مقامی

اسلام آباد (خصوصی نمائندہ) مسلم لیگ ن کے سینیٹر ظفر علی شاہ نے درخواست میں مؤقف اختیار کیا ہے کہ حسین حقانی نے اپنے بیان میں ایبٹ آباد آپریشن کیلئے سہولت کار کا کردار ادا کرنے کا اعتراف کیا ہے۔اس عمل میں آصف زرداری اور یوسف رضا گیلانی بھی شامل تھے، تینوں پر کورٹ مارشل کے تحت مقدمہ چلایا جائے۔درخواست میں کہا گیا ہے کہ سپریم کورٹ حسین حقانی کو بیرون ملک سے لانے کا حکم دے اور آصف زرداری، یوسف رضا گیلانی اور حسین حقانی کے نام ای سی ایل میں شامل کئے جائیں۔

اسلام آباد (خصوصی نمائندہ) ذرائع کے مطابق، حکمران جماعت نے پاناما کیس کا فیصلہ وزیر اعظم کے خلاف آنے کی صورت میں فوری الیکشن کروانے پر غور شروع کر دیا ہے۔مسلم لیگ نون کی اعلی قیادت نے تین ہفتوں میں چار بار مشاورت کی ہے۔ نون لیگ کو عدالت سے سرخرو ہونے کا یقین ہے پھر بھی تمام ممکنات پر تبادلہ خیال کیا جا رہا ہے۔ وزیر اعظم کی صاحبزادی مریم نواز کو لاہور سے الیکشن لڑوانے کا حتمی فیصلہ بھی ہو چکا ہے۔ذرائع کے مطابق، حکومتی قانونی ماہرین پرامید ہیں کہ تحریک انصاف نے ایسی قانونی بنیاد فراہم نہیں کی جس کی بنیاد پر وزیراعظم کو گھر بھیجا جا سکے۔ مشاورتی اجلاسوں میں نوے فیصد رہنماؤں نے رائے دی کہ فیصلہ اگر خلاف آئے تو عوامی عدالت سے رجوع کیا جائے۔لیگی رہنماؤں کا کہنا تھا کہ الیکشن کیلئے مسلم لیگ ن کی تیاری مکمل ہے جبکہ پیپلز پارٹی سندھ تک محدود ہے۔ تحریک انصاف انتخابی تیاری کے بجائے سارا وقت احتجاجی سیاست میں لگی رہی ہے۔ذرائع کے مطابق، الیکشن جب بھی ہوئے مریم نواز لاہور سے الیکشن لڑیں گی۔ تمام لیگی وزراء اور رہنماؤں نے نواز شریف پر مکمل اعتماد کا اظہارکیا ہے

اسلام آباد (خصوصی نمائندہ) وزیر دفاع خواجہ آصف نے سابق پاکستانی سفیر حسین حقانی کے آرٹیکل پر تحقیقات کے لئے پارلیمانی کمیشن بنانے کا مطالبہ کردیا ہے، ان کا کہنا تھا کہ ہرتین ماہ بعد حساس نوعیت کے معاملات اٹھائے جارہے ہیں۔خواجہ آصف نے کہا کہ قومی سلامتی کو اعلی سطح پر نقصان پہنچایا گیا ہے،حسین حقانی نےاس وقت کے صدر، وزیراعظم کی اجازت کے بعد دبئی اور واشنگٹن سے ویزے جاری کیے۔ان کا کہنا تھا کہ حسین حقانی کئی بار پاکستان کی سیکیورٹی کے بارے میں لکھ چکے ہیں، اس بار انہوں نے آصف زرداری اور یوسف رضا گیلانی کا نام لیا ہے۔خواجہ آصف نے کہا کہ اپوزیشن لیڈر نے غدار کہہ کر جان چھڑالی، معاملہ اتنا آسان نہیں ہے، معاملے کی کھلی انکوائری کی جائے۔وزیر دفاع نے مزید کہا کہ حسین حقانی نےدعوی کیا ہے کہ اس بارے میں اس وقت کے صدر، وزیراعظم دونوں آگاہ تھے، اس بارے میں تحقیقات کے لئے پارلیمانی کمیشن بنایا جائے۔ان کا کہنا تھا کہ حسین حقانی بطور سفیر کئی معاملات میں رچرڈ بائوچر سے رابطے میں رہے ،جس سے سابق دور حکومت کے وزیراعظم اور صدر آگاہ تھے، پارلیمنٹ سب سے اہم اور بڑا فورم ہے، کمیشن بنانے کی رائے یہیں سے لی جائے۔خواجہ آصف کا کہنا تھا کہ ہم حسین حقانی کے خلاف سپریم کورٹ گئے تھے، وہ عدلیہ کی اجازت سے باہر گئے اور اب تک نہیں لوٹے، اس کے صدر اور وزیر اعظم نے ان کے سابقہ بیان کو تسلیم کیا تھا۔

