نجم سیٹھی آج پاکستان کرکٹ بورڈ کے نئے چیئرمین منتخب ہو جائیں گے

لاہور: (نمائندہ خصوصی) نجم سیٹھی شہریارخان کے جانشین ہونگے، جو مدت پورے ہونے پر عہدے سے سبکدوش ہو گئے تھے۔ آج پی سی بی گورننگ بورڈ کا اجلاس ہو گا، جس میں نجم سیٹھی کو منتخب کرنے کی رسمی کارروائی ہو گی۔ چار سال قبل تین ماہ کیلئے بورڈ میں آنے والے اڑسٹھ سالہ صحافی بطور چیئرمین دوسری اننگز کا آغاز کریں گے۔ پی سی بی کے سابق چیف ایگزیکٹو عارف علی عباسی کہتے ہیں کہ اگر نجم سیٹھی چئیرمین بنے تو یہ توہین عدالت ہو گی۔ دوسری جانب سابق چئیرمین توقیر ضیا اور خالد محمود نجم سیٹھی کو پی سی بی کی سربراہی کے لیے موزوں قرار دے رہے ہیں۔ دونوں کے نزدیک پی ایس ایل کا کامیاب انعقاد ان کا بڑا کارنامہ ہے۔