کراچی، خاتون کا 24 گھنٹے میں دوسری مرتبہ انتقال

کراچی میں مردہ قرار دی گئی 75 سالہ رشیدہ بی بی دوبارہ زندہ ہونے کے بعد آج صبح انتقال کر گئیں۔سینئر ڈائریکٹر ہیلتھ سروسز ڈاکٹر سلمی کوثر کے مطابق 75 سالہ رشیدہ بی بی آج صبح انتقال کر گئیں، رشیدہ بی بی 2 سال سے فالج، ذیابیطس اور بلڈ پریشر کی مریضہ تھیں خاتون کو دو روز قبل عباسی شہید اسپتال کے ڈاکٹروں کی جانب سے مردہ قرار دے دیا گیا تھا، مگر وہ دوران غسل اٹھ کر بیٹھ گئی تھیں۔رشیدہ بی بی کے دوبارہ زندہ ہوجانے کے بعد گھر والوں نے انہیں دوبارہ اسپتال میں داخل کر وایا تھا۔دوسری جانب ڈاکٹر سلمی کوثر کا کہنا ہے کہ گزشتہ روز ہونے والے واقع کی تحقیقات کی جا رہی ہیں کیونکہ خاتون کو بغیر معائنہ کیے ڈیتھ سرٹیفیکٹ جاری کیا گیا تھا۔واضح رہے کہ گزشتہ روز مردہ قرار دی گئی 75 سالہ رشیدہ بی بی کو عباسی شہید اسپتال سے ایدھی سردخانے منتقل کیا گیا تھا جہاں خاتون کو پون گھنٹے تک سرد خانے میں اور پھر مزید ایک گھنٹے تک غسل کے لیے رکھا گیا ۔ایدھی ذرائع کا کہنا تھا کہ ڈیڑھ بجے کی شب خاتون کو غسل دینے کے لیے اٹھایا گیا تو بدن میں حرکت ہوئی جسے دیکھ کر اہلخانہ نے شور مچا دیا اور خاتون کو ساتھ لے گئے۔