ڈینیئل پرل کیس کے فیصلے کی ٹائمنگ پر تعجب ہے، شاہ محمود قریشی

وزیرِ خارجہ شاہ محمود قریشی کہتے ہیں کہ ڈیینئل پرل قتل کیس کے فیصلے کی ٹائمنگ پر تعجب ہوا ہے، اس ضمن میں اپیل کا حق ہے، اعلیٰ فورم پر اپیل کی جا سکتی ہے۔ وزیرِ خارجہ شاہ محمود قریشی نے کہا کہ ساری دنیا کی توجہ کورونا وائرس کی وبا کا مقابلہ کرنے پر مرکوز ہے۔انہوں نے کہا کہ ایسے میں پاکستان کی کورونا وائرس سے متعلق کاوشوں کو دنیا سراہ رہی ہے، جبکہ ہندوستان اپنے مذموم عزائم پر عمل پیرا ہے۔شاہ محمود قریشی نے بتایا کہ اقوامِ متحدہ کے سیکريٹری جنرل انتونیو گوئیتریس سے کورونا وائرس کے حوالے سے مفید گفتگو ہوئی ہے۔انہوں نے مزید بتایا کہ اقوام متحدہ کے سیکریٹری جنرل نے کورونا وائرس کی وبا کی روک تھام سے متعلق اچھی تجاویز شیئر کی ہیں۔وزیرِ خارجہ کا یہ بھی کہنا ہے کہ سیکریٹری جنرل اقوامِ متحدہ سے مقبوضہ کشمیر میں آبادی کے تناسب میں تبدیلی پر بھی بات ہوئی ہے، دہشت گردی پر قابو پانے کے لیے پاکستان نے بہت قربانیاں دی ہیں۔