رہا ہے، ترجمان پرائمری اینڈ سیکنڈری ہیلتھ کیئر کے مطابق پنجاب میں کورونا وائرس سے مزید 3 اموات ہونے کے بعد صوبے میں اس وائرس سے انتقال کر جانے والوں کی تعداد 9 ہو گئی ہے۔پنجاب میں جاں بحق ہونے والے ان 3 افراد میں ایک خاتون اور 2 مرد شامل ہیں، جبکہ صوبے میں وائرس سے متاثرہ افراد کی تعداد 652 ہو گئی ہے۔کورونا وائرس کے مریضوں کی تعداد خیبر پختون خوا میں 221، بلوچستان میں 153، گلگت بلتستان میں 148، اسلام آباد میں 58 اور آزاد کشمیر میں 6 ہو چکی ہے۔ملک میں کورونا وائرس کا پہلا کیس 25 فروری کو رونما ہوا تھا، اس وائرس سے متاثرہ 76 مریض صحت یاب ہو چکے ہیں جبکہ 11 مریضوں کی حالت تشویش ناک ہے۔کورونا وائرس سے ملک بھر میں کل 25 اموات ہو چکی ہیں، اس وائرس سے پنجاب میں 9، سندھ میں 8، خیبر پختون خوا میں 5، گلگت بلتستان میں 2 اور بلوچستان میں ایک مریض انتقال کر چکا ہے۔