دل کیوں خون کے آنسو روتا ہے ؟ عطااللہ عیسی خیلوی نے دل کی بات کہہ دی

ملتان ( خصوصی نمائندہ ) معروف لوک گلوکار عطاء اللہ خان عیسیٰ خیلوی نے کہا ہے کہ سرائیکی وسیب ہماری پہچان اور ہمارا مان ہے۔ وسیب کی محرومیوں کو دیکھ کر دل خون کے آنسو روتا ہے لیکن ہم مایوس نہیں بلکہ وسیب کا ہر فرد اپنے حقوق کے بازیابی کیلئے جدوجہد پر عمل پیرا ہے ۔علیحدہ صوبے کی قیام سے ہی سرائیکی وسیب ترقی کی منازل طے کرے گا۔وہ گذشتہ روز سرائیکی ڈیموکریٹک پارٹی شعبہ خواتین کے مرکزی سیکرٹریٹ کے دورے کے موقع پر مرکزی صدر شعبہ خواتین عابدہ بخاری اور دیگر عہدیداران سے گفتگو کررہے تھے جبکہ اس موقع پر صبا فیصل،چوہدری فیصل عزیز اور کاظم رضا بھی موجود تھے ۔مرکزی صدر شعبہ خواتین عابدہ حسین بخاری نے نامور سنگر عطا اللہ خان عیسیٰ خیلوی کو ایس ڈی پی سرائیکی صدبہ کے قیام اور سرائیکی وسیب کے حقوق کے حوالے سے کی جانے والی جدوجہد سے آگاہ کیا۔ اس موقع پر عطا اللہ عیسیٰ خیلوی نے ایس ڈی پی کی جدوجہد خاص طور پر خواتین کی جدوجہد کو سراہتے ہوئے کہا کہ اس وسیب کی ہر ماں،ہر بہن،ہر بیٹی ہمارا قیمتی سرمایہ ہیں۔ سرائیکی وسیب کی خواتین کو بھی اس جدوجہد میں ہر اول دستے کا کردار ادا کرنا ہوگا ۔بعد ازاں دختر سرائیکستان عابدہ حسین بخاری نے عطا اللہ خان عیسیٰ خیلوی کو سرائیکی اجرک پہنائی۔