کراچی (نمائندہ خصوصی) یوم پاکستان کے موقع پر انٹر ڈسٹرکٹ ٹور ڈی سائیکل ریس کا انعقاد کیا جائے گا جبکہ سندھ کے تفریحی اور تاریخی مقامات پر یوم پاکستان اسپورٹس فیسٹیول میں مختلف کھیلوں کے مقابلے بھی ہونگے۔ اس بات کا اظہار صوبائی سیکریٹری اسپورٹس سندھ محمد سلیم رضا نے سندھ بھر سے آئے ہوئے ڈسٹرکٹس اسپورٹس آفیسرز اورفوکل پرسن کے اجلاس سے خطاب کرتے ہوئے کیا۔اس موقع پر ان کے ہمراہ ڈائریکٹر اسپورٹس شہزاد پرویز بھٹی’ ڈپٹی ڈائریکٹر اسپورٹس لاڑکانہ محمد حسین مکانی اور کنسلٹنٹ سندھ اسپورٹس بورڈ رازق حسین ربانی بھی موجود تھے۔ تفصیلات کے مطابق سیکریٹری اسپورٹس محمد سلیم رضا نے یوم پاکستان کے حوالے سے محکمہ کھیل کے افسران کو بریفنگ دیتے ہوئے کہا کہ23 مارچ یوم پاکستان کے موقع پر انٹر ڈسٹرکٹ ٹور ڈی سائیکل ریس لیاری سے شروع ہوکر براستہ ٹھٹھہ’ سجاول اور ٹنڈو محمد خان سے ہوتی ہوئی گھوٹکی میں اختتام پذیر ہوگی۔ان کا کہنا تھا کہ صوبائی وزیر کھیل سردارمحمد بخش خان مہر کی ہدایت کے مطابق سندھ کے تاریخی و تفریحی مقامات رنّی کوٹ’ گورا کھیل’ کوٹ ڈیجی’ ننگ پارکر’ عمر کوٹ اور موہنجوڈرو میں مختلف کھیلوں کے مقابلوں کے ساتھ ساتھ سندھ کے روائتی کھیلوں ملاکھڑا اور کوڈی کوڈی کو بھی شامل کیا گیا ہے۔سیکریٹری اسپورٹس محمد سلیم رضا نے مزید کہا کہ آئندہ برس سے محکمہ کھیل کی جانب سے ان سابق لیجنڈ اور نامور کھلاڑیوں کو جنہوں نے قومی اور بین الاقوامی سطح پر ملک کی نمائندگی کی ہوگی انہیں ماہانہ بنیادوں پر گرانٹ دی جائے گی۔ اسکے علاوہ آئندہ برس سے ہی اسکول گیمز اور طلباء و طالبات کے لئے مختلف کھیلوں کے کوچنگ کیمپس کا انعقاد بھی کیا جائے گا جس میں ماہر کوچز کھلاڑیوں کو تربیت فراہم کریں گے۔سیکریٹری اسپورٹس نے ڈسٹرکٹ اسپورٹس آفیسرز اور فوکل پرسن کو ہدایت کی کہ وہ23مارچ یوم پاکستان کے سلسلے میں ہونے والے ان گیمز کی اپنے اپنے ڈسٹرکٹ میں بھرپور تیاری کریں۔